නමො තස්ස භගවතො අරහතො සම්මාසම්බුද්ධස්ස
විනයපිටක
සංගායනස්ස පුච්ඡා විස්සජ්ජනා
ඔකාස දානකථා
සුණාතු මෙ භන්තෙ සඞ්ඝො, මහතී අයං පරිසා, එවරූපාය පරිසාය න සුකරා සබ්බසො කථං සාවෙතුං, තස්මා ආයස්මතො ච ජවනත්ථෙරස්ස පඛුක්කූනගරවාසිනො ආයස්මතො ච විචිත්තසාරාභිවංසස්ස තිපිටකධර ධම්මභණ්ඩාගාරිකස්ස විනයපුච්ඡනභාරඤ්ච විනයවිස්සජ්ජන භාරඤ්ච ආවහිතුං ඔකාසං දම්මි, කරොථ තුම්හෙ ආවුසො ඡට්ඨසංගීතිපුබ්බඞ්ගමානි විනයපුච්ඡන විනයවිස්සජ්ජන කිච්චානි යථාධම්මං යථාවිනයං.
අග්ගමහාපණ්ඩිත භදන්තජවන මහාථෙරෙන
ඨපිතා
පුච්ඡක සම්මුති ඤාත්ති
සුණාතු මෙ භන්තෙ සඞ්ඝො, යදි සඞ්ඝස්ස පත්තකල්ලං, අහං ආයස්මන්තං විචිත්තසාරාභිවංසං තිපිටකධර ධම්මභණ්ඩාගාරිකං විනයං පුච්ඡෙය්‍යං.
තිපිටකධර ධම්මභණ්ඩාගාරික
භදන්තවිචිත්තසාරාභිවංසෙන
ඨපිතා විස්සජ්ජක සම්මුති ඤාත්ති
සුණාතු මෙ භන්තෙ සඞ්ඝො, යදි සඞ්ඝස්ස පත්තකල්ලං, අහං ආයස්මතා ජවනත්ථෙරෙන සඞ්ඝනායක මහාථෙරස්ස පටිනිධිභූතෙන විනයං පුට්ඨො විස්සජ්ජෙය්‍යං.
පඨම පාරාජික සික්ඛාපුච්ඡා
පුච්ඡා – යං තෙන ආවුසො භගවතා ජානතා පස්සතා අරහතා සම්මාසම්බුද්ධෙන පඨමං පාරාජිකං කත්ථ පඤ්ඤත්තං.
විස්සජ්ජනා – වෙසාලියං භන්තෙ පඤ්ඤත්තං.
පුච්ඡා – කං ආවුසො ආරබ්භ පඤ්ඤත්තං.
විස්සජ්ජනා – සුදින්නං භන්තෙ කලන්දපුත්තං ආරබ්භ පඤ්ඤත්තං.
පුච්ඡා – කිස්මිං ආවුසො වත්ථුස්මිං පඤ්ඤත්තං.
විස්සජ්ජනා – සුදින්දො භන්තෙ කලන්දපුත්තො පුරාණදුතියිකාය මෙථුනං ධම්මං පටිසෙවි, තස්මිං භන්තෙ වත්ථුස්මිං පඤ්ඤත්තං.
පුච්ඡා – අත්ථි ආවුසො තත්ථ පඤ්ඤත්ති අනුපඤ්ඤත්ති අනුප්පන්නපඤ්ඤත්ති.
විස්සජ්ජනා – එකා භන්තෙ පඤ්ඤත්ති ද්වෙ අනුපඤ්ඤත්තියො, අනුප්පන්නපඤ්ඤත්ති තස්මිං නත්ථි.
පුච්ඡා – සබ්බත්ථපඤ්ඤත්තිනුඛො ආවුසො පදෙසපඤ්ඤත්තිනුඛො.
විස්සජ්ජනා – සබ්බත්ථපඤ්ඤත්ති භන්තෙ.
පුච්ඡා – සාධාරණපඤ්ඤත්තිනුඛො ආවුසො අසාධාරණපඤ්ඤත්තිනුඛො.
