(4) පච්චුප්පන්නාතීතවාරො

(ක) අනුලොමපුග්ගලො

49. (ක) යස්ස කායසඞ්ඛාරො උප්පජ්ජති තස්ස වචීසඞ්ඛාරො උප්පජ්ජිත්ථාති? ආමන්තා.

(ඛ) යස්ස වා පන වචීසඞ්ඛාරො උප්පජ්ජිත්ථ තස්ස කායසඞ්ඛාරො උප්පජ්ජතීති?

සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො උප්පජ්ජිත්ථ, නො ච තෙසං කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං වචීසඞ්ඛාරො ච උප්පජ්ජිත්ථ කායසඞ්ඛාරො ච උප්පජ්ජති.

(ක) යස්ස කායසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජිත්ථාති? ආමන්තා.

(ඛ) යස්ස වා පන චිත්තසඞ්ඛාරො උප්පජ්ජිත්ථ තස්ස කායසඞ්ඛාරො උප්පජ්ජතීති?

සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං චිත්තසඞ්ඛාරො උප්පජ්ජිත්ථ, නො ච තෙසං කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං චිත්තසඞ්ඛාරො ච උප්පජ්ජිත්ථ කායසඞ්ඛාරො ච උප්පජ්ජති.

50. (ක) යස්ස වචීසඞ්ඛාරො උප්පජ්ජති තස්ස චිත්තසඞ්ඛාරො උප්පජ්ජිත්ථාති? ආමන්තා.

(ඛ) යස්ස වා පන චිත්තසඞ්ඛාරො උප්පජ්ජිත්ථ තස්ස වචීසඞ්ඛාරො උප්පජ්ජතීති?

සබ්බෙසං චිත්තස්ස භඞ්ගක්ඛණෙ විනා විතක්කවිචාරෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං චිත්තසඞ්ඛාරො උප්පජ්ජිත්ථ, නො ච තෙසං වචීසඞ්ඛාරො උප්පජ්ජති. විතක්කවිචාරානං උප්පාදක්ඛණෙ තෙසං චිත්තසඞ්ඛාරො ච උප්පජ්ජිත්ථ වචීසඞ්ඛාරො ච උප්පජ්ජති.

(ඛ) අනුලොමඔකාසො

51. යත්ථ කායසඞ්ඛාරො උප්පජ්ජති…පෙ….

(ග) අනුලොමපුග්ගලොකාසා

52. (ක) යස්ස යත්ථ කායසඞ්ඛාරො උප්පජ්ජති තස්ස තත්ථ වචීසඞ්ඛාරො උප්පජ්ජිත්ථාති?

දුතියජ්ඣානං තතියජ්ඣානං සමාපන්නානං අස්සාසපස්සාසානං උප්පාදක්ඛණෙ තෙසං තත්ථ කායසඞ්ඛාරො උප්පජ්ජති, නො ච තෙසං තත්ථ වචීසඞ්ඛාරො උප්පජ්ජිත්ථ. පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසං තත්ථ කායසඞ්ඛාරො ච උප්පජ්ජති වචීසඞ්ඛාරො ච උප්පජ්ජිත්ථ.

(ඛ) යස්ස වා පන යත්ථ වචීසඞ්ඛාරො උප්පජ්ජිත්ථ තස්ස තත්ථ කායසඞ්ඛාරො උප්පජ්ජතීති?

පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ තෙසංයෙව විනා අස්සාසපස්සාසෙහි චිත්තස්ස උප්පාදක්ඛණෙ රූපාවචරානං අරූපාවචරානං තෙසං තත්ථ වචීසඞ්ඛාරො උප්පජ්ජිත්ථ, නො ච තෙසං තත්ථ කායසඞ්ඛාරො උප්පජ්ජති. පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසං තත්ථ වචීසඞ්ඛාරො ච උප්පජ්ජිත්ථ කායසඞ්ඛාරො ච උප්පජ්ජති.

