၅. ကထိနသမုဋ္ဌာနံ

၂၆၂. ဥဗ္ဘတံ ကထိနံ တီဏိ၊ ပဌမံ ပတ္တဘေသဇ္ဇံ၊

အစ္စေကံ စာပိ သာသင်္ကံ၊ ပက္ကမန္တေန ဝါ ဒုဝေ.

ဥပဿယံ ပရမ္ပရာ၊ အနတိရိတ္တံ နိမန္တနာ၊

ဝိကပ္ပံ ရညော ဝိကာလေ၊ ဝေါသာသာရညကေန စ.

ဥဿယာသန္နိစယဉ္စ၊ ပုရေ ပစ္ဆာ ဝိကာလေ စ၊

ပဉ္စာဟိကာ သင်္ကမနီ၊ ဒွေပိ အာဝသထေန စ.

ပသာခေ အာသနေ စေဝ၊ တိံသ ဧကူနကာ ဣမေ၊

ကာယဝါစာ န စ စိတ္တာ [န စိတ္တတော (သျာ.)]၊ တီဟိ ဒွါရေဟိ ဇာယရေ.

ဒွိသမုဋ္ဌာနိကာ သဗ္ဗေ၊ ကထိနေန သဟာသမာ.

ကထိနသမုဋ္ဌာနံ နိဋ္ဌိတံ.