විස්සජ්ජනා – සාධාරණපඤ්ඤත්ති භන්තෙ.
පුච්ඡා – එකතොපඤ්ඤත්තිනුඛො ආවුසො උභතොපඤ්ඤත්තිනුඛො.
විස්සජ්ජනා – උභතොපඤ්ඤත්ති භන්තෙ.
පුච්ඡා – පඤ්චන්නං ආවුසො පාතිමොක්ඛුද්දෙසානං කත්ථොගධං කත්ථ පරියාපන්නං.
විස්සජ්ජනා – නිදානොගධං භන්තෙ නිදානපරියාපන්නං.
පුච්ඡා – කතමෙන ආවුසො උද්දෙසෙන උද්දෙසං ආගච්ඡති.
විස්සජ්ජනා – දුතියෙන භන්තෙ උද්දෙසෙන උද්දෙසං ආගච්ඡති.
පුච්ඡා – චතුන්නං ආවුසො විපත්තීනං කතමා විපත්ති.
විස්සජ්ජනා – සීලවිපත්ති භන්තෙ.
පුච්ඡා – කා ආවුසො විපත්ති.
විස්සජ්ජනා – අසංවරො භන්තෙ විපත්ති.
පුච්ඡා – කා ආවුසො සම්පත්ති.
විස්සජ්ජනා – සංවරො භන්තෙ සම්මත්ති.
පුච්ඡා – කා ආවුසො පටිපත්ති.
විස්සජ්ජනා – න එවරූපං කරිස්සාමීති යාවජීවං ආපාණකොටිකං සමාදාය සික්ඛති සික්ඛාපදෙසු, අයං භන්තෙ පටිපත්ති.
පුච්ඡා – කති ආවුසො අත්ථවසෙ පටිච්ච භගවතා පඨමං පාරාජිකං පඤ්ඤත්තං.
විස්සජ්ජනා – දස භන්තෙ අත්ථවසෙ පටිච්ච භගවතා පඨමං පාරාජිකං පඤ්ඤත්තං, 1 - සඞ්ඝසුට්ඨුතාය, 2 - සඞ්ඝඵාසුතාය, 3 - දුම්මඞ්කූනං පුග්ගලානං නිග්ගහාය, 4 - පෙසලානං භික්ඛූනං ඵාසුවිහාරාය, 5 - දිට්ඨධම්මිකානං ආසවානං සංවරාය, 6 - සම්පරායිකානං ආසවානං පටිඝාතාය, 7 - අප්පසන්නානං පසාදාය, 8 - පසන්නානං භිය්‍යොභාවාය, 9 - සද්ධම්මට්ඨිතියා, 10 - විනයානුග්ගහාය.
පුච්ඡා – කෙ ආවුසො සික්ඛන්ති.
විස්සජ්ජනා – සෙක්ඛාච භන්තෙ පුථුජ්ජනකල්‍යාණකාච සික්ඛන්ති.
පුච්ඡා – කෙ ආවුසො සික්ඛිතසික්ඛා.
විස්සජ්ජනා – අරහන්තො භන්තෙ සික්ඛිතසික්ඛා.
පුච්ඡා – කත්ථ ආවුසො ඨිතං.
විස්සජ්ජනා – සික්ඛාකාමෙසු භන්තෙ ඨිතං.
පුච්ඡා – කෙ ආවුසො ධාරෙන්ති.
විස්සජ්ජනා – යෙසං භන්තෙ වත්තති තෙ ධාරෙන්ති.
පුච්ඡා – කස්ස ආවුසො වචනං.
විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.
පුච්ඡා – කෙනාවුසො ආභතං.
විස්සජ්ජනා – පරම්පරාය භන්තෙ ආභතං.
