(33. ක) අරියානං අදස්සනකම්‍යතා
934. තත්ථ කතමා අරියානං අදස්සනකම්‍යතා? තත්ථ කතමෙ අරියා? අරියා වුච්චන්ති බුද්ධා ච බුද්ධසාවකා ච. යා ඉමෙසං අරියානං අදස්සනකම්‍යතා අදට්ඨුකම්‍යතා අසමෙතුකම්‍යතා අසමාගන්තුකම්‍යතා – අයං වුච්චති ‘‘අරියානං අදස්සනකම්‍යතා’’.
(ඛ) සද්ධම්මං අසොතුකම්‍යතා
තත්ථ කතමා සද්ධම්මං අසොතුකම්‍යතා? තත්ථ කතමො සද්ධම්මො? චත්තාරො සතිපට්ඨානා, චත්තාරො සම්මප්පධානා, චත්තාරො ඉද්ධිපාදා, පඤ්චින්ද්‍රියානි, පඤ්ච බලානි, සත්ත බොජ්ඣඞ්ගා, අරියො අට්ඨඞ්ගිකො මග්ගො – අයං වුච්චති ‘‘සද්ධම්මො’’. යා ඉමස්ස සද්ධම්මස්ස අසොතුකම්‍යතා අසවනකම්‍යතා අනුග්ගහෙතුකම්‍යතා අධාරෙතුකම්‍යතා – අයං වුච්චති ‘‘සද්ධම්මං අසොතුකම්‍යතා’’.
(ග) උපාරම්භචිත්තතා
තත්ථ කතමා උපාරම්භචිත්තතා? තත්ථ කතමො උපාරම්භො? යො උපාරම්භො අනුපාරම්භො උපාරම්භනා අනුපාරම්භනා අනුපාරම්භිතත්තං උඤ්ඤා අවඤ්ඤා පරිභවො රන්ධගවෙසිතා – අයං වුච්චති ‘‘උපාරම්භචිත්තතා’’.