1-6. පටිච්චවාරාදි

පච්චයචතුක්කං

හෙතුපච්චයො

121. හෙතුං විපාකධම්මධම්මං පටිච්ච හෙතු විපාකධම්මධම්මො උප්පජ්ජති හෙතුපච්චයා. හෙතුං විපාකධම්මධම්මං පටිච්ච නහෙතු විපාකධම්මධම්මො උප්පජ්ජති හෙතුපච්චයා. හෙතුං විපාකධම්මධම්මං පටිච්ච හෙතු විපාකධම්මධම්මො ච නහෙතු විපාකධම්මධම්මො ච ධම්මා උප්පජ්ජන්ති හෙතුපච්චයා. (3)

නහෙතුං විපාකධම්මධම්මං පටිච්ච නහෙතු විපාකධම්මධම්මො උප්පජ්ජති හෙතුපච්චයා… තීණි.

හෙතුං විපාකධම්මධම්මඤ්ච නහෙතුං විපාකධම්මධම්මඤ්ච පටිච්ච හෙතු විපාකධම්මධම්මො උප්පජ්ජති හෙතුපච්චයා… තීණි (සංඛිත්තං).

122. හෙතුයා නව, ආරම්මණෙ නව, අධිපතියා නව…පෙ… කම්මෙ නව, ආහාරෙ නව, ඉන්ද්‍රියෙ නව, ඣානෙ නව, මග්ගෙ නව, සම්පයුත්තෙ නව, විප්පයුත්තෙ නව, අත්ථියා නව, නත්ථියා නව, විගතෙ නව, අවිගතෙ නව.

නහෙතු-නඅධිපතිපච්චයා

123. නහෙතුං විපාකධම්මධම්මං පටිච්ච හෙතු විපාකධම්මධම්මො උප්පජ්ජති නහෙතුපච්චයා. (1)

124. හෙතුං විපාකධම්මධම්මං පටිච්ච හෙතු විපාකධම්මධම්මො උප්පජ්ජති නඅධිපතිපච්චයා… නව.

නපුරෙජාතපච්චයාදි

125. හෙතුං විපාකධම්මධම්මං පටිච්ච හෙතු විපාකධම්මධම්මො උප්පජ්ජති නපුරෙජාතපච්චයා… නව… නපච්ඡාජාතපච්චයා… නව… නආසෙවනපච්චයා… නව.

126. හෙතුං විපාකධම්මධම්මං පටිච්ච නහෙතු විපාකධම්මධම්මො උප්පජ්ජති නකම්මපච්චයා. (1)

නහෙතුං විපාකධම්මධම්මං පටිච්ච නහෙතු විපාකධම්මධම්මො උප්පජ්ජති නකම්මපච්චයා. (1)

හෙතුං විපාකධම්මධම්මඤ්ච නහෙතුං විපාකධම්මධම්මඤ්ච පටිච්ච නහෙතු විපාකධම්මධම්මො උප්පජ්ජති නකම්මපච්චයා. (1) (සංඛිත්තං.)

127. නහෙතුයා එකං, නඅධිපතියා නව, නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ තීණි, නවිපාකෙ නව, නවිප්පයුත්තෙ නව (සංඛිත්තං, පච්චනීයං).

හෙතුපච්චයා නඅධිපතියා නව (සංඛිත්තං, අනුලොමපච්චනීයං).

නහෙතුපච්චයා ආරම්මණෙ එකං (සංඛිත්තං, පච්චනීයානුලොමං).

(සහජාතවාරොපි පච්චයවාරොපි නිස්සයවාරොපි සංසට්ඨවාරොපි සම්පයුත්තවාරොපි පටිච්චවාරසදිසා විත්ථාරෙතබ්බා.)