සංගායනත්ථාය සඞ්ඝස්ස ඤාපනං
සුණාතු මෙ භන්තෙ සඞ්ඝො අහං භන්තෙ ආයස්මන්තං විචිත්ථසාරාභිවංසං තිපිටකධර ධම්මභණ්ඩාගාරිකං පඨමස්ස පාරාජිකස්ස නිදානම්පි පුච්ඡිං, පුග්ගලම්පි පුච්ඡිං, වත්ථුම්පි පුච්ඡිං, පඤ්ඤත්ති අනුපඤ්ඤත්තිආදීනිපි පුච්ඡිං, පුට්ඨො පුට්ඨොච සො ආයස්මාවිචිත්තසාරාභිවංසො විස්සජ්ජෙසි, ඉතිහිදං භන්තෙ පඨමං පාරාජික සික්ඛාපදං නිම්මලං සුපරිසුද්ධං තස්සෙව භගවතො වචනං අරහතො සම්මාසම්බුද්ධස්ස, තස්මා යථාපුරෙ මහාකස්සපාදයො මහාථෙරවරා පොරාණසංගීතිකාරා බ්‍රහ්මචරිය සඞ්ඛාතස්ස බුද්ධසාසනස්ස චිරට්ඨිතියා බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානං ධම්මවිනයං සඞ්ගායිංසුචෙව අනුසඞ්ගායිංසුච, එවමෙව මයම්පි දානි සබ්බෙව ඡට්ඨසංගීතිමහාධම්මසභාපරියාපන්නා ඉදං පඨම පාරාජික සික්ඛාපදං එකතොසජ්ඣායනවසෙන සංගායෙය්‍යාම.
රෙවතාභි පණ්ඩිතධජ සාසනවංස මහාධම්මරාජගුරුනො
අභිධජමහාරට්ඨගුරුනොච සඞ්ඝනායක මහාථෙරස්ස
ඔකාස දානකථා
සුණාතු මෙ භන්තෙ සඞ්ඝො, මහතී අයං පරිසා, එවරූපාය පරිසාය න සුකරා සබ්බසො කථං සාවෙතුං, තස්මා ආයස්මතොච සොභනස්ස සාසනරි සාරාමාධිවාසිනො ආයස්මතොච විචිත්තසාරාභිවංසස්ස තිපිටකධර ධම්මභණ්ඩාගාරිකස්ස විනයපුච්ඡනභාරඤ්ච විනයවිස්සජ්ජනභාරඤ්ච ආවහිතුං ඔකාසං දම්මි, කරොථ තුම්හෙ ආවුසො ඡට්ඨසංගීතිපුබ්බඞ්ගමානි විනයපුච්ඡන විනයවිස්සජ්ජන කිච්චානි යථාධම්මං යථාවිනයං.
අග්ගමහාපණ්ඩිත භදන්ත සොභනත්ථෙරෙන
ඨපිතා පුච්ඡක සම්මුති ඤාත්ති
සුණාතු මෙ භන්තෙ සඞ්ඝො, යදි සඞ්ඝස්ස පත්තකල්ලං, අහං ආයස්මන්තං විචිත්තසාරාභිවංසං තිපිටකධර ධම්මභණ්ඩාගාරිකං විනයං පුච්ඡෙය්‍යං.
තිපිටකධර ධම්මභණ්ඩාගාරික
භදන්තවිචිත්තසාරාභිවංසෙන
ඨපිතා විස්සජ්ජක සම්මුති ඤාත්ති
සුණාතු මෙ භන්තෙ සඞ්ඝො, යදිසඞ්ඝස්ස පත්තකල්ලං, අහං ආයස්මතා සොභනත්ථෙරෙන සඞ්ඝනායක මහාථෙරස්ස පටිනිධිභූතෙන විනයං පුට්ඨො විස්සජ්ජෙය්‍යං.
දුතිය පාරාජික සික්ඛාපුච්ඡා
පුච්ඡා – යං තෙන ආවුසො භගවතා ජානතා පස්සතා අරහතා සම්මාසම්බුද්ධෙන දුතියං පාරාජිකං කත්ථ පඤ්ඤත්තං.
විස්සජ්ජනා – රාජගහෙ භන්තෙ පඤ්ඤත්තං.
