(7) අට්ඨ අසඤ්ඤීවාදා

958. තත්ථ කතමෙ අට්ඨ අසඤ්ඤීවාදා? ‘‘රූපී අත්තා හොති අරොගො පරං මරණා’’ති – අසඤ්ඤීති නං පඤ්ඤපෙන්ති; අරූපී අත්තා…පෙ… රූපී ච අරූපී ච…පෙ… නෙවරූපීනාරූපී…පෙ… ‘‘අන්තවා අත්තා හොති අරොගො පරං මරණා’’ති – අසඤ්ඤීති නං පඤ්ඤපෙන්ති; ‘‘අනන්තවා අත්තා හොති අරොගො පරං මරණා’’ති – අසඤ්ඤීති නං පඤ්ඤපෙන්ති; ‘‘අන්තවා ච අනන්තවා ච අත්තා හොති අරොගො පරං මරණා’’ති – අසඤ්ඤීති නං පඤ්ඤපෙන්ති; ‘‘නෙවන්තවා නානන්තවා අත්තා හොති අරොගො පරං මරණා’’ති – අසඤ්ඤීති නං පඤ්ඤපෙන්ති. ඉමෙ අට්ඨ අසඤ්ඤීවාදා.