1-6. පටිච්චවාරාදි

පච්චයචතුක්කං

හෙතුපච්චයො

194. හෙතුං අසංකිලිට්ඨසංකිලෙසිකං ධම්මං පටිච්ච හෙතු අසංකිලිට්ඨසංකිලෙසිකො ධම්මො උප්පජ්ජති හෙතුපච්චයා… තීණි.

නහෙතුං අසංකිලිට්ඨසංකිලෙසිකං ධම්මං පටිච්ච නහෙතු අසංකිලිට්ඨසංකිලෙසිකො ධම්මො උප්පජ්ජති හෙතුපච්චයා… තීණි.

හෙතුං අසංකිලිට්ඨසංකිලෙසිකඤ්ච නහෙතුං අසංකිලිට්ඨසංකිලෙසිකඤ්ච ධම්මං පටිච්ච හෙතු අසංකිලිට්ඨසංකිලෙසිකො ධම්මො උප්පජ්ජති හෙතුපච්චයා… තීණි (සංඛිත්තං).

195. හෙතුයා නව, ආරම්මණෙ නව, අධිපතියා නව…පෙ… අවිගතෙ නව (සංඛිත්තං).

නහෙතුපච්චයො

196. නහෙතු අසංකිලිට්ඨසංකිලෙසිකං ධම්මං පටිච්ච නහෙතු අසංකිලිට්ඨසංකිලෙසිකො ධම්මො උප්පජ්ජති නහෙතුපච්චයා (සංඛිත්තං).

197. නහෙතුයා එකං, නආරම්මණෙ තීණි, නඅධිපතියා නව, නඅනන්තරෙ තීණි, නසමනන්තරෙ තීණි, නඅඤ්ඤමඤ්ඤෙ තීණි, නඋපනිස්සයෙ තීණි, නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ තීණි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ එකං, නසම්පයුත්තෙ තීණි, නවිප්පයුත්තෙ නව, නොනත්ථියා තීණි, නොවිගතෙ තීණි (සංඛිත්තං).

හෙතුපච්චයා නආරම්මණෙ තීණි (සංඛිත්තං).

නහෙතුපච්චයා ආරම්මණෙ එකං (සංඛිත්තං).

(සහජාතවාරොපි පච්චයවාරොපි නිස්සයවාරොපි සංසට්ඨවාරොපි සම්පයුත්තවාරොපි පටිච්චවාරසදිසා විත්ථාරෙතබ්බා.)