1. පදසොධනවාරො

(ක) අනුලොමං

10. (ක) චක්ඛු චක්ඛුධාතූති?

දිබ්බචක්ඛු පඤ්ඤාචක්ඛු චක්ඛු, න චක්ඛුධාතු. චක්ඛුධාතු චක්ඛු චෙව චක්ඛුධාතු ච.

(ඛ) චක්ඛුධාතු චක්ඛූති? ආමන්තා.

(ක) සොතං සොතධාතූති?

දිබ්බසොතං තණ්හාසොතං සොතං, න සොතධාතු. සොතධාතු සොතඤ්චෙව සොතධාතු ච.

(ඛ) සොතධාතු සොතන්ති? ආමන්තා.

(ක) ඝානං ඝානධාතූති? ආමන්තා.

(ඛ) ඝානධාතු ඝානන්ති? ආමන්තා. (ජිව්හාපි ඝානධාතුසදිසා).

(ක) කායො කායධාතූති?

කායධාතුං ඨපෙත්වා අවසෙසො කායො [අවසෙසො කායො කායො (ස්‍යා.)], න කායධාතු. කායධාතු කායො චෙව කායධාතු ච.

(ඛ) කායධාතු කායොති? ආමන්තා.

(ක) රූපං රූපධාතූති?

රූපධාතුං ඨපෙත්වා අවසෙසං රූපං, න රූපධාතු. රූපධාතු රූපඤ්චෙව රූපධාතු ච.

(ඛ) රූපධාතු රූපන්ති? ආමන්තා. (සද්දො ඝානසදිසො).

(ක) ගන්ධො ගන්ධධාතූති?

සීලගන්ධො සමාධිගන්ධො පඤ්ඤාගන්ධො ගන්ධො, න ගන්ධධාතු. ගන්ධධාතු ගන්ධො චෙව ගන්ධධාතු ච.

(ඛ) ගන්ධධාතු ගන්ධොති? ආමන්තා.

(ක) රසො රසධාතූති?

අත්ථරසො ධම්මරසො විමුත්තිරසො රසො, න රසධාතු. රසධාතු රසො චෙව රසධාතු ච.

(ඛ) රසධාතු රසොති? ආමන්තා. (ඵොට්ඨබ්බො ඝානසදිසො).

(ක) චක්ඛුවිඤ්ඤාණං චක්ඛුවිඤ්ඤාණධාතූති? ආමන්තා.

(ඛ) චක්ඛුවිඤ්ඤාණධාතු චක්ඛුවිඤ්ඤාණන්ති? ආමන්තා.

සොතවිඤ්ඤාණං…පෙ… ඝානවිඤ්ඤාණං… ජිව්හාවිඤ්ඤාණං… කායවිඤ්ඤාණං….

(ක) මනො මනොධාතූති?

මනොධාතුං ඨපෙත්වා අවසෙසො මනො, න මනොධාතු. මනොධාතු මනො චෙව මනොධාතු ච.

(ඛ) මනොධාතු මනොති? ආමන්තා.

(ක) මනොවිඤ්ඤාණං මනොවිඤ්ඤාණධාතූති? ආමන්තා.

(ඛ) මනොවිඤ්ඤාණධාතු මනොවිඤ්ඤාණන්ති? ආමන්තා.

(ක) ධම්මො ධම්මධාතූති?

ධම්මධාතුං ඨපෙත්වා අවසෙසො ධම්මො, න ධම්මධාතු. ධම්මධාතු ධම්මො චෙව ධම්මධාතු ච.

(ඛ) ධම්මධාතු ධම්මොති? ආමන්තා.

(ඛ) පච්චනීකං

11. (ක) න චක්ඛු න චක්ඛුධාතූති? ආමන්තා.

(ඛ) න චක්ඛුධාතු න චක්ඛූති?

දිබ්බචක්ඛු පඤ්ඤාචක්ඛු න චක්ඛුධාතු, චක්ඛු. චක්ඛුඤ්ච චක්ඛුධාතුඤ්ච ඨපෙත්වා අවසෙසං න චෙව චක්ඛු න ච චක්ඛුධාතු.

