1-7. පටිච්චවාරාදි

පච්චයචතුක්කං

72. විපාකධම්මධම්මං සරණං ධම්මං පටිච්ච විපාකධම්මධම්මො සරණො ධම්මො උප්පජ්ජති හෙතුපච්චයා (සංඛිත්තං).

හෙතුයා එකං…පෙ… අවිගතෙ එකං (සංඛිත්තං).

(සහජාතවාරෙපි…පෙ… පඤ්හාවාරෙපි සබ්බත්ථ එකං.)

73. විපාකං අරණං ධම්මං පටිච්ච විපාකො අරණො ධම්මො උප්පජ්ජති හෙතුපච්චයා… තීණි.

විපාකධම්මධම්මං අරණං ධම්මං පටිච්ච විපාකධම්මධම්මො අරණො ධම්මො උප්පජ්ජති හෙතුපච්චයා… තීණි.

නෙවවිපාකනවිපාකධම්මධම්මං අරණං ධම්මං පටිච්ච නෙවවිපාකනවිපාකධම්මධම්මො අරණො ධම්මො උප්පජ්ජති හෙතුපච්චයා… තීණි.

විපාකං අරණඤ්ච නෙවවිපාකනවිපාකධම්මධම්මං අරණඤ්ච ධම්මං පටිච්ච විපාකො අරණො ධම්මො උප්පජ්ජති හෙතුපච්චයා… තීණි.

විපාකධම්මධම්මං අරණඤ්ච නෙවවිපාකනවිපාකධම්මධම්මං අරණඤ්ච ධම්මං පටිච්ච නෙවවිපාකනවිපාකධම්මධම්මො අරණො ධම්මො උප්පජ්ජති හෙතුපච්චයා. (1) (සංඛිත්තං.)

74. හෙතුයා තෙරස, ආරම්මණෙ පඤ්ච…පෙ… අවිගතෙ තෙරස (සංඛිත්තං. සහජාතවාරම්පි…පෙ… සම්පයුත්තවාරම්පි පටිච්චවාරසදිසං).

75. විපාකො අරණො ධම්මො විපාකස්ස අරණස්ස ධම්මස්ස හෙතුපච්චයෙන පච්චයො… තීණි.

විපාකධම්මධම්මො අරණො ධම්මො විපාකධම්මධම්මස්ස අරණස්ස ධම්මස්ස හෙතුපච්චයෙන පච්චයො… තීණි.

නෙවවිපාකනවිපාකධම්මධම්මො අරණො ධම්මො නෙවවිපාකනවිපාකධම්මධම්මස්ස අරණස්ස ධම්මස්ස හෙතුපච්චයෙන පච්චයො. (1) (සංඛිත්තං.)

76. හෙතුයා සත්ත, ආරම්මණෙ නව…පෙ… අවිගතෙ තෙරස (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)