1-6. පටිච්චවාරාදි

පච්චයචතුක්කං

හෙතුපච්චයො

545. හෙතුං අනිදස්සනඅප්පටිඝං ධම්මං පටිච්ච හෙතු අනිදස්සනඅප්පටිඝො ධම්මො උප්පජ්ජති හෙතුපච්චයා… තීණි.

නහෙතුං අනිදස්සනඅප්පටිඝං ධම්මං පටිච්ච නහෙතු අනිදස්සනඅප්පටිඝො ධම්මො උප්පජ්ජති හෙතුපච්චයා… තීණි.

හෙතුං අනිදස්සනඅප්පටිඝඤ්ච නහෙතුං අනිදස්සනඅප්පටිඝඤ්ච ධම්මං පටිච්ච හෙතු අනිදස්සනඅප්පටිඝො ධම්මො උප්පජ්ජති හෙතුපච්චයා… තීණි (සංඛිත්තං).

546. හෙතුයා නව, ආරම්මණෙ නව…පෙ… කම්මෙ නව, විපාකෙ නව, ආහාරෙ නව…පෙ… අවිගතෙ නව (සංඛිත්තං).

නහෙතු-නඅධිපතිපච්චයා

547. නහෙතුං අනිදස්සනඅප්පටිඝං ධම්මං පටිච්ච නහෙතු අනිදස්සනඅප්පටිඝො ධම්මො උප්පජ්ජති නහෙතුපච්චයා. නහෙතුං අනිදස්සනඅප්පටිඝං ධම්මං පටිච්ච හෙතු අනිදස්සනඅප්පටිඝො ධම්මො උප්පජ්ජති නහෙතුපච්චයා. (2)

හෙතුං අනිදස්සනඅප්පටිඝං ධම්මං පටිච්ච නහෙතු අනිදස්සනඅප්පටිඝො ධම්මො උප්පජ්ජති නආරම්මණපච්චයා… තීණි.

හෙතුං අනිදස්සනඅප්පටිඝං ධම්මං පටිච්ච හෙතු අනිදස්සනඅප්පටිඝො ධම්මො උප්පජ්ජති නඅධිපතිපච්චයා (සංඛිත්තං).

548. නහෙතුයා ද්වෙ, නආරම්මණෙ තීණි, නඅධිපතියා නව…පෙ… නපුරෙජාතෙ නව, නපච්ඡාජාතෙ නව, නආසෙවනෙ නව, නකම්මෙ තීණි, නවිපාකෙ නව, නආහාරෙ එකං, නඉන්ද්‍රියෙ එකං, නඣානෙ එකං, නමග්ගෙ එකං, නසම්පයුත්තෙ තීණි, නවිප්පයුත්තෙ නව, නොනත්ථියා තීණි, නොවිගතෙ තීණි (සංඛිත්තං).

හෙතුපච්චයා නආරම්මණෙ තීණි (සංඛිත්තං).

නහෙතුපච්චයා ආරම්මණෙ ද්වෙ (සංඛිත්තං).

(සහජාතවාරොපි පච්චයවාරොපි නිස්සයවාරොපි සංසට්ඨවාරොපි සම්පයුත්තවාරොපි පටිච්චවාරසදිසා විත්ථාරෙතබ්බා.)