1. විභඞ්ගවාරො

හෙතුපච්චයො

279. අරූපාවචරො ධම්මො අරූපාවචරස්ස ධම්මස්ස හෙතුපච්චයෙන පච්චයො – අරූපාවචරා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං.) අරූපාවචරා හෙතූ චිත්තසමුට්ඨානානං රූපානං හෙතුපච්චයෙන පච්චයො. (මූලං කාතබ්බං.) අරූපාවචරා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

නඅරූපාවචරො ධම්මො නඅරූපාවචරස්ස ධම්මස්ස හෙතුපච්චයෙන පච්චයො – නඅරූපාවචරා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

ආරම්මණපච්චයො

280. අරූපාවචරො ධම්මො අරූපාවචරස්ස ධම්මස්ස ආරම්මණපච්චයෙන පච්චයො – ආකාසානඤ්චායතනං විඤ්ඤාණඤ්චායතනස්ස ආරම්මණපච්චයෙන පච්චයො; ආකිඤ්චඤ්ඤායතනං නෙවසඤ්ඤානාසඤ්ඤායතනස්ස ආරම්මණපච්චයෙන පච්චයො. අරූපාවචරො ධම්මො නඅරූපාවචරස්ස ධම්මස්ස ආරම්මණපච්චයෙන පච්චයො – ආකාසානඤ්චායතනං පච්චවෙක්ඛති, විඤ්ඤාණඤ්චායතනං…පෙ… ආකිඤ්චඤ්ඤායතනං…පෙ… නෙවසඤ්ඤානාසඤ්ඤායතනං පච්චවෙක්ඛති, අරූපාවචරෙ ඛන්ධෙ අනිච්චතො…පෙ… දොමනස්සං උප්පජ්ජති; චෙතොපරියඤාණෙන අරූපාවචරචිත්තසමඞ්ගිස්ස චිත්තං ජානාති, අරූපාවචරා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

නඅරූපාවචරො ධම්මො නඅරූපාවචරස්ස ධම්මස්ස ආරම්මණපච්චයෙන පච්චයො – දානං…පෙ… සීලං…පෙ… උපොසථකම්මං කත්වා තං පච්චවෙක්ඛති අස්සාදෙති අභිනන්දති, තං ආරබ්භ රාගො…පෙ… දොමනස්සං උප්පජ්ජති; පුබ්බෙ සුචිණ්ණානි…පෙ… ඣානා…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති, නිබ්බානං පච්චවෙක්ඛන්ති, නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො; අරියා පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ…පෙ… පුබ්බෙ…පෙ… චක්ඛුං…පෙ… වත්ථුං නඅරූපාවචරෙ ඛන්ධෙ අනිච්චතො…පෙ… දොමනස්සං උප්පජ්ජති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන නඅරූපාවචරචිත්තසමඞ්ගිස්ස චිත්තං ජානාති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… නඅරූපාවචරා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

අධිපතිපච්චයො

281. අරූපාවචරො ධම්මො අරූපාවචරස්ස ධම්මස්ස අධිපතිපච්චයෙන පච්චයො. සහජාතාධිපති – අරූපාවචරාධිපති සම්පයුත්තකානං ඛන්ධානං අධිපතිපච්චයෙන පච්චයො. අරූපාවචරො ධම්මො නඅරූපාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – ආකාසානඤ්චායතනං ගරුං කත්වා පච්චවෙක්ඛති…පෙ… නෙවසඤ්ඤානාසඤ්ඤායතනං ගරුං කත්වා පච්චවෙක්ඛති, අරූපාවචරෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – අරූපාවචරාධිපති චිත්තසමුට්ඨානානං රූපානං අධිපතිපච්චයෙන පච්චයො. (මූලං කාතබ්බං.) අරූපාවචරාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

282. නඅරූපාවචරො ධම්මො නඅරූපාවචරස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං…පෙ… සීලං…පෙ… උපොසථකම්මං කත්වා තං ගරුං කත්වා පච්චවෙක්ඛති අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති; පුබ්බෙ සුචිණ්ණානි…පෙ… ඣානා…පෙ… අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලං…පෙ… නිබ්බානං ගරුං කත්වා පච්චවෙක්ඛන්ති, නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං නඅරූපාවචරෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – නඅරූපාවචරාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

