6. භෙසජ්ජක්ඛන්ධක

පුච්ඡා – පඤ්ච ආවුසො භෙසජ්ජානි පටිග්ගහෙත්වා කාලෙපි විකාලෙපි පරිභුඤ්ජිතුං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලානං භන්තෙ භික්ඛූනං සාරදිකෙන ආබාධෙන පුට්ඨානං යාගුපි න සම්මා පරිණාමං ගච්ඡි, භත්තම්පි භුත්තං න සම්මා පරිණාමං ගච්ඡි, තෙ තෙන කිසා අහෙසුං ලූඛා දුබ්බණ්ණා උප්පණ්ඩුප්පණ්ඩුකජාතා ධමනිසන්ථතගත්තා, තස්මිං භන්තෙ වත්ථුස්මිං අනුඤ්ඤාතං.

පුච්ඡා – මූලාදිභෙසජ්ජානි ආවුසො භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – සාවත්ථියං භන්තෙ සම්බහුලෙ ගිලානෙ භික්ඛූ ආරබ්භ අනුඤ්ඤාතානි, සම්බහුලානං ගිලානානං භික්ඛූනං මූලෙහි භෙසජ්ජෙහි අත්ථො අහොසි, තස්මිං භන්තෙ වත්ථුස්මිං අනුඤ්ඤාතානි.

පුච්ඡා – අන්තොවුට්ඨංවා ආවුසො අන්තොපක්කං වා සාමංපක්කං වා පරිභුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – රාජගහෙ භන්තෙ ආයස්මන්තං ආනන්දං ආරබ්භ පඤ්ඤත්තං, ආයස්මා භන්තෙ ආනන්දො සාමං තිලම්පි තණ්ඩුලම්පි මුග්ගම්පි විඤ්ඤාපෙත්වා අන්තො වාසෙත්වා අන්තො සාමං පචි, තස්මිං භන්තෙ වත්ථුස්මිං පඤ්ඤත්තං.

සුප්පියා වත්ථු

පුච්ඡා – මනුස්සමංසං ආවුසො පරිභුඤ්ජන්තස්ස ථුල්ලච්චයඤ්ච අප්පටිවෙක්ඛිත්වා මංසං පරිභුඤ්ජන්තස්ස දුක්කටඤ්ච භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියං භන්තෙ අඤ්ඤතරං භික්ඛුං ආරබ්භ පඤ්ඤත්තං, අඤ්ඤතරො භන්තෙ භික්ඛු අප්පටිවෙක්ඛිත්වා මනුස්සමංසං භුඤ්ජි, තස්මිං භන්තෙ වත්ථුස්මිං පඤ්ඤත්තං.

න භික්ඛවෙ මනුස්සමංසං පරිභුඤ්ජිතබ්බං, යො පරිභුඤ්ජෙය්‍ය, ආපත්ති ථුල්ලච්චයස්ස, න ච භික්ඛවෙ අප්පටිවෙක්ඛිත්වා මංසං පරිභුඤ්ජිතබ්බං, යො පරිභුඤ්ජෙය්‍ය ආපත්ති දුක්කටස්ස.

පුච්ඡා – හත්ථිමංසං වා ආවුසො අස්සමංසං වා පරිභුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ හත්ථිමංසම්පි අස්සමංසම්පි පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සුනක්ඛමංසං වා ආවුසො අහිමංසං වා භුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ සුනක්ඛමංසම්පි අහිමංසම්පි පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – සීහමංසං වා ආවුසො බ්‍යග්ඝමංසං වා දීපිමංසං වා අච්ඡමංසං වා තරච්ඡමංසං වා භුඤ්ජන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – බාරාණසියංයෙව භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලා භන්තෙ භික්ඛූ සීහමංසම්පි බ්‍යග්ඝමංසම්පි දීපිමංසම්පි අච්ඡමංසම්පි තරච්ඡමංසම්පි පරිභුඤ්ජිංසු, තස්මිං භන්තෙ වත්ථුස්මිං පඤ්ඤත්තං.

පුච්ඡා – ගිලානස්ස ආවුසො ගුළං වා අගිලානස්ස ගුළොදකං වා භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – රාජගහෙ භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ ගිලානස්සෙව භගවතා ගුළො අනුඤ්ඤාතො නො අගිලානස්සාති කුක්කුච්චායන්තා ගුළං න භුඤ්ජිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – ජානං ආවුසො උද්දිස්ස කතං මංසං පරිභුඤ්ජන්තස්ස දුක්කටං පඤ්ඤපෙත්වා තිකොටිපරිසුද්ධං මංසං භගවතා කත්ථ අනුඤ්ඤාතං.

විස්සජ්ජනා – වෙසාලියං භන්තෙ සීහස්ස සෙටාපතිනො වත්ථුස්මිං අනුඤ්ඤාතං.

මෙණ්ඩක වත්ථු

පුච්ඡා – පාථෙය්‍යං ආවුසො පරියෙසිතුඤ්ච කප්පියකාරකානං හත්ථෙ උපනික්ඛිත්තහිරඤ්ඤතො නිබ්බත්තං කප්පියපච්චයං සාදිතුඤ්ච භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – අන්තරා ච භන්තෙ භද්දියං අන්තරා ච අඞ්ගුත්තරාපං මෙණ්ඩකං ගහපතිං ආරබ්භ අනුඤ්ඤාතං, මෙණ්ඩකො භන්තෙ ගහපති භගවන්තං යාචි ‘‘සන්ති භන්තෙ මග්ගා කන්තාරා අප්පොදකා අප්පභක්ඛා න සුකරා අපාථෙය්‍යෙන ගන්තුං, සාධු භන්තෙ භගවා භික්ඛූනං පාථෙය්‍යං අනුජානාතූ’’ති, තස්මිං භන්තෙ වත්ථුස්මිං අනුඤ්ඤාතං.

