7. පඤ්හාවාරො

පච්චයචතුක්කං

හෙතු-උපනිස්සයපච්චයා

477. හෙතු උප්පන්නො ධම්මො හෙතුස්ස උප්පන්නස්ස ධම්මස්ස හෙතුපච්චයෙන පච්චයො… තීණි.

නහෙතු උප්පන්නො ධම්මො නහෙතුස්ස උප්පන්නස්ස ධම්මස්ස ආරම්මණපච්චයෙන පච්චයො… තීණි.

හෙතු උප්පන්නො ධම්මො හෙතුස්ස උප්පන්නස්ස ධම්මස්ස අධිපතිපච්චයෙන පච්චයො – සහජාතාධිපති… තීණි.

නහෙතු උප්පන්නො ධම්මො නහෙතුස්ස උප්පන්නස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති… තීණි.

හෙතු උප්පන්නො ධම්මො හෙතුස්ස උප්පන්නස්ස ධම්මස්ස සහජාතපච්චයෙන පච්චයො (සංඛිත්තං).

නහෙතු උප්පන්නො ධම්මො නහෙතුස්ස උප්පන්නස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, පකතූපනිස්සයො…පෙ…. පකතූපනිස්සයො – උප්පන්නං උතුං උපනිස්සාය ඣානං උප්පාදෙති, විපස්සනං… මග්ගං… අභිඤ්ඤං… සමාපත්තිං උප්පාදෙති (සංඛිත්තං).

478. හෙතුයා තීණි, ආරම්මණෙ තීණි, අධිපතියා ඡ, සහජාතෙ නව, අඤ්ඤමඤ්ඤෙ නව, නිස්සයෙ නව, උපනිස්සයෙ තීණි, පුරෙජාතෙ තීණි, පච්ඡාජාතෙ තීණි, කම්මෙ තීණි, විපාකෙ නව, ආහාරෙ තීණි, ඉන්ද්‍රියෙ නව, ඣානෙ තීණි, මග්ගෙ නව, සම්පයුත්තෙ නව, විප්පයුත්තෙ පඤ්ච, අත්ථියා නව, අවිගතෙ නව (සංඛිත්තං).

පච්චනීයුද්ධාරො

479. හෙතු උප්පන්නො ධම්මො හෙතුස්ස උප්පන්නස්ස ධම්මස්ස සහජාතපච්චයෙන පච්චයො (සංඛිත්තං).

480. නහෙතුයා නව, නආරම්මණෙ නව (සංඛිත්තං).

හෙතුපච්චයා නආරම්මණෙ තීණි (සංඛිත්තං).

නහෙතුපච්චයා ආරම්මණෙ තීණි (සංඛිත්තං).

(යථා කුසලත්තිකෙ පඤ්හාවාරස්ස අනුලොමම්පි පච්චනීයම්පි අනුලොමපච්චනීයම්පි පච්චනීයානුලොමම්පි ගණිතං, එවං ගණෙතබ්බං. ඉමම්හි දුකතිකෙ පටිච්චවාරම්පි සහජාතවාරම්පි පච්චයවාරම්පි නිස්සයවාරම්පි සංසට්ඨවාරම්පි සම්පයුත්තවාරම්පි අනුප්පන්නම්පි උප්පාදීපි නත්ථි.)

හෙතුදුකඋප්පන්නත්තිකං නිට්ඨිතං.