අනන්තරපච්චයාදි

283. අරූපාවචරො ධම්මො අරූපාවචරස්ස ධම්මස්ස අනන්තරපච්චයෙන පච්චයො – පුරිමා පුරිමා අරූපාවචරා ඛන්ධා පච්ඡිමානං පච්ඡිමානං අරූපාවචරානං ඛන්ධානං අනන්තරපච්චයෙන පච්චයො. අරූපාවචරො ධම්මො නඅරූපාවචරස්ස ධම්මස්ස අනන්තරපච්චයෙන පච්චයො – අරූපාවචරං චුතිචිත්තං නඅරූපාවචරස්ස උපපත්තිචිත්තස්ස, අරූපාවචරං භවඞ්ගං ආවජ්ජනාය, අරූපාවචරා ඛන්ධා නඅරූපාවචරස්ස වුට්ඨානස්ස, නිරොධා වුට්ඨහන්තස්ස නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (2)

284. නඅරූපාවචරො ධම්මො නඅරූපාවචරස්ස ධම්මස්ස අනන්තරපච්චයෙන පච්චයො – පුරිමා පුරිමා නඅරූපාවචරා ඛන්ධා පච්ඡිමානං පච්ඡිමානං නඅරූපාවචරානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස…පෙ… අනුලොමං ඵලසමාපත්තියා අනන්තරපච්චයෙන පච්චයො. නඅරූපාවචරො ධම්මො අරූපාවචරස්ස ධම්මස්ස අනන්තරපච්චයෙන පච්චයො – නඅරූපාවචරං චුතිචිත්තං අරූපාවචරස්ස උපපත්තිචිත්තස්ස අනන්තරපච්චයෙන පච්චයො; නඅරූපාවචරා ඛන්ධා අරූපාවචරස්ස වුට්ඨානස්ස අනන්තරපච්චයෙන පච්චයො; ආකාසානඤ්චායතනස්ස පරිකම්මං ආකාසානඤ්චායතනස්ස අනන්තරපච්චයෙන පච්චයො; විඤ්ඤාණඤ්චායතනස්ස…පෙ… ආකිඤ්චඤ්ඤායතනස්ස…පෙ… නෙවසඤ්ඤානාසඤ්ඤායතනස්ස පරිකම්මං නෙවසඤ්ඤානාසඤ්ඤායතනස්ස අනන්තරපච්චයෙන පච්චයො. (2)

සමනන්තරපච්චයෙන පච්චයො… සහජාතපච්චයෙන පච්චයො… පඤ්ච… අඤ්ඤමඤ්ඤපච්චයෙන පච්චයො… ද්වෙ… නිස්සයපච්චයෙන පච්චයො… සත්ත.

උපනිස්සයපච්චයො

285. අරූපාවචරො ධම්මො අරූපාවචරස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – ආකාසානඤ්චායතනං විඤ්ඤාණඤ්චායතනස්ස උපනිස්සයපච්චයෙන පච්චයො; විඤ්ඤාණඤ්චායතනං ආකිඤ්චඤ්ඤායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස උපනිස්සයපච්චයෙන පච්චයො. අරූපාවචරො ධම්මො නඅරූපාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අරූපාවචරං සද්ධං උපනිස්සාය දානං දෙති, සීලං…පෙ… උපොසථකම්මං කරොති, නඅරූපාවචරං ඣානං උප්පාදෙති, විපස්සනං…පෙ… මග්ගං…පෙ… අභිඤ්ඤං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති; අරූපාවචරං සීලං…පෙ… පඤ්ඤං උපනිස්සාය දානං දෙති…පෙ… සමාපත්තිං උප්පාදෙති… මානං ජප්පෙති… දිට්ඨිං ගණ්හාති; අරූපාවචරා සද්ධා…පෙ… පඤ්ඤා නඅරූපාවචරාය සද්ධාය…පෙ… පඤ්ඤාය… රාගස්ස…පෙ… පත්ථනාය… කායිකස්ස සුඛස්ස… කායිකස්ස දුක්ඛස්ස… මග්ගස්ස ඵලසමාපත්තියා උපනිස්සයපච්චයෙන පච්චයො. (2)

286. නඅරූපාවචරො ධම්මො නඅරූපාවචරස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – නඅරූපාවචරං සද්ධං උපනිස්සාය දානං දෙති, සීලං…පෙ… උපොසථකම්මං කරොති, නඅරූපාවචරං ඣානං උප්පාදෙති, විපස්සනං…පෙ… මග්ගං…පෙ… අභිඤ්ඤං…පෙ… සමාපත්තිං උප්පාදෙති, මානං ජප්පෙති… දිට්ඨිං ගණ්හාති; නඅරූපාවචරං සීලං…පෙ… පඤ්ඤං…පෙ… රාගං…පෙ… පත්ථනං…පෙ… කායිකං සුඛං… කායිකං දුක්ඛං… උතුං… භොජනං… සෙනාසනං උපනිස්සාය දානං දෙති…පෙ… සමාපත්තිං උප්පාදෙති… පාණං හනති…පෙ… සඞ්ඝං භින්දති; නඅරූපාවචරා සද්ධා…පෙ… සෙනාසනං නඅරූපාවචරාය සද්ධාය…පෙ… පත්ථනාය… කායිකස්ස සුඛස්ස… කායිකස්ස දුක්ඛස්ස, මග්ගස්ස, ඵලසමාපත්තියා උපනිස්සයපච්චයෙන පච්චයො. (1)