පුච්ඡා – කං ආවුසො ආරබ්භ පඤ්ඤත්තං.
විස්සජ්ජනා – ධනියං භන්තෙ කුම්භකාරපුත්තං ආරබ්භ පඤ්ඤත්තං.
පුච්ඡා – කිස්මිං ආවුසො වත්ථුස්මිං පඤ්ඤත්තං.
විස්සජ්ජනා – ධනියො භන්තෙ කුම්භකාරපුත්තො රඤ්ඤො දාරූනි අදින්නං ආදියි, තස්මිං වත්ථුස්මිං පඤ්ඤත්තං.
පුච්ඡා – අත්ථි ආවුසො තත්ථ පඤ්ඤත්ති අනුපඤ්ඤත්ති අනුප්පන්නපඤ්ඤත්ති.
විස්සජ්ජනා – එකා භන්තෙ පඤ්ඤත්ති එකා අනුපඤ්ඤත්ති අනුප්පන්නපඤ්ඤත්ති තස්මිං නත්ථි.
පුච්ඡා – කා ආවුසො තත්ථ මූලපඤ්ඤත්ති.
විස්සජ්ජනා – යො පන භික්ඛු අදින්නං ථෙය්‍යසඞ්ඛාතං ආදියෙය්‍ය, යථාරූපෙ අදින්නාදානෙ රාජානො චොරං ගහෙත්වා හනෙය්‍යුංවා බන්ධෙය්‍යුංවා පබ්බාජෙය්‍යුංවා චොරොසි බාලොසි මුළ්හොසි ථෙනොසීති තථාරූපං භික්ඛු අදින්නං ආදියමානො අයම්පි පාරාජිකො හොති අසංවාසොති අයං භන්තෙ තත්ථ මූලපඤ්ඤත්ති.
පුච්ඡා – කා ආවුසො තත්ථ අනුපඤ්ඤත්ති.
විස්සජ්ජනා – ගාමාවා අරඤ්ඤාවාති අයං භන්තෙ තත්ථ අනුපඤ්ඤත්ති.
පුච්ඡා – කා ආවුසො තත්ථ පරිපුණ්ණපඤ්ඤත්ති.
විස්සජ්ජනා – යො පන භික්ඛු ගාමාවා අරඤ්ඤාවා අදින්නං ථෙය්‍යසඞ්ඛාතං ආදියෙය්‍ය, කථාරූපෙ අදින්නාදානෙ රාජානො චොරං ගහෙත්වා හනෙය්‍යුංවා බන්ධෙය්‍යුංවා පබ්බාජෙය්‍යුංවා චොරොසි බාලොසි මූළ්හොසි ථෙනොසීති තථාරූපං භික්ඛු අදින්නං ආදියමානො අයම්පි පාරාජිකො හොති අසංවාසොති අයං භන්තෙ තත්ථ පරිපුණ්ණපඤ්ඤත්ති.
පුච්ඡා – සබ්බත්ථපඤ්ඤත්ති නුඛො ආවුසො පදෙසපඤ්ඤත්තිනුඛො.
විස්සජ්ජනා – සබ්බත්ථපඤ්ඤත්ති භන්තෙ.
පුච්ඡා – සාධාරණපඤ්ඤත්තිනුඛො ආවුසො අසාධාරණපඤ්ඤත්ති නුඛො.
විස්සජ්ජනා – සාධාරණපඤ්ඤත්ති භන්තෙ.
පුච්ඡා – එකතොපඤ්ඤත්තිනුඛො ආවුසො උභතොපඤ්ඤත්තිනුඛො.
විස්සජ්ජනා – උභතොපඤ්ඤත්ති භන්තෙ.
පුච්ඡා – තස්මිං ආවුසො දුතිය පාරාජිකෙ අදින්නං ආදියන්තො කති ආපත්තියො ආපජ්ජති විභජිත්වා විස්සජ්ජෙහි.
