၃. သဉ္စရိတ္တသမုဋ္ဌာနံ

၂၆၀. သဉ္စရီ ကုဋိ ဝိဟာရော၊ ဓောဝနဉ္စ ပဋိဂ္ဂဟော၊

ဝိညတ္တုတ္တရိ အဘိဟဋ္ဌုံ၊ ဥဘိန္နံ ဒူတကေန စ.

ကောသိယာ သုဒ္ဓဒွေဘာဂါ၊ ဆဗ္ဗဿာနိ နိသီဒနံ၊

ရိဉ္စန္တိ ရူပိကာ စေဝ၊ ဥဘော နာနပ္ပကာရကာ.

ဦနဗန္ဓနဝဿိကာ၊ သုတ္တံ ဝိကပ္ပနေန စ၊

ဒွါရဒါနသိဗ္ဗာနိ [ဒွါရဒါနသိဗ္ဗိနီ (သီ. သျာ.)] စ၊ ပူဝပစ္စယဇောတိ စ.

ရတနံ သူစိ မဉ္စော စ၊ တူလံ နိသီဒနကဏ္ဍု စ၊

ဝဿိကာ စ သုဂတေန၊ ဝိညတ္တိ အညံ စေတာပနာ.

ဒွေ သံဃိကာ မဟာဇနိကာ၊ ဒွေ ပုဂ္ဂလလဟုကာ ဂရု၊

ဒွေ ဝိဃာသာ သာဋိကာ စ၊ သမဏစီဝရေန စ.

သမပညာသိမေ ဓမ္မာ၊ ဆဟိ ဌာနေဟိ ဇာယရေ၊

ကာယတော န ဝါစာစိတ္တာ၊ ဝါစတော န ကာယမနာ.

ကာယဝါစာ န စ စိတ္တာ [န စိတ္တတော (သီ. သျာ.)]၊ ကာယစိတ္တာ န ဝါစိကာ [န ဝါစတော (သီ. သျာ.)]၊

ဝါစာစိတ္တာ န ကာယေန၊ တီဟိ ဒွါရေဟိ [တီဟိ ဌာနေဟိ (သျာ.)] ဇာယရေ.

ဆသမုဋ္ဌာနိကာ ဧတေ၊ သဉ္စရိတ္တေန သာဒိသာ.

သဉ္စရိတ္တသမုဋ္ဌာနံ နိဋ္ဌိတံ.