2. කොසියවග්ග 8. රූපිය සික්ඛාපුච්ඡා
පුච්ඡා – රූපියං ආවුසො පටිග්ගණ්හන්තස්ස නිස්සග්ගියං පාචිත්තියං භගවතා කත්ථ පඤ්ඤත්තං.
විස්සජ්ජනා – රාජගහෙ භන්තෙ පඤ්ඤත්තං.
පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තං.
විස්සජ්ජනා – ආයස්මන්තං භන්තෙ උපනන්දං සක්‍යපුත්තං ආරබ්භ පඤ්ඤත්තං, ආයස්මා භන්තෙ උපනන්දො සක්‍යපුත්තො රූපියං පටිග්ගහෙසි, තස්මිං භන්තෙ වත්ථුස්මිං පඤ්ඤත්තං.
පුච්ඡා – කථං ආවුසො තත්ථ පටිපජ්ජන්තො රූපියං පටිග්ගණ්හාති නාම.
විස්සජ්ජනා – සයං භන්තෙ ගණ්හාති, අඤ්ඤං වා ගණ්හාපෙසි, ඉදං අය්‍යස්ස හොතූති උපනික්ඛිත්තං සාදියති, එවං ඛො භන්තෙ පටිපජ්ජන්තො භික්ඛු රූපියං පටිග්ගණ්හාති නාම.
පුච්ඡා – කථං ආවුසො තත්ථ පටිපජ්ජන්තො භික්ඛු රූපියං න පටිග්ගණ්හාති නාම.
විස්සජ්ජනා – යථා භන්තෙ රාජසික්ඛාපදෙ යථා ච භන්තෙ මෙණ්ඩකසික්ඛාපදෙ ආගච්ඡති, තථා භන්තෙ පටිපජ්ජන්තො භික්ඛු රූපියං න පටිග්ගණ්හාතිනාම.