(1) පච්චුප්පන්නවාරො

(ක) අනුලොමපුග්ගලො

19. (ක) යස්ස කායසඞ්ඛාරො උප්පජ්ජති තස්ස වචීසඞ්ඛාරො උප්පජ්ජතීති?

විනා විතක්කවිචාරෙහි අස්සාසපස්සාසානං උප්පාදක්ඛණෙ තෙසං කායසඞ්ඛාරො උප්පජ්ජති, නො ච තෙසං වචීසඞ්ඛාරො උප්පජ්ජති. පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසං කායසඞ්ඛාරො ච උප්පජ්ජති වචීසඞ්ඛාරො ච උප්පජ්ජති.

(ඛ) යස්ස වා පන වචීසඞ්ඛාරො උප්පජ්ජති තස්ස කායසඞ්ඛාරො උප්පජ්ජතීති?

විනා අස්සාසපස්සාසෙහි විතක්කවිචාරානං උප්පාදක්ඛණෙ තෙසං වචීසඞ්ඛාරො උප්පජ්ජති, නො ච තෙසං කායසඞ්ඛාරො උප්පජ්ජති. පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසං වචීසඞ්ඛාරො ච උප්පජ්ජති කායසඞ්ඛාරො ච උප්පජ්ජති.

(ක) යස්ස කායසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජතීති? ආමන්තා.

(ඛ) යස්ස වා පන චිත්තසඞ්ඛාරො උප්පජ්ජති තස්ස කායසඞ්ඛාරො උප්පජ්ජතීති?

විනා අස්සාසපස්සාසෙහි චිත්තස්ස උප්පාදක්ඛණෙ තෙසං චිත්තසඞ්ඛාරො උප්පජ්ජති, නො ච තෙසං කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං චිත්තසඞ්ඛාරො ච උප්පජ්ජති කායසඞ්ඛාරො ච උප්පජ්ජති.

20. (ක) යස්ස වචීසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජතීති? ආමන්තා.

(ඛ) යස්ස වා පන චිත්තසඞ්ඛාරො උප්පජ්ජති තස්ස වචීසඞ්ඛාරො උප්පජ්ජතීති?

විනා විතක්කවිචාරෙහි චිත්තස්ස උප්පාදක්ඛණෙ තෙසං චිත්තසඞ්ඛාරො උප්පජ්ජති, නො ච තෙසං වචීසඞ්ඛාරො උප්පජ්ජති. විතක්කවිචාරානං උප්පාදක්ඛණෙ තෙසං චිත්තසඞ්ඛාරො ච උප්පජ්ජති වචීසඞ්ඛාරො ච උප්පජ්ජති.

(ඛ) අනුලොමඔකාසො

21. (ක) යත්ථ කායසඞ්ඛාරො උප්පජ්ජති තත්ථ වචීසඞ්ඛාරො උප්පජ්ජතීති?

දුතියජ්ඣානෙ තතියජ්ඣානෙ තත්ථ කායසඞ්ඛාරො උප්පජ්ජති, නො ච තත්ථ වචීසඞ්ඛාරො උප්පජ්ජති. පඨමජ්ඣානෙ කාමාවචරෙ තත්ථ කායසඞ්ඛාරො ච උප්පජ්ජති වචීසඞ්ඛාරො ච උප්පජ්ජති.

(ඛ) යත්ථ වා පන වචීසඞ්ඛාරො උප්පජ්ජති තත්ථ කායසඞ්ඛාරො උප්පජ්ජතීති?

රූපාවචරෙ අරූපාවචරෙ තත්ථ වචීසඞ්ඛාරො උප්පජ්ජති, නො ච තත්ථ කායසඞ්ඛාරො උප්පජ්ජති. පඨමජ්ඣානෙ කාමාවචරෙ තත්ථ වචීසඞ්ඛාරො ච උප්පජ්ජති කායසඞ්ඛාරො ච උප්පජ්ජති.

(ක) යත්ථ කායසඞ්ඛාරො උප්පජ්ජති තත්ථ චිත්තසඞ්ඛාරො උප්පජ්ජතීති? ආමන්තා.

(ඛ) යත්ථ වා පන චිත්තසඞ්ඛාරො උප්පජ්ජති තත්ථ කායසඞ්ඛාරො උප්පජ්ජතීති?

