(5) තීණි දුච්චරිතානි
913. තත්ථ කතමානි තීණි දුච්චරිතානි? කායදුච්චරිතං, වචීදුච්චරිතං, මනොදුච්චරිතං.
(ක) තත්ථ කතමං කායදුච්චරිතං? පාණාතිපාතො, අදින්නාදානං, කාමෙසුමිච්ඡාචාරො – ඉදං වුච්චති ‘‘කායදුච්චරිතං’’.
(ඛ) තත්ථ කතමං වචීදුච්චරිතං? මුසාවාදො, පිසුණා වාචා, ඵරුසා වාචා, සම්ඵප්පලාපො – ඉදං වුච්චති ‘‘වචීදුච්චරිතං’’.
(ග) තත්ථ කතමං මනොදුච්චරිතං? අභිජ්ඣා, බ්‍යාපාදො, මිච්ඡාදිට්ඨි – ඉදං වුච්චති ‘‘මනොදුච්චරිතං’’.
(ක-ග) තත්ථ කතමං කායදුච්චරිතං? අකුසලං කායකම්මං කායදුච්චරිතං, අකුසලං වචීකම්මං වචීදුච්චරිතං, අකුසලං මනොකම්මං මනොදුච්චරිතං.
තත්ථ කතමං අකුසලං කායකම්මං? අකුසලා කායසඤ්චෙතනා අකුසලං කායකම්මං, අකුසලා වචීසඤ්චෙතනා අකුසලං වචීකම්මං, අකුසලා මනොසඤ්චෙතනා අකුසලං මනොකම්මං. ඉමානි තීණි දුච්චරිතානි.