8. වත්තක්ඛන්ධක

පුච්ඡා – ආගන්තුකානං ආවුසො භික්ඛූනං වත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ ආගන්තුකෙ භික්ඛූ ආරබ්භ පඤ්ඤත්තං, ආගන්තුකා භන්තෙ භික්ඛූ සඋපාහනාපි ආරාමං පවිසිංසු, ඡත්තපග්ගහිතාපි ආරාමං පවිසිංසු, ඔගුණ්ඨිතාපි ආරාමං පවිසිංසු, සීසෙපි චීවරං කරිත්වා ආරාමං පවිසිංසු, පානීයෙනපි පාදෙ දොවිංසු, වුඩ්ඪතරෙපි ආවාසිකෙ භික්ඛූ නාභිවාදෙසුං, නපි සෙනාසනං පුච්ඡිංසු, තස්මිං භන්තෙ වත්ථුස්මිං ‘‘තෙන හි භික්ඛවෙ ආගන්තුකානං භික්ඛූනං වත්තං පඤ්ඤපෙස්සාමි, යථා ආගන්තුකෙහි භික්ඛූහි සම්මා වත්තිතබ්බං, ආගන්තුකෙන භික්ඛවෙ භික්ඛුනා ඉදානි ආරාමං පවිසිස්සාමීති උපාහනා ඔමුඤ්චිත්වා නීචං කත්වා පප්ඵොටෙත්වා ගහෙත්වා ඡත්තං අපනාමෙත්වා සීසං විවරිත්වා සීසෙ චීවරං ඛන්ධෙ කත්වා සාධුකං අතරමානෙන ආරාමො පවිසිතබ්බො’’ එවමාදිනා භන්තෙ ආගන්තුකානං භික්ඛූනං වත්තං පඤ්ඤත්තං.

පුච්ඡා – ආවාසිකානං ආවුසො භික්ඛූනං වත්තං භගවතා කත්ථ කං ආරබ්භ කිස්මිං වත්ථුස්මිං පඤ්ඤත්තං, කථඤ්ච පන පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ ආවාසිකෙ භික්ඛූ ආරබ්භ පඤ්ඤත්තං, සම්බහුලා භන්තෙ ආවාසිකා භික්ඛූ ආගන්තුකෙ භික්ඛූ දිස්වා නෙව ආසනං පඤ්ඤපෙසුං, න පාදොදකං පාදපීඨං පාදකථලිකං උපනික්ඛිපිංසු, න පච්චුග්ගන්ත්වා පත්තචීවරං පටිග්ගහෙසුං, න සෙනාසනං පඤ්ඤපෙසුං, තස්මිං භන්තෙ වත්ථුස්මිං පඤ්ඤත්තං, තස්මිං භන්තෙ වත්ථුස්මිං –

‘‘ආවාසිකෙන භික්ඛවෙ භික්ඛුනා ආගන්තුකං භික්ඛුං වුඩ්ඪතරං දිස්වා ආසනං පඤ්ඤපෙතබ්බං, පාදොදකං පාදපීඨං පාදකථලිකං උපනික්ඛිපිතබ්බං, පච්චුග්ගන්ත්වා පත්තචීවරං පටිග්ගහෙතබ්බං පානීයෙන පුච්ඡිතබ්බො’’ එවමාදිනා භන්තෙ ආවාසිකානං භික්ඛූනං වත්තං භගවතා පඤ්ඤත්තං.

පුච්ඡා – ගමිකානං ආවුසො භික්ඛූනං වත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං, කථඤ්චපන පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ ගමිකෙ භික්ඛූ ආරබ්භ පඤ්ඤත්තං, සම්බහුලා භන්තෙ ගමිකා භික්ඛූ දාරුභණ්ඩං මත්තිකාභණ්ඩං අප්පටිසාමෙත්වා ද්වාරවාතපානං විවරිත්වා සෙනාසනං අනාපුච්ඡා පක්කමිංසු, තස්මිං භන්තෙ වත්ථුස්මිං ‘‘ගමිකෙන භික්ඛවෙ භික්ඛුනා දාරුභණ්ඩං පටිසාමෙත්වා ද්වාරවාතපානං ථකෙත්වා සෙනාසනං ආපුච්ඡා පක්කමිතබ්බං’’ එවමාදිනා භන්තෙ ආකාරෙන භගවතා ගමිකානං භික්ඛූනං වත්තං පඤ්ඤත්තං.

පුච්ඡා – භත්තග්ගෙ ආවුසො අනුමොදිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ භත්තග්ගෙ නානුමොදිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – භික්ඛූනං ආවුසො භත්තග්ගවත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ දුන්නිවත්ථා දුප්පාරුතා අනාකප්පසම්පන්නා භත්තග්ගං ගච්ඡිංසු, තස්මිං භන්තෙ වත්ථුස්මිං ‘‘සචෙ ආරාමෙ කාලො ආරොචිතො හොති, තිමණ්ඩලං පටිච්ඡාදෙන්තෙන පරිමණ්ඩලං නිවාසෙත්වා කායබන්ධනං බන්ධිත්වා සගුණං කත්වා සඞ්ඝාටියො පාරුපිත්වා ගණ්ඨිකං පටිමුඤ්චිත්වා ධොවිත්වා පත්තං ගහෙත්වා සාධුකං අතරමානෙන ගාමො පවිසිතබ්බො’’ති එවමාදිනා භන්තෙ භත්තග්ගවත්තං පඤ්ඤත්තං.

පුච්ඡා – භික්ඛූනං ආවුසො සෙනාසනවත්තං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං, කථඤ්ච තං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ භික්ඛූසු අජ්ඣොකාසෙ චීවරං කරොන්තෙසු පටිවාතෙ අඞ්ගණෙ සෙනාසනං පප්ඵොටෙසුං, තස්මිං භන්තෙ වත්ථුස්මිං ‘‘යස්මිං විහාරෙ විහරති, සචෙ සො විහාරො උක්ලාපො හොති, සචෙ උස්සහති සොධෙතබ්බො’’ති එවමාදිනා භන්තෙ භික්ඛූනං සෙනාසනවත්තං භගවතා පඤ්ඤත්තං.

පුච්ඡා – සමාචාරං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – සමාචාරං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.