චතුත්ථජ්ඣානෙ රූපාවචරෙ අරූපාවචරෙ තත්ථ චිත්තසඞ්ඛාරො උප්පජ්ජති, නො ච තත්ථ කායසඞ්ඛාරො උප්පජ්ජති. පඨමජ්ඣානෙ දුතියජ්ඣානෙ තතියජ්ඣානෙ කාමාවචරෙ තත්ථ චිත්තසඞ්ඛාරො ච උප්පජ්ජති කායසඞ්ඛාරො ච උප්පජ්ජති.

22. (ක) යත්ථ වචීසඞ්ඛාරො උප්පජ්ජති තත්ථ චිත්තසඞ්ඛාරො උප්පජ්ජතීති? ආමන්තා.

(ඛ) යත්ථ වා පන චිත්තසඞ්ඛාරො උප්පජ්ජති තත්ථ වචීසඞ්ඛාරො උප්පජ්ජතීති?

දුතියජ්ඣානෙ තතියජ්ඣානෙ චතුත්ථජ්ඣානෙ තත්ථ චිත්තසඞ්ඛාරො උප්පජ්ජති, නො ච තත්ථ වචීසඞ්ඛාරො උප්පජ්ජති. පඨමජ්ඣානෙ කාමාවචරෙ රූපාවචරෙ අරූපාවචරෙ තත්ථ චිත්තසඞ්ඛාරො ච උප්පජ්ජති වචීසඞ්ඛාරො ච උප්පජ්ජති.

(ග) අනුලොමපුග්ගලොකාසා

23. යස්ස යත්ථ කායසඞ්ඛාරො උප්පජ්ජති…පෙ….

(යස්සකම්පි යස්සයත්ථකම්පි සදිසං.)

(ඝ) පච්චනීකපුග්ගලො

24. (ක) යස්ස කායසඞ්ඛාරො නුප්පජ්ජති තස්ස වචීසඞ්ඛාරො නුප්පජ්ජතීති?

විනා අස්සාසපස්සාසෙහි විතක්කවිචාරානං උප්පාදක්ඛණෙ තෙසං කායසඞ්ඛාරො නුප්පජ්ජති, නො ච තෙසං වචීසඞ්ඛාරො නුප්පජ්ජති. සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරො ච නුප්පජ්ජති වචීසඞ්ඛාරො ච නුප්පජ්ජති.

(ඛ) යස්ස වා පන වචීසඞ්ඛාරො නුප්පජ්ජති තස්ස කායසඞ්ඛාරො නුප්පජ්ජතීති?

විනා විතක්කවිචාරෙහි අස්සාසපස්සාසානං උප්පාදක්ඛණෙ තෙසං වචීසඞ්ඛාරො නුප්පජ්ජති, නො ච තෙසං කායසඞ්ඛාරො නුප්පජ්ජති. සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච නුප්පජ්ජති කායසඞ්ඛාරො ච නුප්පජ්ජති.

(ක) යස්ස කායසඞ්ඛාරො නුප්පජ්ජති තස්ස චිත්තසඞ්ඛාරො නුප්පජ්ජතීති?

විනා අස්සාසපස්සාසෙහි චිත්තස්ස උප්පාදක්ඛණෙ තෙසං කායසඞ්ඛාරො නුප්පජ්ජති, නො ච තෙසං චිත්තසඞ්ඛාරො නුප්පජ්ජති. සබ්බෙසං චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරො ච නුප්පජ්ජති චිත්තසඞ්ඛාරො ච නුප්පජ්ජති.

(ඛ) යස්ස වා පන චිත්තසඞ්ඛාරො නුප්පජ්ජති තස්ස කායසඞ්ඛාරො නුප්පජ්ජතීති? ආමන්තා.

25. (ක) යස්ස වචීසඞ්ඛාරො නුප්පජ්ජති තස්ස චිත්තසඞ්ඛාරො නුප්පජ්ජතීති?

විනා විතක්කවිචාරෙහි චිත්තස්ස උප්පාදක්ඛණෙ තෙසං වචීසඞ්ඛාරො නුප්පජ්ජති, නො ච තෙසං චිත්තසඞ්ඛාරො නුප්පජ්ජති. සබ්බෙසං චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච නුප්පජ්ජති චිත්තසඞ්ඛාරො ච නුප්පජ්ජති.

