၁၆. သံသဋ္ဌဝါရော

၃၀၆. အဓိကရဏန္တိ ဝါ သမထာတိ ဝါ ဣမေ ဓမ္မာ သံသဋ္ဌာ ဥဒါဟု ဝိသံသဋ္ဌာ? လဗ္ဘာ စ ပနိမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ [ဝိနိဗ္ဘုဇ္ဇိတွာ ဝိနိဗ္ဘုဇ္ဇိတွာ (က.)၊ ဋီကာယံ ဧကပဒမေဝ ဒိဿတိ] နာနာကရဏံ ပညာပေတုန္တိ?

အဓိကရဏန္တိ ဝါ သမထာတိ ဝါ ဣမေ ဓမ္မာ ဝိသံသဋ္ဌာ၊ နော သံသဋ္ဌာ. လဗ္ဘာ စ ပနိမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုန္တိ. သော – ‘‘မာ ဟေဝ’’န္တိဿ ဝစနီယော. အဓိကရဏန္တိ ဝါ သမထာတိ ဝါ ဣမေ ဓမ္မာ သံသဋ္ဌာ၊ နော ဝိသံသဋ္ဌာ. နော စ လဗ္ဘာ [န စ လဗ္ဘာ (က.)] ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတုံ. တံ ကိဿ ဟေတု? နနု ဝုတ္တံ ဘဂဝတာ – ‘‘စတ္တာရိမာနိ၊ ဘိက္ခဝေ၊ အဓိကရဏာနိ၊ သတ္တ သမထာ. အဓိကရဏာ သမထေဟိ သမ္မန္တိ၊ သမထာ အဓိကရဏေဟိ သမ္မန္တိ. ဧဝံ၊ ဣမေ ဓမ္မာ သံသဋ္ဌာ နော ဝိသံသဋ္ဌာ၊ နော စ လဗ္ဘာ ဣမေသံ ဓမ္မာနံ ဝိနိဗ္ဘုဇိတွာ ဝိနိဗ္ဘုဇိတွာ နာနာကရဏံ ပညာပေတု’’န္တိ.

သံသဋ္ဌဝါရော နိဋ္ဌိတော သောဠသမော.