7. පඤ්හාවාරො

පච්චයචතුක්කං

හෙතුපච්චයාදි

99. හෙතු අදුක්ඛමසුඛාය වෙදනාය සම්පයුත්තො ධම්මො හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස හෙතුපච්චයෙන පච්චයො… තීණි.

100. හෙතු අදුක්ඛමසුඛාය වෙදනාය සම්පයුත්තො ධම්මො හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො… නව.

101. හෙතු අදුක්ඛමසුඛාය වෙදනාය සම්පයුත්තො ධම්මො හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි.

නහෙතු අදුක්ඛමසුඛාය වෙදනාය සම්පයුත්තො ධම්මො නහෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි.

හෙතු අදුක්ඛමසුඛාය වෙදනාය සම්පයුත්තො ච නහෙතු අදුක්ඛමසුඛාය වෙදනාය සම්පයුත්තො ච ධම්මා හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස අධිපතිපච්චයෙන පච්චයො – ආරම්මණාධිපති… තීණි (ආරම්මණාධිපතියෙව)…පෙ….

උපනිස්සයපච්චයාදි

102. හෙතු අදුක්ඛමසුඛාය වෙදනාය සම්පයුත්තො ධම්මො හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො… නව, ආසෙවනපච්චයෙන පච්චයො… නව.

103. නහෙතු අදුක්ඛමසුඛාය වෙදනාය සම්පයුත්තො ධම්මො නහෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස කම්මපච්චයෙන පච්චයො… තීණි.

104. හෙතු අදුක්ඛමසුඛාය වෙදනාය සම්පයුත්තො ධම්මො හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස විපාකපච්චයෙන පච්චයො… නව…පෙ… අවිගතපච්චයෙන පච්චයො… නව.

105. හෙතුයා තීණි, ආරම්මණෙ නව, අධිපතියා නව, අනන්තරෙ නව, සමනන්තරෙ නව, සහජාතෙ නව, අඤ්ඤමඤ්ඤෙ නව, නිස්සයෙ නව, උපනිස්සයෙ නව, ආසෙවනෙ නව, කම්මෙ තීණි, විපාකෙ නව, ආහාරෙ තීණි, ඉන්ද්‍රියෙ නව, ඣානෙ තීණි, මග්ගෙ නව, සම්පයුත්තෙ නව, අත්ථියා නව, නත්ථියා නව, විගතෙ නව, අවිගතෙ නව (අනුලොමං).

පච්චනීයුද්ධාරො

106. හෙතු අදුක්ඛමසුඛාය වෙදනාය සම්පයුත්තො ධම්මො හෙතුස්ස අදුක්ඛමසුඛාය වෙදනාය සම්පයුත්තස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො (සංඛිත්තං).

107. නහෙතුයා නව, නආරම්මණෙ නව (සංඛිත්තං, පච්චනීයං).

හෙතුපච්චයා නආරම්මණෙ තීණි (සංඛිත්තං, අනුලොමපච්චනීයං).

නහෙතුපච්චයා ආරම්මණෙ නව (සංඛිත්තං, පච්චනීයානුලොමං).

(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං.)

හෙතුදුකවෙදනාත්තිකං නිට්ඨිතං.