විස්සජ්ජනා – අදින්නං භන්තෙ ආදියන්තො තිස්සො ආපත්තියො ආපජ්ජති, පඤ්ච මාසකංවා අතිරෙක පඤ්ච මාසකංවා අග්ඝනකං අදින්නං ථෙය්‍යසඞ්ඛාතං ආදියති ආපත්ති පාරාජිකස්ස, ඌනපඤ්චමාසකංවා අතිරෙකමාසකංවා අදින්නං ථෙය්‍යසඞ්ඛාතං ආදියති ආපත්ති ථුල්ලච්චයස්ස, මාසකංවා ඌනමාසකවා අග්ඝනකං අදින්නං ථෙය්‍යසඞ්ඛාතං ආදියති ආපත්ති දුක්කටස්ස, අදින්නං භන්තෙ ආදියන්තො ඉමා තිස්සො ආපත්තියො ආපජ්ජති.
පුච්ඡා – කෙසං ආවුසො අනාපත්ති.
විස්සජ්ජනා – දසන්නං භන්තෙ පුග්ගලානං අනාපත්ති, සකසඤ්ඤිස්ස, විස්සාසග්ගාහෙන ගණ්හන්තස්ස, තාවකාලිකං ගණ්හන්තස්ස, පෙතපරිග්ගහං ගණ්හන්තස්ස, තිරච්ඡානගතපරිග්ගහං ගණ්හන්තස්ස, පංසුකූලසඤ්ඤිස්ස, උම්මත්තකස්ස, ඛිත්තචිත්තස්ස, වෙදනාට්ටස්ස, ආදිකම්මිකස්සාති.
පුච්ඡා – පඤ්චන්නං ආවුසො පාතිමොක්ඛුද්දෙසානං කත්ථොගධං කත්ථපරියාපන්නං.
විස්සජ්ජනා – නිදානොගධං භන්තෙ නිදානපරියාපන්නං.
පුච්ඡා – කතමෙන ආවුසො උද්දෙසෙන උද්දෙසං ආගච්ඡති.
විස්සජ්ජනා – දුතියෙන භන්තෙ උද්දෙසෙන උද්දෙසං ආගච්ඡති.
පුච්ඡා – චතුන්නං ආවුසො විපත්තීනං කතමා විපත්ති.
විස්සජ්ජනා – සීලවිපත්ති භන්තෙ.
පුච්ඡා – සත්තන්නං ආවුසො ආපත්තික්ඛන්ධානං කතමො ආපත්තික්ඛන්ධො.
විස්සජ්ජනා – පාරාජිකාපත්තික්ඛන්ධො භන්තෙ.
පුච්ඡා – ඡන්නං ආවුසො ආපත්තිසමුට්ඨානානං කතිහි සමුට්ඨානෙහි සමුට්ඨාති.
විස්සජ්ජනා – තීහි භන්තෙ සමුට්ඨානෙහි සමුට්ඨාති, සියා කායතොච චිත්තතොච සමුට්ඨාති, න වාචාතො, සියා වාචාතොච
චිත්තතොච සමුට්ඨාති, න කායතො, සියා කායතොච වාචාතොච චිත්තතොච සමුට්ඨාති.
පුච්ඡා – චතුන්නං ආවුසො අධිකරණානං කතමං අධිකරණං.
විස්සජ්ජනා – ආපත්තාධිකරණං භන්තෙ.
පුච්ඡා – සත්තන්නං ආවුසො සමථානං කතිහි සමථෙහි සම්මති.
විස්සජ්ජනා – ද්විහි භන්තෙ සමථෙහි සම්මති සම්මුඛාවිනයෙනච පටිඤ්ඤාත කරණෙනච.
පුච්ඡා – කො ආවුසො තත්ථ විනයො, කො තත්ථ අභිවිනයො.
විස්සජ්ජනා – පඤ්ඤත්ති භන්තෙ විනයො විභත්ති අභිවිනයො.
පුච්ඡා – කිංආවුසො තත්ථ පාතිමොක්ඛං කිං තත්ථ අධිපාතිමොක්ඛං.
විස්සජ්ජනා – පඤ්ඤත්ති භන්තෙ පාතිමොක්ඛං, විභත්ති අධිපාතිමොක්ඛං.
