1. පච්චයානුලොමං

2. සඞ්ඛ්‍යාවාරො

293. හෙතුයා චත්තාරි, ආරම්මණෙ තීණි, අධිපතියා චත්තාරි, අනන්තරෙ චත්තාරි, සමනන්තරෙ චත්තාරි, සහජාතෙ පඤ්ච, අඤ්ඤමඤ්ඤෙ ද්වෙ, නිස්සයෙ සත්ත, උපනිස්සයෙ චත්තාරි, පුරෙජාතෙ ද්වෙ, පච්ඡාජාතෙ ද්වෙ, ආසෙවනෙ තීණි, කම්මෙ චත්තාරි, විපාකෙ ද්වෙ, ආහාරෙ චත්තාරි, ඉන්ද්‍රියෙ චත්තාරි, ඣානෙ චත්තාරි, මග්ගෙ චත්තාරි, සම්පයුත්තෙ ද්වෙ, විප්පයුත්තෙ තීණි, අත්ථියා සත්ත, නත්ථියා චත්තාරි, විගතෙ චත්තාරි, අවිගතෙ සත්ත.

පච්චනීයුද්ධාරො

294. අරූපාවචරො ධම්මො අරූපාවචරස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො. අරූපාවචරො ධම්මො නඅරූපාවචරස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො… පච්ඡාජාතපච්චයෙන පච්චයො. අරූපාවචරො ධම්මො අරූපාවචරස්ස ච නඅරූපාවචරස්ස ච ධම්මස්ස සහජාතපච්චයෙන පච්චයො. (3)

295. නඅරූපාවචරො ධම්මො නඅරූපාවචරස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො… පුරෙජාතපච්චයෙන පච්චයො… පච්ඡාජාතපච්චයෙන පච්චයො… කම්මපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො. නඅරූපාවචරො ධම්මො අරූපාවචරස්ස ධම්මස්ස උපනිස්සයපච්චයෙන පච්චයො… පුරෙජාතපච්චයෙන පච්චයො. (2)

අරූපාවචරො ච නඅරූපාවචරො ච ධම්මා අරූපාවචරස්ස ධම්මස්ස සහජාතං, පුරෙජාතං. අරූපාවචරො ච නඅරූපාවචරො ච ධම්මා නඅරූපාවචරස්ස ධම්මස්ස සහජාතං, පච්ඡාජාතං, ආහාරං, ඉන්ද්‍රියං. (2)