1. මුසාවාදවග්ග, 1. මුසාවාද සික්ඛාපුච්ඡා
පුච්ඡා – යං තෙන ආවුසො භගවතා ජානතා පස්සතා අරහතා සම්මාසම්බුද්ධෙන සම්පජානමුසාවාදෙ පාචිත්තියං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.
විස්සජ්ජනා – සාවත්ථියං භන්තෙ පඤ්ඤත්තං, හත්ථකං සක්යපුත්තං ආරබ්භ පඤ්ඤත්තං, හත්ථකො භන්තෙ සක්යපුත්තො තිත්ථියෙහි සද්ධිං සල්ලපන්තො අවජානිත්වා පටිජානාති පටිජානිත්වා අවජානාති, තස්මිං භන්තෙ වත්ථුස්මිං පඤ්ඤත්තං.