(ඛ) යස්ස වා පන චිත්තසඞ්ඛාරො නුප්පජ්ජති තස්ස වචීසඞ්ඛාරො නුප්පජ්ජතීති? ආමන්තා.

(ඞ) පච්චනීකඔකාසො

26. (ක) යත්ථ කායසඞ්ඛාරො නුප්පජ්ජති තත්ථ වචීසඞ්ඛාරො නුප්පජ්ජතීති?

රූපාවචරෙ අරූපාවචරෙ තත්ථ කායසඞ්ඛාරො නුප්පජ්ජති, නො ච තත්ථ වචීසඞ්ඛාරො නුප්පජ්ජති. චතුත්ථජ්ඣානෙ අසඤ්ඤසත්තෙ තත්ථ කායසඞ්ඛාරො ච නුප්පජ්ජති වචීසඞ්ඛාරො ච නුප්පජ්ජති.

(ඛ) යත්ථ වා පන වචීසඞ්ඛාරො නුප්පජ්ජති තත්ථ කායසඞ්ඛාරො නුප්පජ්ජතීති?

දුතියජ්ඣානෙ තතියජ්ඣානෙ තත්ථ වචීසඞ්ඛාරො නුප්පජ්ජති, නො ච තත්ථ කායසඞ්ඛාරො නුප්පජ්ජති. චතුත්ථජ්ඣානෙ අසඤ්ඤසත්තෙ තත්ථ වචීසඞ්ඛාරො ච නුප්පජ්ජති කායසඞ්ඛාරො ච නුප්පජ්ජති.

(ක) යත්ථ කායසඞ්ඛාරො නුප්පජ්ජති තත්ථ චිත්තසඞ්ඛාරො නුප්පජ්ජතීති?

චතුත්ථජ්ඣානෙ රූපාවචරෙ අරූපාවචරෙ තත්ථ කායසඞ්ඛාරො නුප්පජ්ජති, නො ච තත්ථ චිත්තසඞ්ඛාරො නුප්පජ්ජති. අසඤ්ඤසත්තෙ තත්ථ කායසඞ්ඛාරො ච නුප්පජ්ජති චිත්තසඞ්ඛාරො ච නුප්පජ්ජති.

(ඛ) යත්ථ වා පන…පෙ…? ආමන්තා.

27. (ක) යත්ථ වචීසඞ්ඛාරො නුප්පජ්ජති තත්ථ චිත්තසඞ්ඛාරො නුප්පජ්ජතීති?

දුතියජ්ඣානෙ තතියජ්ඣානෙ චතුත්ථජ්ඣානෙ තත්ථ වචීසඞ්ඛාරො නුප්පජ්ජති, නො ච තත්ථ චිත්තසඞ්ඛාරො නුප්පජ්ජති. අසඤ්ඤසත්තෙ තත්ථ වචීසඞ්ඛාරො ච නුප්පජ්ජති චිත්තසඞ්ඛාරො ච නුප්පජ්ජති.

(ඛ) යත්ථ වා පන…පෙ…? ආමන්තා.

(ච) පච්චනීකපුග්ගලොකාසා

28. (ක) යස්ස යත්ථ කායසඞ්ඛාරො නුප්පජ්ජති තස්ස තත්ථ වචීසඞ්ඛාරො නුප්පජ්ජතීති?

විනා අස්සාසපස්සාසෙහි විතක්කවිචාරානං උප්පාදක්ඛණෙ තෙසං තත්ථ කායසඞ්ඛාරො නුප්පජ්ජති, නො ච තෙසං තත්ථ වචීසඞ්ඛාරො නුප්පජ්ජති. සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස උප්පාදක්ඛණෙ අසඤ්ඤසත්තානං තෙසං තත්ථ කායසඞ්ඛාරො ච නුප්පජ්ජති වචීසඞ්ඛාරො ච නුප්පජ්ජති.

(ඛ) යස්ස වා පන යත්ථ…පෙ…? ආමන්තා.

(යස්සකම්පි යස්සයත්ථකම්පි සදිසං විත්ථාරෙතබ්බං, යස්සයත්ථකෙ නිරොධසමාපන්නානන්ති න ලබ්භති.)