3. පත්තවග්ගො, 10. පරිණත සික්ඛාපුච්ඡා
පුච්ඡා – යං තෙන ආවුසො භගවතා පස්සතා අරහතා සම්මාසම්බුද්ධෙන ජානං සඞ්ඝිකං ලාභං අත්ථනො පරිණාමෙන්තස්ස නිස්සග්ගියං පාචිත්තියං කත්ථ පඤ්ඤත්තං.
විස්සජ්ජනා – සාවත්ථියං භන්තෙ පඤ්ඤත්තං.
පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තං.
විස්සජ්ජනා – ඡබ්බග්ගියෙ භන්තෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ ජානං සඞ්ඝිකං ලාභං පරිණතං අත්තනො පරිණාමෙසුං, තස්මිං භන්තෙ වත්ථුස්මිං පඤ්ඤත්තං.
පුච්ඡා – ජානං ආවුසො සඞ්ඝිකං ලාභං පරිණතං අත්තනො පරිණාමෙන්තො, කති ආපත්තියො ආපජ්ජති.
විස්සජ්ජනා – ජානං භන්තෙ සඞ්ඝිකං ලාභං පරිණතං අත්තනො පරිණාමෙන්තො ද්වෙ ආපත්තියො ආපජ්ජති, පරිණාමෙති පයොගෙ දුක්කටං, පරිණාමිතෙ නිස්සග්ගියං පාචිත්තියං, ජානං භන්තෙ සඞ්ඝිකං ලාභං පරිණතං අත්තනො පරිණාමෙන්තො ඉමා ද්වෙ ආපත්තියො ආපජ්ජති.
පුච්ඡා – කස්ස ආවුසො වචනං.
විස්සජ්ජනා – භගවතො භන්තෙ වචනං අරහතො සම්මාසම්බුද්ධස්ස.
පුච්ඡා – කෙනාවුසො ආභතං.
විස්සජ්ජනා – පරම්පරාය භන්තෙ ආභතං.
පුච්ඡා – අත්ථි නුඛො ආවුසො තත්ථ කොචිපි විරද්ධදොසො.
විස්සජ්ජනා – නත්ථි භන්තෙ.
සංගායනත්ථාය ඤාපනං
සුණාතු මෙ භන්තෙ සඞ්ඝො, අහං භන්තෙ ඉමෙසං සොළසන්නං නිස්සග්ගියපාචිත්තියසික්ඛාපදානං නිදානාදීනි අනෙකානි පුච්ඡිතබ්බානි ආයස්මන්තං විචිත්තසාරාභිවංසං තිපිටකධර ධම්මභණ්ඩාගාරිකං පුච්ඡිං, සො ච පුට්ඨො පුට්ඨො විස්සජ්ජෙති, ඉතිහිදං භන්තෙ සික්ඛාපදසඤ්ජාතං නිම්මලං සු පරිසුද්ධං තස්සෙව භගවතො වචනං අරහතො සම්මාසම්බුද්ධස්ස, තස්මා යථා පුරෙ මහාකස්සපාදයො මහාථෙර වරා පොරාණසංගීතිකාරා බ්‍රහ්මචරියසඞ්ඛාතස්ස බුද්ධසාසනස්ස චිරට්ඨිතියා බහුජනහිතාය බහුජනසුඛාය ලොකානුකම්පාය අත්ථාය හිතාය සුඛාය දෙවමනුස්සානං ධම්මවිනයං සංගායිංසුචෙව අනුසංගායිංසුච, එවමෙව මයම්පි දානි ඡට්ඨසංගීති මහාධම්මසභාපරියාපන්නා ඉමානි සික්ඛාපදානි යථානුප්පත්තට්ඨානතො පට්ඨාය එකතො ගණසජ්ඣායං කත්වා සංගායෙය්‍යාම.