නඅරූපාවචරො ධම්මො අරූපාවචරස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – ආකාසානඤ්චායතනස්ස පරිකම්මං ආකාසානඤ්චායතනස්ස උපනිස්සයපච්චයෙන පච්චයො…පෙ… නෙවසඤ්ඤානාසඤ්ඤායතනස්ස පරිකම්මං නෙවසඤ්ඤානාසඤ්ඤායතනස්ස උපනිස්සයපච්චයෙන පච්චයො. (2)

පුරෙජාතපච්චයාදි

287. නඅරූපාවචරො ධම්මො නඅරූපාවචරස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු නඅරූපාවචරානං ඛන්ධානං පුරෙජාතපච්චයෙන පච්චයො. නඅරූපාවචරො ධම්මො අරූපාවචරස්ස ධම්මස්ස පුරෙජාතපච්චයෙන පච්චයො. වත්ථුපුරෙජාතං – වත්ථු අරූපාවචරානං ඛන්ධානං පුරෙජාතපච්චයෙන පච්චයො. (2)

පච්ඡාජාතපච්චයෙන පච්චයො… ද්වෙ… ආසෙවනපච්චයෙන පච්චයො… තීණි.

කම්මපච්චයො

288. අරූපාවචරො ධම්මො අරූපාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා…පෙ…. අරූපාවචරො ධම්මො නඅරූපාවචරස්ස ධම්මස්ස කම්මපච්චයෙන පච්චයො – අරූපාවචරා චෙතනා චිත්තසමුට්ඨානානං රූපානං කම්මපච්චයෙන පච්චයො. (මූලං කාතබ්බං.) අරූපාවචරා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. (3)

නඅරූපාවචරො ධම්මො නඅරූපාවචරස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නඅරූපාවචරා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො (සංඛිත්තං). (1)

විපාකපච්චයාදි

289. අරූපාවචරො ධම්මො අරූපාවචරස්ස ධම්මස්ස විපාකපච්චයෙන පච්චයො (සංඛිත්තං).

නඅරූපාවචරො ධම්මො නඅරූපාවචරස්ස ධම්මස්ස විපාකපච්චයෙන පච්චයො (සංඛිත්තං)… ආහාරපච්චයෙන පච්චයො… චත්තාරි… ඉන්ද්‍රියපච්චයෙන පච්චයො… චත්තාරි… ඣානපච්චයෙන පච්චයො… චත්තාරි… මග්ගපච්චයෙන පච්චයො… චත්තාරි… සම්පයුත්තපච්චයෙන පච්චයො… ද්වෙ.

විප්පයුත්තපච්චයො

290. අරූපාවචරො ධම්මො නඅරූපාවචරස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

නඅරූපාවචරො ධම්මො නඅරූපාවචරස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). නඅරූපාවචරො ධම්මො අරූපාවචරස්ස ධම්මස්ස විප්පයුත්තපච්චයෙන පච්චයො. පුරෙජාතං – වත්ථු අරූපාවචරානං ඛන්ධානං විප්පයුත්තපච්චයෙන පච්චයො. (2)

අත්ථිපච්චයාදි

291. අරූපාවචරො ධම්මො අරූපාවචරස්ස ධම්මස්ස අත්ථිපච්චයෙන පච්චයො – සහජාතං…පෙ…. අරූපාවචරො ධම්මො නඅරූපාවචරස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං…පෙ…. අරූපාවචරො ධම්මො අරූපාවචරස්ස ච නඅරූපාවචරස්ස ච ධම්මස්ස අත්ථිපච්චයෙන පච්චයො – සහජාතං (සංඛිත්තං). (3)

නඅරූපාවචරො ධම්මො නඅරූපාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). නඅරූපාවචරො ධම්මො අරූපාවචරස්ස ධම්මස්ස අත්ථිපච්චයෙන පච්චයො. පුරෙජාතං – වත්ථු අරූපාවචරානං ඛන්ධානං අත්ථිපච්චයෙන පච්චයො. (2)

292. අරූපාවචරො ච නඅරූපාවචරො ච ධම්මා අරූපාවචරස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – අරූපාවචරො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. අරූපාවචරො ච නඅරූපාවචරො ච ධම්මා නඅරූපාවචරස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – අරූපාවචරා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – අරූපාවචරා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – අරූපාවචරා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.