6. චම්පෙය්‍යක්ඛන්ධක
පුච්ඡා – සුද්ධං ආවුසො භික්ඛුං අනාපත්තිකං අවත්ථුස්මිං අකාරණෙ උක්ඛිපන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.
විස්සජ්ජනා – චම්පායං භන්තෙ සම්බහුලෙ භික්ඛූ ආරබ්භ පඤ්ඤත්තං, භගවති භන්තෙ චම්පායං විහරති සම්බහුලා භික්ඛූ කාසීසු වාසභගාමෙ සුද්ධං කස්සපගොත්තං භික්ඛුං අනාපත්තිකං අවත්ථුස්මිං අකාරණෙ උක්ඛිපිංසු, තස්මිං භන්තෙ වත්ථුස්මිං පඤ්ඤත්තං.
පුච්ඡා – චම්පෙය්‍යකං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.
විස්සජ්ජනා – චම්පෙය්‍යකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.