පුච්ඡා – කා ආවුසො විපත්ති.
විස්සජ්ජනා – අසංවරො භන්තෙ විපත්ති.
පුච්ඡා – කා ආවුසො සම්පත්ති.
විස්සජ්ජනා – සංවරො භන්තෙ සම්පත්ති.
පුච්ඡා – කා ආවුසො පටිපත්ති.
විස්සජ්ජනා – න එවරූපං කරිස්සාමීති යාවජීවං ආපාණකොටිකං සමාදාය සික්ඛති සික්ඛාපදෙසු අයං භන්තෙ තත්ථ පටිපත්ති.
පුච්ඡා – කති ආවුසො අත්ථවසෙ පටිච්ච භගවතා දුතියං පාරාජිකං පඤ්ඤත්තං.
විස්සජ්ජනා – දස භන්තෙ අත්ථවසෙ පටිච්ච භගවතා දුතියං පාරාජිකං පඤ්ඤත්තං. සඞ්ඝසුට්ඨුතාය සඞ්ඝඵාසුතාය දුම්මඞ්කූනං පුග්ගලානං නිග්ගහාය පෙසලානං භික්ඛූනං ඵාසුවිහාරාය දිට්ඨධම්මිකානං ආසවානං සංවරාය සම්පරායිකානං ආසවානං පටිඝාතාය අප්පසන්නානං පසාදාය පසන්නානං භිය්‍යොභාවාය සද්ධම්මට්ඨිතියා විනයානුග්ගහාය.
පුච්ඡා – කො ආවුසො සික්ඛන්ති.
විස්සජ්ජනා – සෙක්ඛාච භන්තෙ පුථුජ්ජනකල්‍යාණකාච සික්ඛන්ති.
පුච්ඡා – කෙ ආවුසො සික්ඛිතසික්ඛා.
විස්සජ්ජනා – අරහන්තො භන්තෙ සික්ඛිතසික්ඛා.
පුච්ඡා – කත්ථ ආවුසො ඨිතං.
විස්සජ්ජනා – සික්ඛාකාමෙසු භන්තෙ ඨිතං.
පුච්ඡා – කෙ ආවුසො ධාරෙන්ති.
විස්සජ්ජනා – යෙසං භන්තෙ වත්තති තෙ ධාරෙන්ති.
පුච්ඡා – කස්ස ආවුසො වචනං.
විස්සජ්ජනා – භගවතා භන්තෙ වචනං අරහතො සම්මාසම්මුද්ධස්ස.
පුච්ඡා – කෙනාවුසො ආභතං.
විස්සජ්ජනා – පරම්පරාය භන්තෙ ආභතං.
පුච්ඡා – අත්ථි නු ඛො ආවුසො තත්ථ උපනෙතබ්බං වා අපනෙතබ්බං වා අක්ඛරපදපච්චාභට්ඨං වා විරද්ධපදබ්‍යඤ්ජනං වා.
විස්සජ්ජනා – නත්ථි භන්තෙ.
