2. කොසියවග්ග 4. ඡබ්බස්ස සික්ඛාපුච්ඡා

පුච්ඡා – යං තෙන ආවුසො භගවතා…පෙ… සම්මාසම්බුද්ධෙන අනුවස්සං කාරාපෙන්තස්ස නිස්සග්ගියං පාචිත්තියං කත්ථ පඤ්ඤත්තං.

විස්සජ්ජනා – සාවත්ථියං භන්තෙ පඤ්ඤත්තං.

පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සම්බහුලෙ භන්තෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අනුවස්සං සන්ථතං කාරාපෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – කස්ස ආවුසො වචනං.

විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.

පුච්ඡා – කෙනාවුසො ආභතං.

විස්සජ්ජනා – පරම්පරාය භන්තෙ ආභතං.

පුච්ඡා – අත්ථි නුඛො ආවුසො එත්ථ කොචි විරද්ධදොසො.

විස්සජ්ජනා – නත්ථි භන්තෙ.

සංගායනත්ථාය සඞ්ඝස්ස ඤාපනං

සුණාතු මෙ භන්තෙ සඞ්ඝො, අහං ආයස්මන්තං විචිත්තසාරාභිවංසං තිපිටකධර ධම්මභණ්ඩාගාරිකං ඉමෙසං නිස්සග්ගියපාචිත්තියසික්ඛාපදානං යාව ඡබ්බස්සසික්ඛාපදං නිදානාදීනි පුච්ඡිතබ්බානි අනෙකානි ඨානානි පුච්ඡිං, පුට්ඨොපුට්ඨො ච සො ආයස්මා විචිත්තසාරාභිවංසො විස්සජ්ජෙසි, ඉතිහිදං භන්තෙ ඉමානි සික්ඛාපදානි නිම්මලානි සුපරිසුද්ධානී තස්සෙව භගවතො වචනානි අරහතො සම්මාසම්බුද්ධස්ස, තස්මා යථාපුරෙ මහාකස්සපාදයො මහාථෙරවරා පොරාණසංගීතිකාරා බ්‍රහ්මචරියස්ස චිරට්ඨිතියා බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානං ධම්මවිනයං සංගායිංසු චෙව අනුසංගායිංසු ච, එවමෙව මයම්පි දානි සබ්බෙව ඡට්ඨසංගීති මහාධම්මසභා පරියාපන්නා ඡබ්බස්ස නිස්සග්ගිය සික්ඛාපදතො පට්ඨාය ඉමානි නිස්සග්ගියසික්ඛාපදානි එකතො ගණසජ්ඣායං කත්වා සංහායෙය්‍යාම.