10. කොසම්බකක්ඛන්ධක

පුච්ඡා – භෙදගරුකෙහි භික්ඛවෙ භික්ඛූහි න සො භික්ඛු ආපත්තියා අදස්සනෙ උක්ඛිපිතබ්බොති ච, භෙදගරුකෙන භික්ඛවෙ භික්ඛුනා පරෙසම්පි සද්ධාය ආපත්තිදෙසෙතබ්බාති ච ආවුසො අයං සාමග්ගිරසඔවාදො භගවතා කත්ථ දින්නො, කං ආරබ්භ කිස්මිං වත්ථුස්මිං දින්නො.

විස්සජ්ජනා – කොසම්බියං භන්තෙ සම්බහුලෙ භික්ඛූ ආරබ්භ දින්නො, භගවති භන්තෙ කොසම්බියං විහරති අඤ්ඤතරො භික්ඛු ආපත්තිං ආපන්නො අහොසි, සො තස්සා ආපත්තියා ආපත්ති දිට්ඨි අහොසි, අඤ්ඤෙ භික්ඛූ තස්සා ආපත්තියා අනාපත්ති දිට්ඨිනො අහෙසුං. සො අපරෙන සමයෙන තස්සා ආපත්තියා අනාපත්තිදිට්ඨි අහොසි, අඤ්ඤෙ භික්ඛූ තස්සා ආපත්තියා ආපත්තිදිට්ඨිනො අහෙසුං. අථ ඛො තෙ භන්තෙ භික්ඛූ සාමග්ගිං ලභිත්වා තං භික්ඛුං ආපත්තියා අදස්සනෙ උක්ඛිපිංසු, තස්මිං භන්තෙ වත්ථුස්මිං දින්නො.

පුච්ඡා – සඞ්ඝභෙදස්ස ආවුසො මූලභූතෙ භික්ඛුම්හි උක්ඛිත්තකෙ ඔසාරිතෙ තස්ස වත්ථුස්ස වූපසමාය සඞ්ඝසාමග්ගිඤ්ච කාතුං සාමග්ගී උපොසථඤ්ච කාතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ තෙයෙව උක්ඛිත්තකානුවත්තකෙ භික්ඛූ ආරබ්භ අනුඤ්ඤාතං, තෙ භන්තෙ උක්ඛිත්තකානුවත්තකා භික්ඛූ තං උක්ඛිත්තකං භික්ඛුං ඔසාරෙත්වා යෙන උක්ඛෙපකා භික්ඛූ තෙනුපසඞ්කමිංසු උපසඞ්කමිත්වා තෙ උක්ඛෙපකෙ භික්ඛූ එකදවොචුං ‘‘යස්මිං ආවුසො වත්ථුස්මිං අහොසි සඞ්ඝස්ස භණ්ඩනං කලහො විග්ගහො විවාදො සඞ්ඝභෙදො සඞ්ඝරාජි සඞ්ඝවවත්ථානං සඞ්ඝනානාකරණං, සො එසො භික්ඛුං ආපන්නො ච උක්ඛිත්තො ච පස්සි ච ඔසාරිතො ච, හන්ද මයං ආවුසො තස්ස වත්ථුස්ස වූපසමාය සඞ්ඝසාමග්ගිං කරොමා’’ති, තස්මිං භන්තෙ වත්ථුස්මිං අනුඤ්ඤාතං.

පුච්ඡා – කොසම්බකං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – කොසම්බකං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ එකා ආපත්ති.