၁၂. ဝိနယဝါရော

၃၀၂. ဝိနယော သမ္မုခါဝိနယော၊ သမ္မုခါဝိနယော ဝိနယော? ဝိနယော ယေဘုယျသိကာ၊ ယေဘုယျသိကာ ဝိနယော? ဝိနယော သတိဝိနယော၊ သတိဝိနယော ဝိနယော? ဝိနယော အမူဠှဝိနယော၊ အမူဠှဝိနယော ဝိနယော? ဝိနယော ပဋိညာတကရဏံ၊ ပဋိညာတကရဏံ ဝိနယော? ဝိနယော တဿပါပိယသိကာ၊ တဿပါပိယသိကာ ဝိနယော? ဝိနယော တိဏဝတ္ထာရကော၊ တိဏဝတ္ထာရကော ဝိနယော?

ဝိနယော သိယာ သမ္မုခါဝိနယော သိယာ န သမ္မုခါဝိနယော. သမ္မုခါဝိနယော ဝိနယော စေဝ သမ္မုခါဝိနယော စ.

ဝိနယော သိယာ ယေဘုယျသိကာ၊ သိယာ န ယေဘုယျသိကာ. ယေဘုယျသိကာ ဝိနယော စေဝ ယေဘုယျသိကာ စ.

ဝိနယော သိယာ သတိဝိနယော၊ သိယာ န သတိဝိနယော. သတိဝိနယော ဝိနယော စေဝ သတိဝိနယော စ.

ဝိနယော သိယာ အမူဠှဝိနယော၊ သိယာ န အမူဠှဝိနယော. အမူဠှဝိနယော ဝိနယော စေဝ အမူဠှဝိနယော စ.

ဝိနယော သိယာ ပဋိညာတကရဏံ၊ သိယာ န ပဋိညာတကရဏံ. ပဋိညာတကရဏံ ဝိနယော စေဝ ပဋိညာတကရဏဉ္စ.

ဝိနယော သိယာ တဿပါပိယသိကာ၊ သိယာ န တဿပါပိယသိကာ. တဿပါပိယသိကာ ဝိနယော စေဝ တဿပါပိယသိကာ စ.

ဝိနယော သိယာ တိဏဝတ္ထာရကော၊ သိယာ န တိဏဝတ္ထာရကော. တိဏဝတ္ထာရကော ဝိနယော စေဝ တိဏဝတ္ထာရကော စ.

ဝိနယဝါရော နိဋ္ဌိတော ဒွါဒသမော.