1-7. පටිච්චවාරාදි
පච්චයචතුක්කං
හෙතුපච්චයො
167. පරිත්තාරම්මණං හෙතුං ධම්මං පටිච්ච පරිත්තාරම්මණො හෙතු ධම්මො උප්පජ්ජති හෙතුපච්චයා. (1)
මහග්ගතාරම්මණං හෙතුං ධම්මං පටිච්ච මහග්ගතාරම්මණො හෙතු ධම්මො උප්පජ්ජති හෙතුපච්චයා. (1)
අප්පමාණාරම්මණං හෙතුං ධම්මං පටිච්ච අප්පමාණාරම්මණො හෙතු ධම්මො උප්පජ්ජති හෙතුපච්චයා. (1) (සංඛිත්තං.)
හෙතුයා තීණි, ආරම්මණෙ තීණි…පෙ… විගතෙ තීණි, අවිගතෙ තීණි (සංඛිත්තං).
නඅධිපතියා තීණි, නපුරෙජාතෙ තීණි, නපච්ඡාජාතෙ තීණි, නආසෙවනෙ තීණි, නවිපාකෙ තීණි, නවිප්පයුත්තෙ තීණි (සංඛිත්තං).
(සහජාතවාරම්පි …පෙ… සම්පයුත්තවාරම්පි පටිච්චවාරසදිසං විත්ථාරෙතබ්බං.)
හෙතු-ආරම්මණපච්චයා
168. පරිත්තාරම්මණො හෙතු ධම්මො පරිත්තාරම්මණස්ස හෙතුස්ස ධම්මස්ස හෙතුපච්චයෙන පච්චයො. (1)
මහග්ගතාරම්මණො හෙතු ධම්මො මහග්ගතාරම්මණස්ස හෙතුස්ස ධම්මස්ස හෙතුපච්චයෙන පච්චයො. (1)
අප්පමාණාරම්මණො හෙතු ධම්මො අප්පමාණාරම්මණස්ස හෙතුස්ස ධම්මස්ස හෙතුපච්චයෙන පච්චයො. (1)
පරිත්තාරම්මණො හෙතු ධම්මො පරිත්තාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. පරිත්තාරම්මණො හෙතු ධම්මො මහග්ගතාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. (2)
මහග්ගතාරම්මණො හෙතු ධම්මො මහග්ගතාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. මහග්ගතාරම්මණො හෙතු ධම්මො පරිත්තාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. (2)
අප්පමාණාරම්මණො හෙතු ධම්මො අප්පමාණාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. අප්පමාණාරම්මණො හෙතු ධම්මො පරිත්තාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. අප්පමාණාරම්මණො හෙතු ධම්මො මහග්ගතාරම්මණස්ස හෙතුස්ස ධම්මස්ස ආරම්මණපච්චයෙන පච්චයො. (3) (සංඛිත්තං.)
169. හෙතුයා තීණි, ආරම්මණෙ සත්ත, අධිපතියා සත්ත, අනන්තරෙ නව, සමනන්තරෙ නව, උපනිස්සයෙ නව…පෙ… අවිගතෙ තීණි (සංඛිත්තං).
නහෙතුයා නව, නආරම්මණෙ නව (සංඛිත්තං).
හෙතුපච්චයා නආරම්මණෙ තීණි (සංඛිත්තං).
නහෙතුපච්චයා ආරම්මණෙ සත්ත (සංඛිත්තං).
(යථා කුසලත්තිකෙ පඤ්හාවාරං, එවං විත්ථාරෙතබ්බං.)