၂၀. သမုဋ္ဌာပနဝါရော

၃၁၄. ဝိဝါဒါဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? ဝိဝါဒါဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ၊ ဝိဝါဒါဓိကရဏပစ္စယာ စတ္တာရော အဓိကရဏာ ဇာယန္တိ. ယထာ ကထံ ဝိယ? [စူဠဝ. ၂၁၅၊ ပရိ. ၃၄၈ အာဒယော] ဣဓ ဘိက္ခူ ဝိဝဒန္တိ – ‘‘ဓမ္မောတိ ဝါ၊ အဓမ္မောတိ ဝါ၊ ဝိနယောတိ ဝါ၊ အဝိနယောတိ ဝါ၊ အဘာသိတံ အလပိတံ တထာဂတေနာတိ ဝါ၊ ဘာသိတံ လပိတံ တထာဂတေနာတိ ဝါ၊ အနာစိဏ္ဏံ တထာဂတေနာတိ ဝါ၊ အာစိဏ္ဏံ တထာဂတေနာတိ ဝါ၊ အပညတ္တံ တထာဂတေနာတိ ဝါ၊ ပညတ္တံ တထာဂတေနာတိ ဝါ၊ အာပတ္တီတိ ဝါ၊ အနာပတ္တီတိ ဝါ၊ လဟုကာ အာပတ္တီတိ ဝါ၊ ဂရုကာ အာပတ္တီတိ ဝါ၊ သာဝသေသာ အာပတ္တီတိ ဝါ၊ အနဝသေသာ အာပတ္တီတိ ဝါ၊ ဒုဋ္ဌုလ္လာ အာပတ္တီတိ ဝါ အဒုဋ္ဌုလ္လာ အာပတ္တီတိ ဝါ’’. ယံ တတ္ထ ဘဏ္ဍနံ ကလဟော ဝိဂ္ဂဟော ဝိဝါဒေါ နာနာဝါဒေါ အညထာဝါဒေါ ဝိပစ္စတာယ ဝေါဟာရော မေဓကံ [မေဓဂံ (က.)]၊ ဣဒံ ဝုစ္စတိ ဝိဝါဒါဓိကရဏံ. ဝိဝါဒါဓိကရဏေ သံဃော ဝိဝဒတိ. ဝိဝါဒါဓိကရဏံ ဝိဝဒမာနော အနုဝဒတိ. အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ. တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ. ဧဝံ ဝိဝါဒါဓိကရဏပစ္စယာ စတ္တာရော အဓိကရဏာ ဇာယန္တိ.

၃၁၅. အနုဝါဒါဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? အနုဝါဒါဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ၊ အနုဝါဒါဓိကရဏပစ္စယာ စတ္တာရော အဓိကရဏာ ဇာယန္တိ. ယထာ ကထံ ဝိယ? [စူဠဝ. ၂၁၅၊ ပရိ. ၃၄၈ အာဒယော] ဣဓ ဘိက္ခူ ဘိက္ခုံ အနုဝဒန္တိ သီလဝိပတ္တိယာ ဝါ အာစာရဝိပတ္တိယာ ဝါ ဒိဋ္ဌိဝိပတ္တိယာ ဝါ အာဇီဝဝိပတ္တိယာ ဝါ. ယော တတ္ထ အနုဝါဒေါ အနုဝဒနာ အနုလ္လပနာ အနုဘဏနာ အနုသမ္ပဝင်္ကတာ အဗ္ဘုဿဟနတာ အနုဗလပ္ပဒါနံ၊ ဣဒံ ဝုစ္စတိ အနုဝါဒါဓိကရဏံ. အနုဝါဒါဓိကရဏေ သံဃော ဝိဝဒတိ. ဝိဝါဒါဓိကရဏံ ဝိဝဒမာနော အနုဝဒတိ. အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ. တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ. ဧဝံ အနုဝါဒါဓိကရဏပစ္စယာ စတ္တာရော အဓိကရဏာ ဇာယန္တိ.

၃၁၆. အာပတ္တာဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? အာပတ္တာဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ၊ အာပတ္တာဓိကရဏပစ္စယာ စတ္တာရော အဓိကရဏာ ဇာယန္တိ. ယထာ ကထံ ဝိယ? ပဉ္စပိ အာပတ္တိက္ခန္ဓာ အာပတ္တာဓိကရဏံ၊ သတ္တပိ အာပတ္တိက္ခန္ဓာ အာပတ္တာဓိကရဏံ၊ ဣဒံ ဝုစ္စတိ အာပတ္တာဓိကရဏံ. အာပတ္တာဓိကရဏေ သံဃော ဝိဝဒတိ. ဝိဝါဒါဓိကရဏံ ဝိဝဒမာနော အနုဝဒတိ. အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ. တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ. ဧဝံ အာပတ္တာဓိကရဏပစ္စယာ စတ္တာရော အဓိကရဏာ ဇာယန္တိ.

၃၁၇. ကိစ္စာဓိကရဏံ စတုန္နံ အဓိကရဏာနံ ကတမံ အဓိကရဏံ သမုဋ္ဌာပေတိ? ကိစ္စာဓိကရဏံ စတုန္နံ အဓိကရဏာနံ န ကတမံ အဓိကရဏံ သမုဋ္ဌာပေတိ၊ အပိစ ကိစ္စာဓိကရဏပစ္စယာ စတ္တာရော အဓိကရဏာ ဇာယန္တိ. ယထာ ကထံ ဝိယ? ယာ သံဃဿ ကိစ္စယတာ ကရဏီယတာ အပလောကနကမ္မံ ဉတ္တိကမ္မံ ဉတ္တိဒုတိယကမ္မံ ဉတ္တိစတုတ္ထကမ္မံ၊ ဣဒံ ဝုစ္စတိ ကိစ္စာဓိကရဏံ. ကိစ္စာဓိကရဏေ သံဃော ဝိဝဒတိ. ဝိဝါဒါဓိကရဏံ ဝိဝဒမာနော အနုဝဒတိ. အနုဝါဒါဓိကရဏံ အနုဝဒမာနော အာပတ္တိံ အာပဇ္ဇတိ အာပတ္တာဓိကရဏံ. တာယ အာပတ္တိယာ သံဃော ကမ္မံ ကရောတိ ကိစ္စာဓိကရဏံ. ဧဝံ ကိစ္စာဓိကရဏပစ္စယာ စတ္တာရော အဓိကရဏာ ဇာယန္တိ.

သမုဋ္ဌာပနဝါရော နိဋ္ဌိတော ဝီသတိမော.