၂. စတုဝိပတ္တိံ

၃၃၆. ယံ တံ [ယံ ယံ (က.)] ပုစ္ဆိမှ အကိတ္တယိ နော၊

တံ တံ ဗျာကတံ အနညထာ၊

အညံ တံ ပုစ္ဆာမိ တဒိင်္ဃ ဗြူဟိ၊

ဂရုက လဟုကဉ္စာပိ သာဝသေသံ၊

အနဝသေသံ ဒုဋ္ဌုလ္လဉ္စ အဒုဋ္ဌုလ္လံ၊

ယေ စ ယာဝတတိယကာ.

သာဓာရဏံ အသာဓာရဏံ၊

ဝိဘတ္တိယော စ [ဝိပတ္တိယော စ (သီ. သျာ.)] ယေဟိ သမထေဟိ သမ္မန္တိ၊

သဗ္ဗာနိပေတာနိ ဝိယာကရောဟိ၊

ဟန္ဒ ဝါကျံ သုဏောမ တေ.

ဧကတိံသာ ယေ ဂရုကာ၊ အဋ္ဌေတ္ထ အနဝသေသာ၊

ယေ ဂရုကာ တေ ဒုဋ္ဌုလ္လာ၊ ယေ ဒုဋ္ဌုလ္လာ သာ သီလဝိပတ္တိ၊

ပါရာဇိကံ သံဃာဒိသေသော၊ ‘‘သီလဝိပတ္တီ’’တိ ဝုစ္စတိ.

ထုလ္လစ္စယံ ပါစိတ္တိယာ၊ ပါဋိဒေသနီယံ ဒုက္ကဋံ၊

ဒုဗ္ဘာသိတံ ယော စာယံ၊ အက္ကောသတိ ဟသာဓိပ္ပါယော၊

အယံ သာ အာစာရဝိပတ္တိသမ္မတာ.

ဝိပရီတဒိဋ္ဌိံ ဂဏှန္တိ၊ အသဒ္ဓမ္မေဟိ ပုရက္ခတာ၊

အဗ္ဘာစိက္ခန္တိ သမ္ဗုဒ္ဓံ၊ ဒုပ္ပညာ မောဟပါရုတာ၊

အယံ သာ ဒိဋ္ဌိဝိပတ္တိသမ္မတာ.

အာဇီဝဟေတု အာဇီဝကာရဏာ ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ၊ အာဇီဝဟေတု အာဇီဝကာရဏာ သဉ္စရိတ္တံ သမာပဇ္ဇတိ၊ အာဇီဝဟေတု အာဇီဝကာရဏာ – ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိ ဘဏတိ၊ အာဇီဝဟေတု အာဇီဝကာရဏာ ဘိက္ခု ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ၊ အာဇီဝဟေတု အာဇီဝကာရဏာ ဘိက္ခုနီ ပဏီတဘောဇနာနိ အတ္တနော အတ္ထာယ ဝိညာပေတွာ ဘုဉ္ဇတိ၊ အာဇီဝဟေတု အာဇီဝကာရဏာ သူပံ ဝါ ဩဒနံ ဝါ အဂိလာနော အတ္တနော အတ္ထာယ ဝိညာပေတွာ ဘုဉ္ဇတိ. အယံ သာ အာဇီဝဝိပတ္တိ သမ္မတာ.

ဧကာဒသ ယာဝတတိယကာ၊ တေ သုဏောဟိ ယထာတထံ၊

ဥက္ခိတ္တာနုဝတ္တိကာ၊ အဋ္ဌ ယာဝတတိယကာ၊

အရိဋ္ဌော စဏ္ဍကာဠီ စ၊ ဣမေ တေ ယာဝတတိယကာ.