2. පදසොධනමූලචක්කවාරො
(ක) අනුලොමං
12. (ක) චක්ඛු චක්ඛුධාතූති?
දිබ්බචක්ඛු පඤ්ඤාචක්ඛු චක්ඛු, න චක්ඛුධාතු. චක්ඛුධාතු චක්ඛු චෙව චක්ඛුධාතු ච.
(ඛ) ධාතූ සොතධාතූති?
සොතධාතු ධාතු චෙව සොතධාතු ච. අවසෙසා ධාතූ [අවසෙසා ධාතූ ධාතූ (ස්‍යා.)] න සොතධාතු.
(ක) චක්ඛු චක්ඛුධාතූති?
දිබ්බචක්ඛු පඤ්ඤාචක්ඛු චක්ඛු, න චක්ඛුධාතු. චක්ඛුධාතු චක්ඛු චෙව චක්ඛුධාතු ච. ධාතූ ඝානධාතු…පෙ… ධාතූ ධම්මධාතූති?
ධම්මධාතු ධාතු චෙව ධම්මධාතු ච. අවසෙසා ධාතූ න ධම්මධාතු.
(යථා ආයතනයමකෙ පණ්ණත්ති එවං ධාතුයමකෙපි පණ්ණත්ති. චක්කං බන්ධිතබ්බං).
(ඛ) පච්චනීකං
13. (ක) න චක්ඛු න චක්ඛුධාතූති? ආමන්තා.
(ඛ) න ධාතූ න සොතධාතූති? ආමන්තා.
න චක්ඛු න චක්ඛුධාතූති? ආමන්තා.
න ධාතූ න ඝානධාතු…පෙ… න ධාතූ න ධම්මධාතූති? ආමන්තා.
(චක්කං බන්ධිතබ්බං, සබ්බෙ ආමන්තා උභතොපි සෙසෙපි).