‘‘සංගායනත්ථාය සඞ්ඝස්ස ඤාපනං’’
සුණාතු මෙ භන්තෙ සඞ්ඝො අහං භන්තෙ ආයස්මන්තං විචිත්තසාරාභිවංස තිපිටකධරධම්මභණ්ඩාගාරිකං දුතියස්ස පාරාජිකස්ස නිදානම්පි පුච්ඡිං, පුග්ගලම්පි පුච්ඡිං, වත්ථුම්පි පුච්ඡිං, පඤ්ඤත්තිම්පි පුච්ඡිං, අනුපඤ්ඤත්තිම්පි පුච්ඡිං, ආපත්තිම්පි පුච්ඡිං, අනාපත්තිම්පි පුච්ඡිං, අඤ්ඤානිපි ඊදිසානි පුච්ඡිතබ්බට්ඨානානි අනෙකානි පුච්ඡිං, පුට්ඨො පුට්ඨොච සො ආයස්මා විචිත්තසාරාභිවංසො විස්සජ්ජෙසි. ඉති හිදං භන්තෙ ඉදං දුතියං පාරාජික සික්ඛාපදං නිම්මලං, සුපරිසුද්ධං, තස්සෙව භගවතො වචනං අරහතො සම්මාසම්බුද්ධස්ස, තස්මා යථා පුරෙ මහාකස්ස පාදයො මහාථෙරවරා පොරාණසංගීතිකාරා බ්‍රහ්මචරියසඞ්ඛාතස්ස බුද්ධසාසනස්ස චිරට්ඨිතියා, බහුජනහිතාය, බහුජනසුඛාය ලොකානුකම්පාය අත්ථාය, හිතාය, සුඛාය, දෙවමනුස්සානං ධම්මවිනයං සඞ්ගායිංසුචෙව අනුසඞ්ගායිංසුච, එවමෙව මයම්පි දානි සබ්බෙව ඡට්ඨසංගීතිමහාධම්මසභාපරියාපන්නා ඉදං දුතිය පාරාජික සික්ඛාපදං එකතො ගණසජ්ඣායං කත්වා සමග්ගා සම්මොදමානා හුත්වා සඞ්ගායෙය්‍යාම.
තතිය පාරාජික සික්ඛාපුච්ඡා
පුච්ඡා – යං තෙන ආවුසො භගවතා (ප) සම්මාසම්බුද්ධෙන තතියං පාරාජිකං කත්ථ පඤ්ඤත්තං.
විස්සජ්ජනා – වෙසාලියං භන්තෙ පඤ්ඤත්තං.
පුච්ඡා – කං ආවුසො ආරබ්භ පඤ්ඤත්තං.
විස්සජ්ජනා – සම්බහුලෙ භන්තෙ භික්ඛූ ආරබ්භ පඤ්ඤත්තං.
පුච්ඡා – කිස්මිං ආවුසො වත්ථුස්මිං පඤ්ඤත්තං.
විස්සජ්ජනා – සම්බහුලා භන්තෙ භික්ඛු අඤ්ඤමඤ්ඤං ජීවිතා වොරොපෙසුං, තස්මිං භන්තෙ වත්ථුස්මිං පඤ්ඤත්තං.
පුච්ඡා – අත්ථි නුඛො ආවුසො තත්ථ පඤ්ඤත්ති අනුපඤ්ඤත්ති අනුප්පන්නපඤ්ඤත්ති.
විස්සජ්ජනා – එකා භන්තෙ පඤ්ඤත්ති, එකා අනුපඤ්ඤත්ති, අනුප්පන්නපඤ්ඤත්ති තස්මිං නත්ථි.
පුච්ඡා – කා ආවුසො තත්ථ මූලපඤ්ඤත්ති.
විස්සජ්ජනා – යොපන භික්ඛු සඤ්චිච්ච මනුස්සවිග්ගහං ජීවිතා වොරොපෙය්‍ය, සත්ථහාරකංවාස්ස පරියෙසෙය්‍ය අයම්පි පාරාජිකො හොති අසංවාසොති අයං භන්තෙ තත්ථ මූලපඤ්ඤත්ති.
පුච්ඡා – කා ආවුසො තත්ථ අනුපඤ්ඤත්ති.
විස්සජ්ජනා – මරණවණ්ණං වා සංවණ්ණෙය්‍ය මරණාය වා සමාදපෙය්‍ය අම්භොපුරිස කිං තුය්හිමිනා පාපකෙන දුජ්ජීවිතෙන මතන්තෙ ජීවිතා
සෙය්‍යාති ඉති චිත්තමනො චිත්තසඞ්කප්පො අනෙකපරියායෙන මරණවණ්ණං වා සංවණ්ණෙය්‍ය මරණාය වා සමාදපෙය්‍යාති අයං භන්තෙ තත්ථ අනුපඤ්ඤත්ති.
පුච්ඡා – කා ආවුසො තත්ථ පරිපුණ්ණපඤ්ඤත්ති.