8. චීවරක්ඛන්ධක

ජීවකවත්ථු

පුච්ඡා – ගහපතිචීවරං ආවුසො සාදියිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ ජීවකං කොමාරභච්චං ආරබ්භ අනුඤ්ඤාතං, ජීවකො භන්තෙ කොමාරභච්චො භික්ඛූනං ගහපතිචීවරං අනුජානිතුං භගවන්තං යාචි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – ඡ ආවුසො රජනානි භගවතා කත්ථ අනුඤ්ඤාතානි, කිස්මිං වත්ථුස්මිං අනුඤ්ඤාතානි.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතානි, සම්බහුලා භන්තෙ භික්ඛූ ඡකණෙනපි පණ්ඩුමත්තිකායපි චීවරං රජිංසු, චීවරං දුබ්බණ්ණං හොති, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – අච්ඡින්නකානි ආවුසො චීවරානි ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ අච්ඡින්නකානි චීවරානි ධාරෙසුං දන්තකසාවානි, තස්මිං භන්තෙ වත්ථුස්මිං පඤ්ඤත්තං.

පුච්ඡා – කදා ආවුසො භගවා අනුඤ්ඤාසි ඡින්නකං සඞ්ඝාටිං ඡින්නකං උත්තරාසඞ්ගං ඡින්නකං අන්තරවාසකං.

විස්සජ්ජනා – දක්ඛිණාගිරිතො භන්තෙ පච්ඡාගතකාලෙ භගවා අනුඤ්ඤාසි ඡින්නකං සඞ්ඝාටිං ඡින්නකං උත්තරාසඞ්ගං ඡින්නකං අන්තරවාසකං.

පුච්ඡා – අග්ගළං ච ආවුසො තුන්නඤ්ච ඔවට්ටිකඤ්ච කණ්ඩුසකඤ්ච දළ්හීකම්මඤ්ච භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – බාරාණසියං භන්තෙ අඤ්ඤතරං භික්ඛුං ආරබ්භ අනුඤ්ඤාතං, අඤ්ඤතරො භන්තෙ භික්ඛු අග්ගළං අච්ඡුපෙසි, තස්මිං භන්තෙ වත්ථුස්මිං අනුඤ්ඤාතං.

පුච්ඡා – වස්සිකසාටිකා ච ආවුසො ආගන්තුකභත්තඤ්ච ගමිකභත්තඤ්ච ගිලානභත්තඤ්ච ගිලානුපට්ඨාකභත්තඤ්ච ගිලානභෙසජ්ජඤ්ච ධුවයාගු ච භික්ඛුනිසඞ්ඝස්ස උදකසාටිකාචාති ඉමා අට්ඨ භගවතා කත්ථ අනුඤ්ඤාතා, කං ආරබ්භ කිස්මිං වත්ථුස්මිං අනුඤ්ඤාතා.

විස්සජ්ජනා – සාවත්ථියං භන්තෙ විසාඛං මිගාරමාතරං ආරබ්භ අනුඤ්ඤාතා, විසාඛා භන්තෙ මිගාරමාතා භගවන්තං අට්ඨවරානි යාචි, තස්මිං භන්තෙ වත්ථුස්මිං අනුඤ්ඤාතා.

පුච්ඡා – භගවතා ආවුසො මාතාපිතූනං දානං අනුජානිත්වා සද්ධාදෙය්‍යං විනිපාතෙන්තස්ස දුක්කටං කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරස්ස භන්තෙ භික්ඛුනො බහුං චීවරං උප්පන්නං අහොසි, සො ච තංචීවරං මාතාපිතූනං දාතුකාමො අහොසි, තස්මිං භන්තෙ වත්ථුස්මිං පඤ්ඤත්තං.

මාතාපිතරොති ඛො භික්ඛවෙ දදමානෙ කිං වදෙය්‍යාම, අනුජානාමි භික්ඛවෙ මාතාපිතූනං දාතුං, න ච භික්ඛවෙ සද්ධාදෙය්‍යං විනිපාතෙතබ්බං, යො විනිපාතෙය්‍ය ආපත්ති දුක්කටස්ස –

පුච්ඡා – අඤ්ඤත්‍ර වස්සං වුට්ඨෙන ආවුසො අඤ්ඤත්‍ර චීවරභාගං සාදියන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ආයස්මන්තං උපනන්දං සක්‍යපුත්තං ආරබ්භ පඤ්ඤත්තං, ආයස්මා භන්තෙ උපනන්දො සක්‍යපුත්තො අඤ්ඤත්‍ර වස්සං වුට්ඨො අඤ්ඤත්‍ර චීවරභාගං සාදියි, තස්මිං භන්තෙ වත්ථුස්මිං පඤ්ඤත්තං.

පුච්ඡා – අනාථකං ආවුසො භික්ඛුං ගිලානං න උපට්ඨහන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, භගවති භන්තෙ සාවත්ථියං විහරති අඤ්ඤතරස්ස භික්ඛුනො කුච්ඡිවිකාරාබාධො අහොසි, සො සකෙ මුත්තකරීසෙ පලිපන්නො සයි, තස්මිං භන්තෙ වත්ථුස්මිං පඤ්ඤත්තං.

පුච්ඡා – නග්ගියං ආවුසො තිත්ථියසමාදානං සමාදියන්තස්ස ථුල්ලච්චයං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු නග්ගියං තිත්ථියසමාදානං සමාදියි, තස්මිං භන්තෙ වත්ථුස්මිං පඤ්ඤත්තං.

පුච්ඡා – සබ්බනීලකානි වා ආවුසො චීවරානි සබ්බපීතකානි වා සබ්බලොහිතකානි වා සබ්බමඤ්ජිට්ඨකානි වා සබ්බකණ්හානිවාති එවරූපානි චීවරානි ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙ භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ සබ්බනීලකාදීනි චීවරානි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – කඤ්චුකං වා ආවුසො වෙඨනං වා ධාරෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ ඡබ්බග්ගියෙව භික්ඛූ ආරබ්භ පඤ්ඤත්තං, ඡබ්බග්ගියා භන්තෙ භික්ඛූ කඤ්චුකම්පි ධාරෙසුං වෙඨනම්පි ධාරෙසුං, තස්මිං භන්තෙ වත්ථුස්මිං පඤ්ඤත්තං.

පුච්ඡා – චීවරසඤ්ඤුත්තං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – චීවරසඤ්ඤුත්තං විස්සජ්ජිස්සං, සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.