1-7. පටිච්චවාරාදි
පච්චයචතුක්කං
158. පරිත්තං හෙතුං ධම්මං පටිච්ච පරිත්තො හෙතු ධම්මො උප්පජ්ජති හෙතුපච්චයා. (1)
මහග්ගතං හෙතුං ධම්මං පටිච්ච මහග්ගතො හෙතු ධම්මො උප්පජ්ජති හෙතුපච්චයා. (1)
අප්පමාණං හෙතුං ධම්මං පටිච්ච අප්පමාණො හෙතු ධම්මො උප්පජ්ජති හෙතුපච්චයා. (1) (සංඛිත්තං.)
හෙතුයා තීණි, ආරම්මණෙ තීණි…පෙ… අවිගතෙ තීණි (සංඛිත්තං).
නඅධිපතියා තීණි…පෙ… නවිප්පයුත්තෙ තීණි (සංඛිත්තං).
(සහජාතවාරම්පි…පෙ… සම්පයුත්තවාරම්පි පටිච්චවාරසදිසං විත්ථාරෙතබ්බං.)
හෙතුආරම්මණපච්චයාදි
159. පරිත්තො හෙතු ධම්මො පරිත්තස්ස හෙතුස්ස ධම්මස්ස හෙතුපච්චයෙන පච්චයො. (1)
මහග්ගතො හෙතු ධම්මො මහග්ගතස්ස හෙතුස්ස ධම්මස්ස හෙතුපච්චයෙන පච්චයො. (1)
අප්පමාණො හෙතු ධම්මො අප්පමාණස්ස හෙතුස්ස ධම්මස්ස හෙතුපච්චයෙන පච්චයො. (1)
පරිත්තො හෙතු ධම්මො පරිත්තස්ස හෙතුස්ස ධම්මස්ස ආරම්මණපච්චයෙන පච්චයො. පරිත්තො හෙතු ධම්මො මහග්ගතස්ස හෙතුස්ස ධම්මස්ස ආරම්මණපච්චයෙන පච්චයො. (2)
මහග්ගතො හෙතු ධම්මො මහග්ගතස්ස හෙතුස්ස ධම්මස්ස ආරම්මණපච්චයෙන පච්චයො. මහග්ගතො හෙතු ධම්මො පරිත්තස්ස හෙතුස්ස ධම්මස්ස ආරම්මණපච්චයෙන පච්චයො. (2)
අප්පමාණො හෙතු ධම්මො පරිත්තස්ස හෙතුස්ස ධම්මස්ස ආරම්මණපච්චයෙන පච්චයො. අප්පමාණො හෙතු ධම්මො මහග්ගතස්ස හෙතුස්ස ධම්මස්ස ආරම්මණපච්චයෙන පච්චයො. (2)
160. පරිත්තො හෙතු ධම්මො පරිත්තස්ස හෙතුස්ස ධම්මස්ස අධිපතිපච්චයෙන පච්චයො. (1)
මහග්ගතො හෙතු ධම්මො මහග්ගතස්ස හෙතුස්ස ධම්මස්ස අධිපතිපච්චයෙන පච්චයො. මහග්ගතො හෙතු ධම්මො පරිත්තස්ස හෙතුස්ස ධම්මස්ස අධිපතිපච්චයෙන පච්චයො. (2)
අප්පමාණො හෙතු ධම්මො අප්පමාණස්ස හෙතුස්ස ධම්මස්ස අධිපතිපච්චයෙන පච්චයො… ද්වෙ.
පරිත්තො හෙතු ධම්මො පරිත්තස්ස හෙතුස්ස ධම්මස්ස අනන්තරපච්චයෙන පච්චයො. පරිත්තො හෙතු ධම්මො මහග්ගතස්ස හෙතුස්ස ධම්මස්ස අනන්තරපච්චයෙන පච්චයො. පරිත්තො හෙතු ධම්මො අප්පමාණස්ස හෙතුස්ස ධම්මස්ස අනන්තරපච්චයෙන පච්චයො. (3)
මහග්ගතො හෙතු ධම්මො මහග්ගතස්ස හෙතුස්ස ධම්මස්ස අනන්තරපච්චයෙන පච්චයො. මහග්ගතො හෙතු ධම්මො පරිත්තස්ස හෙතුස්ස ධම්මස්ස අනන්තරපච්චයෙන පච්චයො. මහග්ගතො හෙතු ධම්මො අප්පමාණස්ස හෙතුස්ස ධම්මස්ස අනන්තරපච්චයෙන පච්චයො. (3)
අප්පමාණො හෙතු ධම්මො අප්පමාණස්ස හෙතුස්ස ධම්මස්ස අනන්තරපච්චයෙන පච්චයො. අප්පමාණො හෙතු ධම්මො පරිත්තස්ස හෙතුස්ස ධම්මස්ස අනන්තරපච්චයෙන පච්චයො. අප්පමාණො හෙතු ධම්මො මහග්ගතස්ස හෙතුස්ස ධම්මස්ස අනන්තරපච්චයෙන පච්චයො. (3)
පරිත්තො හෙතු ධම්මො පරිත්තස්ස හෙතුස්ස ධම්මස්ස උපනිස්සයපච්චයෙන පච්චයො (සංඛිත්තං).
161. හෙතුයා තීණි, ආරම්මණෙ ඡ, අධිපතියා පඤ්ච, අනන්තරෙ නව, සමනන්තරෙ නව, සහජාතෙ තීණි, අඤ්ඤමඤ්ඤෙ තීණි, නිස්සයෙ තීණි, උපනිස්සයෙ නව…පෙ… අවිගතෙ තීණි (සංඛිත්තං).
නහෙතුයා නව, නආරම්මණෙ නව (සංඛිත්තං).
හෙතුපච්චයා නආරම්මණෙ තීණි (සංඛිත්තං).
නහෙතුපච්චයා ආරම්මණෙ ඡ (සංඛිත්තං).
(යථා කුසලත්තිකෙ පඤ්හාවාරං, එවං විත්ථාරෙතබ්බං.)