1-7. පටිච්චවාරාදි

පච්චයචතුක්කං

හෙතුපච්චයො

170. පරිත්තාරම්මණං නහෙතුං ධම්මං පටිච්ච පරිත්තාරම්මණො නහෙතු ධම්මො උප්පජ්ජති හෙතුපච්චයා (සංඛිත්තං).

හෙතුයා තීණි, ආරම්මණෙ තීණි, අධිපතියා තීණි…පෙ… අවිගතෙ තීණි (සංඛිත්තං).

171. පරිත්තාරම්මණං නහෙතුං ධම්මං පටිච්ච පරිත්තාරම්මණො නහෙතු ධම්මො උප්පජ්ජති නහෙතුපච්චයා (සංඛිත්තං).

නහෙතුයා තීණි, නඅධිපතියා තීණි…පෙ… නවිප්පයුත්තෙ තීණි (සංඛිත්තං).

හෙතුපච්චයා නඅධිපතියා තීණි (සංඛිත්තං).

නහෙතුපච්චයා ආරම්මණෙ තීණි (සංඛිත්තං).

(සහජාතවාරම්පි…පෙ… සම්පයුත්තවාරම්පි පටිච්චවාරසදිසං විත්ථාරෙතබ්බං.)

ආරම්මණ-අධිපතිපච්චයා

172. පරිත්තාරම්මණො නහෙතු ධම්මො පරිත්තාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. පරිත්තාරම්මණො නහෙතු ධම්මො මහග්ගතාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. (2)

මහග්ගතාරම්මණො නහෙතු ධම්මො මහග්ගතාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. මහග්ගතාරම්මණො නහෙතු ධම්මො පරිත්තාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. (2)

අප්පමාණාරම්මණො නහෙතු ධම්මො අප්පමාණාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. අප්පමාණාරම්මණො නහෙතු ධම්මො පරිත්තාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. අප්පමාණාරම්මණො නහෙතු ධම්මො මහග්ගතාරම්මණස්ස නහෙතුස්ස ධම්මස්ස ආරම්මණපච්චයෙන පච්චයො. (3)

පරිත්තාරම්මණො නහෙතු ධම්මො පරිත්තාරම්මණස්ස නහෙතුස්ස ධම්මස්ස අධිපතිපච්චයෙන පච්චයො (සංඛිත්තං).

173. ආරම්මණෙ සත්ත, අධිපතියා සත්ත, අනන්තරෙ නව, සමනන්තරෙ නව, උපනිස්සයෙ නව…පෙ… අවිගතෙ තීණි (සංඛිත්තං).

නහෙතුයා නව, නආරම්මණෙ නව (සංඛිත්තං).

ආරම්මණපච්චයා නහෙතුයා සත්ත (සංඛිත්තං).

නහෙතුපච්චයා ආරම්මණෙ සත්ත (සංඛිත්තං).

(යථා කුසලත්තිකෙ පඤ්හාවාරං, එවං විත්ථාරෙතබ්බං.)