(2) ලොකියදුකං

1044. පඤ්චන්නං ඛන්ධානං කති ලොකියා, කති ලොකුත්තරා? ද්වාදසන්නං ආයතනානං කති ලොකියා, කති ලොකුත්තරා? අට්ඨාරසන්නං ධාතූනං කති ලොකියා, කති ලොකුත්තරා? චතුන්නං සච්චානං කති ලොකියා, කති ලොකුත්තරා…පෙ… සත්තන්නං චිත්තානං කති ලොකියා, කති ලොකුත්තරා?

රූපක්ඛන්ධො ලොකියො. චත්තාරො ඛන්ධා සියා ලොකියා, සියා ලොකුත්තරා. දසායතනා ලොකියා. ද්වෙ ආයතනා සියා ලොකියා, සියා ලොකුත්තරා. සොළස ධාතුයො ලොකියා. ද්වෙ ධාතුයො සියා ලොකියා, සියා ලොකුත්තරා. ද්වෙ සච්චා ලොකියා. ද්වෙ සච්චා ලොකුත්තරා.

දසින්ද්‍රියා ලොකියා. තීණින්ද්‍රියා ලොකුත්තරා. නවින්ද්‍රියා සියා ලොකියා, සියා ලොකුත්තරා. තයො අකුසලහෙතූ ලොකියා. ඡ හෙතූ සියා ලොකියා, සියා ලොකුත්තරා. කබළීකාරො ආහාරො ලොකියො. තයො ආහාරා සියා ලොකියා, සියා ලොකුත්තරා. ඡ ඵස්සා ලොකියා. මනොවිඤ්ඤාණධාතුසම්ඵස්සො සියා ලොකියො, සියා ලොකුත්තරො. ඡ වෙදනා ලොකියා. මනොවිඤ්ඤාණධාතුසම්ඵස්සජා වෙදනා සියා ලොකියා, සියා ලොකුත්තරා. ඡ සඤ්ඤා ලොකියා. මනොවිඤ්ඤාණධාතුසම්ඵස්සජා සඤ්ඤා සියා ලොකියා, සියා ලොකුත්තරා. ඡ චෙතනා ලොකියා. මනොවිඤ්ඤාණධාතුසම්ඵස්සජා චෙතනා සියා ලොකියා, සියා ලොකුත්තරා. ඡ චිත්තා ලොකියා. මනොවිඤ්ඤාණධාතු සියා ලොකියා, සියා ලොකුත්තරාති.

අභිඤ්ඤා ද්වෙ සාරම්මණා, දිට්ඨා කුසලවෙදනා;

විපාකා ච උපාදින්නා, විතක්කං රූපලොකියාති.

ධම්මහදයවිභඞ්ගො නිට්ඨිතො.

විභඞ්ගපකරණං නිට්ඨිතං.