කෙණිය වත්ථු

පුච්ඡා – අට්ඨ ආවුසො පානානි භගවතා කත්ථ අනුඤ්ඤාතානි, කං ආරබ්භ කිස්මිං වත්ථුස්මිං අනුඤ්ඤාතානි.

විස්සජ්ජනා – ආපණෙ භන්තෙ සම්බහුලෙ භික්ඛූ ආරබ්භ අනුඤ්ඤාතානි, සම්බහුලා භන්තෙ භික්ඛූ කුක්කුච්චායන්තා පානානි න පටිග්ගණ්හිංසු, තස්මිං භන්තෙ වත්ථුස්මිං අනුඤ්ඤාතානි.

රොජමල්ලා වත්ථු

පුච්ඡා – සබ්බඤ්ච ආවුසො ඩාකං සබ්බඤ්ච පිට්ඨඛාදනීයං භගවතා කත්ථ අනුඤ්ඤාතං, කං ආරබ්භ කිස්මිං වත්ථුස්මිං අනුඤ්ඤාතං.

විස්සජ්ජනා – කුසිනාරායං භන්තෙ සම්බහුලෙ භික්ඛූ ආරබ්භ අනුඤ්ඤාතං, සම්බහුලා භන්තෙ භික්ඛූ කුක්කුච්චායන්තා ඩාකඤ්ච පිට්ඨඛාදනීයඤ්ච න පටිග්ගහෙසුං, තස්මිං භන්තෙ වත්ථුස්මිං අනුඤ්ඤාතං.

පුච්ඡා – අකප්පියං ආවුසො සමාදපෙන්තස්ස දුක්කටං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – ආතුමායං භන්තෙ අඤ්ඤතරං වුඩ්ඪපබ්බජිතං ආරබ්භ පඤ්ඤත්තං, අඤ්ඤතරො භන්තෙ වුඩ්ඪපබ්බජිතො අකප්පියෙ සමාදපෙති, තස්මිං භන්තෙ වත්ථුස්මිං පඤ්ඤත්තං.

පුච්ඡා – සඞ්ඝිකානි වා ආවුසො පුග්ගලිකානි වා බීජානි පුග්ගලිකාය වා සඞ්ඝිකාය වා භූමියා රොපිතානි භාගං දත්වා පරිභුඤ්ජිතුං භගවතා කත්ථ අනුඤ්ඤාතං, කිස්මිං වත්ථුස්මිං අනුඤ්ඤාතං.

විස්සජ්ජනා – සාවත්ථියං භන්තෙ අනුඤ්ඤාතං, සාවත්ථියං භන්තෙ භගවති විහරති සඞ්ඝිකානිපි බීජානි පුග්ගලිකාය භූමියා රොපියිංසු, පුග්ගලිකානිපි බීජානි සඞ්ඝිකාය භූමියා රොපියිංසු, තස්මිං භන්තෙ වත්ථුස්මිං අනුඤ්ඤාතං.

පුච්ඡා – විනයමහාපදෙසසඞ්ඛාතානි ආවුසො චත්තාරි කප්පියාකප්පියඅනුලොමානි භගවතා කත්ථ පඤ්ඤත්තානි, කං ආරබ්භ කිස්මිං වත්ථුස්මිං පඤ්ඤත්තානි.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තානි, සම්බහුලානං භන්තෙ භික්ඛූනං කිස්මිඤ්චි කිස්මිඤ්චිඨානෙ කුක්කුච්චං උප්පජ්ජි, තස්මිං භන්තෙ වත්ථුස්මිං පඤ්ඤත්තානි.

පුච්ඡා – යාවකාලිකාදීහි සංසට්ඨානං ආවුසො යාමකාලිකාදීනං පරිභොගකාලමරියාදං භගවතා කත්ථ පඤ්ඤත්තං, කං ආරබ්භ කිස්මිං වත්ථුස්මිං පඤ්ඤත්තං.

විස්සජ්ජනා – සාවත්ථියං භන්තෙ සම්බහුලෙ භික්ඛූ ආරබ්භ පඤ්ඤත්තං, සම්බහුලානං භන්තෙ භික්ඛූනං එතදහොසි ‘‘කප්පති නුඛො යාවකාලිකෙන යාමකාලිකං සත්තාහකාලිකං යාවජීවිකං, න නුඛො කප්පති. කප්පතිනුඛො යාමකාලිකෙන සත්තාහකාලිකං යාවජීවිකං, න නුඛො කප්පති. කප්පති නුඛො සත්තාහකාලිකෙන යාවජීවිකං, න නුඛො කප්පතී’’ති. තස්මිං භන්තෙ වත්ථුස්මිං පඤ්ඤත්තං.

පුච්ඡා – භෙසජ්ජකං පුච්ඡිස්සං, සනිදානං සනිද්දෙසං. සමුක්කට්ඨපදානං ආවුසො කති ආපත්තියො.

විස්සජ්ජනා – භෙසජ්ජකං විස්සජ්ජිස්සං සනිදානං සනිද්දෙසං. සමුක්කට්ඨපදානං භන්තෙ තිස්සො ආපත්තියො.