2. කොසියවග්ග 9. රූපියසංවොහාර සික්ඛාපුච්ඡා

පුච්ඡා – රූපියසංවොහාරං ආවුසො සමාපජ්ජන්තස්ස නිස්සග්ගියං පාචිත්තියං භගවතා කත්ථ පඤ්ඤත්තං.

විස්සජ්ජනා – සාවත්ථියං භන්තෙ පඤ්ඤත්තං.

පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ඡබ්බග්ගියෙ භන්තෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ නානප්පකාරකං රූපියසංවොහාරං සමාපජ්ජිංසු, තස්මිං භන්තෙ වත්ථුස්මිං පඤ්ඤත්තං.

2. කොසියවග්ග, 10. කයවික්කය සික්ඛාපුච්ඡා

පුච්ඡා – නානප්පකාරකං ආවුසො කයවික්කයං ආපජ්ජන්තස්ස නිස්සග්ගියං පාචිත්තියං භගවතා කත්ථ පඤ්ඤත්තං.

විස්සජ්ජනා – සාවත්ථියං භන්තෙ පඤ්ඤත්තං.

පුච්ඡා – කං ආවුසො ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ආයස්මන්තං භන්තෙ උපනන්දං සක්‍යපුත්තං ආරබ්භ පඤ්ඤත්තං, ආයස්මා භන්තෙ උපනන්දො සක්‍යපුත්තො පරිබ්බාජකෙන සද්ධි කයවික්කයං සමාපජ්ජි, තස්මිං භන්තෙ වත්ථුස්මිං පඤ්ඤත්තං.

පුච්ඡා – කථං ආවුසො තත්ථ පටිපජ්ජන්තො භික්ඛු කයවික්කයං සමාපජ්ජතිනාම.

විස්සජ්ජනා – ඉමිනා ඉමං දෙහි ඉමිනා ඉමං ආහර ඉමිනා ඉමං පරිවත්තෙහි ඉමිනා ඉමං චෙතාමෙහීති අජ්ඣාචරති, එවං ඛො භන්තෙ පටිපජ්ජන්තො කයවික්කයං සමාපජ්ජතිනාම.

පුච්ඡා – කථං ආවුසො තත්ථ පටිපජ්ජන්තො භික්ඛු න කයවික්කයං සමාපජ්ජතිනාම.

විස්සජ්ජනා – යො භන්තෙ අග්ඝං පුච්ඡති, යො ච භන්තෙ කප්පියකාරකස්ස ආචික්ඛති, යො ච භන්තෙ අම්හාකඤ්ච ඉදං අත්ථි අම්හාකඤ්ච ඉමිනා ච ඉමිනා ච අත්ථොති භණති, එවං ඛො භන්තෙ පටිපජ්ජන්තො භික්ඛු න කයවික්කයං සමාපජ්ජතිනාම.