(ක) යස්ස යත්ථ කායසඞ්ඛාරො උප්පජ්ජති තස්ස තත්ථ චිත්තසඞ්ඛාරො උප්පජ්ජිත්ථාති? ආමන්තා.

(ඛ) යස්ස වා පන යත්ථ චිත්තසඞ්ඛාරො උප්පජ්ජිත්ථ තස්ස තත්ථ කායසඞ්ඛාරො උප්පජ්ජතීති?

සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි චිත්තස්ස උප්පාදක්ඛණෙ තෙසං තත්ථ චිත්තසඞ්ඛාරො උප්පජ්ජිත්ථ, නො ච තෙසං තත්ථ කායසඞ්ඛාරො උප්පජ්ජති. අස්සාසපස්සාසානං උප්පාදක්ඛණෙ තෙසං තත්ථ චිත්තසඞ්ඛාරො ච උප්පජ්ජිත්ථ කායසඞ්ඛාරො ච උප්පජ්ජති.

53. (ක) යස්ස යත්ථ වචීසඞ්ඛාරො උප්පජ්ජති තස්ස තත්ථ චිත්තසඞ්ඛාරො උප්පජ්ජිත්ථාති? ආමන්තා.

(ඛ) යස්ස වා පන යත්ථ චිත්තසඞ්ඛාරො උප්පජ්ජිත්ථ තස්ස තත්ථ වචීසඞ්ඛාරො උප්පජ්ජතීති?

සබ්බෙසං චිත්තස්ස භඞ්ගක්ඛණෙ විනා විතක්කවිචාරෙහි චිත්තස්ස උප්පාදක්ඛණෙ තෙසං තත්ථ චිත්තසඞ්ඛාරො උප්පජ්ජිත්ථ, නො ච තෙසං තත්ථ වචීසඞ්ඛාරො උප්පජ්ජති. විතක්කවිචාරානං උප්පාදක්ඛණෙ තෙසං තත්ථ චිත්තසඞ්ඛාරො ච උප්පජ්ජිත්ථ වචීසඞ්ඛාරො ච උප්පජ්ජති.

(ඝ) පච්චනීකපුග්ගලො

54. (ක) යස්ස කායසඞ්ඛාරො නුප්පජ්ජති තස්ස වචීසඞ්ඛාරො නුප්පජ්ජිත්ථාති? උප්පජ්ජිත්ථ.

(ඛ) යස්ස වා පන වචීසඞ්ඛාරො නුප්පජ්ජිත්ථ තස්ස කායසඞ්ඛාරො නුප්පජ්ජතීති? නත්ථි.

(ක) යස්ස කායසඞ්ඛාරො නුප්පජ්ජති තස්ස චිත්තසඞ්ඛාරො නුප්පජ්ජිත්ථාති? උප්පජ්ජිත්ථ.

(ඛ) යස්ස වා පන චිත්තසඞ්ඛාරො නුප්පජ්ජිත්ථ තස්ස කායසඞ්ඛාරො නුප්පජ්ජතීති? නත්ථි.

55. (ක) යස්ස වචීසඞ්ඛාරො නුප්පජ්ජති තස්ස චිත්තසඞ්ඛාරො නුප්පජ්ජිත්ථාති? උප්පජ්ජිත්ථ.

(ඛ) යස්ස වා පන…පෙ…? නත්ථි.

(ඞ) පච්චනීකඔකාසො

56. යත්ථ කායසඞ්ඛාරො නුප්පජ්ජති…පෙ….

(ච) පච්චනීකපුග්ගලොකාසා

57. (ක) යස්ස යත්ථ කායසඞ්ඛාරො නුප්පජ්ජති තස්ස තත්ථ වචීසඞ්ඛාරො නුප්පජ්ජිත්ථාති?

පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ තෙසංයෙව විනා අස්සාසපස්සාසෙහි චිත්තස්ස උප්පාදක්ඛණෙ රූපාවචරානං අරූපාවචරානං තෙසං තත්ථ කායසඞ්ඛාරො නුප්පජ්ජති, නො ච තෙසං තත්ථ වචීසඞ්ඛාරො නුප්පජ්ජිත්ථ. දුතියජ්ඣානං තතියජ්ඣානං සමාපන්නානං අස්සාසපස්සාසානං භඞ්ගක්ඛණෙ තෙසංයෙව විනා අස්සාසපස්සාසෙහි චිත්තස්ස උප්පාදක්ඛණෙ චතුත්ථජ්ඣානං සමාපන්නානං සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ කායසඞ්ඛාරො ච නුප්පජ්ජති වචීසඞ්ඛාරො ච නුප්පජ්ජිත්ථ.

(ඛ) යස්ස වා පන යත්ථ වචීසඞ්ඛාරො නුප්පජ්ජිත්ථ තස්ස තත්ථ කායසඞ්ඛාරො නුප්පජ්ජතීති?

දුතියජ්ඣානං තතියජ්ඣානං සමාපන්නානං අස්සාසපස්සාසානං උප්පාදක්ඛණෙ තෙසං තත්ථ වචීසඞ්ඛාරො නුප්පජ්ජිත්ථ, නො ච තෙසං තත්ථ කායසඞ්ඛාරො නුප්පජ්ජති. දුතියජ්ඣානං තතියජ්ඣානං සමාපන්නානං අස්සාසපස්සාසානං භඞ්ගක්ඛණෙ තෙසංයෙව විනා අස්සාසපස්සාසෙහි චිත්තස්ස උප්පාදක්ඛණෙ චතුත්ථජ්ඣානං සමාපන්නානං සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ වචීසඞ්ඛාරො ච නුප්පජ්ජිත්ථ කායසඞ්ඛාරො ච නුප්පජ්ජති.

(ක) යස්ස යත්ථ කායසඞ්ඛාරො නුප්පජ්ජති තස්ස තත්ථ චිත්තසඞ්ඛාරො නුප්පජ්ජිත්ථාති?

සබ්බෙසං චිත්තස්ස භඞ්ගක්ඛණෙ විනා අස්සාසපස්සාසෙහි චිත්තස්ස උප්පාදක්ඛණෙ තෙසං තත්ථ කායසඞ්ඛාරො නුප්පජ්ජති, නො ච තෙසං තත්ථ චිත්තසඞ්ඛාරො නුප්පජ්ජිත්ථ. සුද්ධාවාසං උපපජ්ජන්තානං අසඤ්ඤසත්තානං තෙසං තත්ථ කායසඞ්ඛාරො ච නුප්පජ්ජති චිත්තසඞ්ඛාරො ච නුප්පජ්ජිත්ථ.

(ඛ) යස්ස වා පන යත්ථ චිත්තසඞ්ඛාරො නුප්පජ්ජිත්ථ තස්ස තත්ථ කායසඞ්ඛාරො නුප්පජ්ජතීති? ආමන්තා.

58. (ක) යස්ස යත්ථ වචීසඞ්ඛාරො නුප්පජ්ජති තස්ස තත්ථ චිත්තසඞ්ඛාරො නුප්පජ්ජිත්ථාති?

සබ්බෙසං චිත්තස්ස භඞ්ගක්ඛණෙ විනා විතක්කවිචාරෙහි චිත්තස්ස උප්පාදක්ඛණෙ තෙසං තත්ථ වචීසඞ්ඛාරො නුප්පජ්ජති, නො ච තෙසං තත්ථ චිත්තසඞ්ඛාරො නුප්පජ්ජිත්ථ. සුද්ධාවාසං උපපජ්ජන්තානං අසඤ්ඤසත්තානං තෙසං තත්ථ වචීසඞ්ඛාරො ච නුප්පජ්ජති චිත්තසඞ්ඛාරො ච නුප්පජ්ජිත්ථ.

(ඛ) යස්ස වා පන යත්ථ…පෙ…? ආමන්තා.