(14) අසාඛල්‍යඤ්ච අප්පටිසන්ථාරො ච
904. (ක) තත්ථ කතමං අසාඛල්‍යං? යා සා වාචා කණ්ඩකා කක්කසා පරකටුකා පරාභිසජ්ජනී කොධසාමන්තා අසමාධිසංවත්තනිකා තථාරූපිං වාචං භාසිතා හොති. යා තත්ථ අසණ්හවාචතා අසඛිලවාචතා ඵරුසවාචතා – ඉදං වුච්චති ‘‘අසාඛල්‍යං’’.
(ඛ) තත්ථ කතමො අප්පටිසන්ථාරො [අප්පටිසන්ධාරො (ක.)]? ද්වෙ පටිසන්ථාරා – ආමිසපටිසන්ථාරො ච ධම්මපටිසන්ථාරො ච. ඉධෙකච්චො අප්පටිසන්ථාරකො හොති ආමිසපටිසන්ථාරෙන වා ධම්මපටිසන්ථාරෙන වා – අයං වුච්චති ‘‘අප්පටිසන්ථාරො’’.