1-6. පටිච්චවාරාදි

පච්චයචතුක්කං

හෙතු-ආරම්මණපච්චයා

429. හෙතුං මිච්ඡත්තනියතං ධම්මං පටිච්ච හෙතු මිච්ඡත්තනියතො ධම්මො උප්පජ්ජති හෙතුපච්චයා… තීණි.

නහෙතුං මිච්ඡත්තනියතං ධම්මං පටිච්ච නහෙතු මිච්ඡත්තනියතො ධම්මො උප්පජ්ජති හෙතුපච්චයා… තීණි.

හෙතුං මිච්ඡත්තනියතඤ්ච නහෙතුං මිච්ඡත්තනියතඤ්ච ධම්මං පටිච්ච හෙතු මිච්ඡත්තනියතො ධම්මො උප්පජ්ජති හෙතුපච්චයා… තීණි.

හෙතුං මිච්ඡත්තනියතං ධම්මං පටිච්ච හෙතු මිච්ඡත්තනියතො ධම්මො උප්පජ්ජති ආරම්මණපච්චයා (සංඛිත්තං).

430. හෙතුයා නව, ආරම්මණෙ නව, අධිපතියා නව, අනන්තරෙ නව, සමනන්තරෙ නව, සහජාතෙ නව, අඤ්ඤමඤ්ඤෙ නව, නිස්සයෙ නව, උපනිස්සයෙ නව, පුරෙජාතෙ නව, ආසෙවනෙ නව, කම්මෙ නව, ආහාරෙ නව…පෙ… අවිගතෙ නව (සංඛිත්තං).

නඅධිපතිපච්චයො

431. හෙතුං මිච්ඡත්තනියතං ධම්මං පටිච්ච නහෙතු මිච්ඡත්තනියතො ධම්මො උප්පජ්ජති නඅධිපතිපච්චයා (සංඛිත්තං).

432. නඅධිපතියා තීණි, නපච්ඡාජාතෙ නව, නකම්මෙ තීණි, නවිපාකෙ නව (සංඛිත්තං).

හෙතුපච්චයා නඅධිපතියා තීණි (සංඛිත්තං).

නඅධිපතිපච්චයා හෙතුයා තීණි (සංඛිත්තං).

(සහජාතවාරොපි පච්චයවාරොපි නිස්සයවාරොපි සංසට්ඨවාරොපි සම්පයුත්තවාරොපි පටිච්චවාරසදිසා විත්ථාරෙතබ්බා.)