(13) තීණි භයානි
921. තත්ථ කතමානි තීණි භයානි? ජාතිභයං, ජරාභයං, මරණභයං.
(ක) තත්ථ කතමං ජාතිභයං? ජාතිං පටිච්ච භයං භයානකං ඡම්භිතත්තං ලොමහංසො චෙතසො උත්රාසො – ඉදං වුච්චති ‘‘ජාතිභයං’’.
(ඛ) තත්ථ කතමං ජරාභයං? ජරං පටිච්ච භයං භයානකං ඡම්භිතත්තං ලොමහංසො චෙතසො උත්රාසො – ඉදං වුච්චති ‘‘ජරාභයං’’.
(ග) තත්ථ කතමං මරණභයං? මරණං පටිච්ච භයං භයානකං ඡම්භිතත්තං ලොමහංසො චෙතසො උත්රාසො – ඉදං වුච්චති ‘‘මරණභයං’’. ඉමානි තීණි භයානි.