၇. သာဓာရဏဝါရော

၂၉၇. ကတိ သမထာ ဝိဝါဒါဓိကရဏဿ သာဓာရဏာ? ကတိ သမထာ ဝိဝါဒါဓိကရဏဿ အသာဓာရဏာ? ကတိ သမထာ အနုဝါဒါဓိကရဏဿ သာဓာရဏာ? ကတိ သမထာ အနုဝါဒါဓိကရဏဿ အသာဓာရဏာ? ကတိ သမထာ အာပတ္တာဓိကရဏဿ သာဓာရဏာ? ကတိ သမထာ အာပတ္တာဓိကရဏဿ အသာဓာရဏာ? ကတိ သမထာ ကိစ္စာဓိကရဏဿ သာဓာရဏာ? ကတိ သမထာ ကိစ္စာဓိကရဏဿ အသာဓာရဏာ?

ဒွေ သမထာ ဝိဝါဒါဓိကရဏဿ သာဓာရဏာ – သမ္မုခါဝိနယော၊ ယေဘုယျသိကာ. ပဉ္စ သမထာ ဝိဝါဒါဓိကရဏဿ အသာဓာရဏာ – သတိဝိနယော၊ အမူဠှဝိနယော၊ ပဋိညာတကရဏံ၊ တဿပါပိယသိကာ၊ တိဏဝတ္ထာရကော.

စတ္တာရော သမထာ အနုဝါဒါဓိကရဏဿ သာဓာရဏာ – သမ္မုခါဝိနယော၊ သတိဝိနယော၊ အမူဠှဝိနယော၊ တဿပါပိယသိကာ. တယော သမထာ အနုဝါဒါဓိကရဏဿ အသာဓာရဏာ – ယေဘုယျသိကာ၊ ပဋိညာတကရဏံ၊ တိဏဝတ္ထာရကော.

တယော သမထာ အာပတ္တာဓိကရဏဿ သာဓာရဏာ – သမ္မုခါဝိနယော၊ ပဋိညာတကရဏံ၊ တိဏဝတ္ထာရကော. စတ္တာရော သမထာ အာပတ္တာဓိကရဏဿ အသာဓာရဏာ – ယေဘုယျသိကာ၊ သတိဝိနယော၊ အမူဠှဝိနယော၊ တဿပါပိယသိကာ.

ဧကော သမထော ကိစ္စာဓိကရဏဿ သာဓာရဏော – သမ္မုခါဝိနယော. ဆ သမထာ ကိစ္စာဓိကရဏဿ အသာဓာရဏာ – ယေဘုယျသိကာ၊ သတိဝိနယော၊ အမူဠှဝိနယော၊ ပဋိညာတကရဏံ၊ တဿပါပိယသိကာ၊ တိဏဝတ္ထာရကော.

သာဓာရဏဝါရော နိဋ္ဌိတော သတ္တမော.