(ක) න සොතං න සොතධාතූති? ආමන්තා.

(ඛ) න සොතධාතු න සොතන්ති?

දිබ්බසොතං තණ්හාසොතං න සොතධාතු, සොතං. සොතඤ්ච සොතධාතුඤ්ච ඨපෙත්වා අවසෙසං න චෙව සොතං න ච සොතධාතු.

(ක) න ඝානං න ඝානධාතූති? ආමන්තා.

(ඛ) න ඝානධාතු න ඝානන්ති? ආමන්තා.

න ජිව්හා… (සංඛිත්තං [යං සංඛිත්තං (ස්‍යා.)], උභතො ආමන්තා).

(ක) න කායො න කායධාතූති? ආමන්තා.

(ඛ) න කායධාතු න කායොති?

කායධාතුං ඨපෙත්වා අවසෙසො න කායධාතු, කායො. කායඤ්ච කායධාතුඤ්ච ඨපෙත්වා අවසෙසො [අවසෙසො කායො (ස්‍යා.)] න චෙව කායො න ච කායධාතු.

(ක) න රූපං න රූපධාතූති? ආමන්තා.

(ඛ) න රූපධාතු න රූපන්ති?

රූපධාතුං ඨපෙත්වා අවසෙසං න රූපධාතු, රූපං. රූපඤ්ච රූපධාතුඤ්ච ඨපෙත්වා අවසෙසං න චෙව රූපං න ච රූපධාතු.

න සද්දො…පෙ… න ගන්ධො න ගන්ධධාතූති? ආමන්තා.

න ගන්ධධාතු න ගන්ධොති?

සීලගන්ධො සමාධිගන්ධො පඤ්ඤාගන්ධො න ගන්ධධාතු, ගන්ධො. ගන්ධඤ්ච ගන්ධධාතුඤ්ච ඨපෙත්වා අවසෙසො න චෙව ගන්ධො න ච ගන්ධධාතු.

(ක) න රසො න රසධාතූති? ආමන්තා.

(ඛ) න රසධාතු න රසොති?

අත්ථරසො ධම්මරසො විමුත්තිරසො න රසධාතු, රසො. රසඤ්ච රසධාතුඤ්ච ඨපෙත්වා අවසෙසො න චෙව රසො න ච රසධාතු.

න ඵොට්ඨබ්බො…පෙ… න චක්ඛුවිඤ්ඤාණං න චක්ඛුවිඤ්ඤාණධාතූති? ආමන්තා.

න චක්ඛුවිඤ්ඤාණධාතු න චක්ඛුවිඤ්ඤාණන්ති? ආමන්තා.

න සොතවිඤ්ඤාණං…පෙ… න ඝානවිඤ්ඤාණං… න ජිව්හාවිඤ්ඤාණං… න කායවිඤ්ඤාණං….

(ක) න මනො න මනොධාතූති? ආමන්තා.

(ඛ) න මනොධාතු න මනොති?

මනොධාතුං ඨපෙත්වා අවසෙසො න මනොධාතු, මනො. මනඤ්ච මනොධාතුඤ්ච ඨපෙත්වා අවසෙසො න චෙව මනො න ච මනොධාතු.

(ක) න මනොවිඤ්ඤාණං න මනොවිඤ්ඤාණධාතූති? ආමන්තා.

(ඛ) න මනොවිඤ්ඤාණධාතු න මනොවිඤ්ඤාණන්ති? ආමන්තා.

(ක) න ධම්මො න ධම්මධාතූති? ආමන්තා.

(ඛ) න ධම්මධාතු න ධම්මොති?

ධම්මධාතුං ඨපෙත්වා අවසෙසො න ධම්මධාතු, ධම්මො. ධම්මඤ්ච ධම්මධාතුඤ්ච ඨපෙත්වා අවසෙසො න චෙව ධම්මො න ච ධම්මධාතු.