၂. စောဒကာဒိပဋိပတ္တိ

၃၆၃. စောဒကေန ကထံ ပဋိပဇ္ဇိတဗ္ဗံ? စုဒိတကေန ကထံ ပဋိပဇ္ဇိတဗ္ဗံ? သံဃေန ကထံ ပဋိပဇ္ဇိတဗ္ဗံ? အနုဝိဇ္ဇကေန ကထံ ပဋိပဇ္ဇိတဗ္ဗံ? စောဒကေန ကထံ ပဋိပဇ္ဇိတဗ္ဗန္တိ? စောဒကေန ပဉ္စသု ဓမ္မေသု ပတိဋ္ဌာယ ပရော စောဒေတဗ္ဗော. ကာလေန ဝက္ခာမိ နော အကာလေန၊ ဘူတေန ဝက္ခာမိ နော အဘူတေန၊ သဏှေန ဝက္ခာမိ နော ဖရုသေန၊ အတ္ထသံဟိတေန ဝက္ခာမိ နော အနတ္ထသံဟိတေန၊ မေတ္တာစိတ္တော ဝက္ခာမိ နော ဒေါသန္တရောတိ – စောဒကေန ဧဝံ ပဋိပဇ္ဇိတဗ္ဗံ. စုဒိတကေန ကထံ ပဋိပဇ္ဇိတဗ္ဗန္တိ? စုဒိတကေန ဒွီသု ဓမ္မေသု ပဋိပဇ္ဇိတဗ္ဗံ. သစ္စေ စ အကုပ္ပေ စ – စုဒိတကေန ဧဝံ ပဋိပဇ္ဇိတဗ္ဗံ. သံဃေန ကထံ ပဋိပဇ္ဇိတဗ္ဗန္တိ? သံဃေန ဩတိဏ္ဏာနောတိဏ္ဏံ ဇာနိတဗ္ဗံ. သံဃေန ဧဝံ ပဋိပဇ္ဇိတဗ္ဗံ. အနုဝိဇ္ဇကေန ကထံ ပဋိပဇ္ဇိတဗ္ဗန္တိ? အနုဝိဇ္ဇကေန ယေန ဓမ္မေန ယေန ဝိနယေန ယေန သတ္ထုသာသနေန တံ အဓိကရဏံ ဝူပသမ္မတိ တထာ တံ အဓိကရဏံ ဝူပသမေတဗ္ဗံ. အနုဝိဇ္ဇကေန ဧဝံ ပဋိပဇ္ဇိတဗ္ဗံ.

၃၆၄. ဥပေါသထော ကိမတ္ထာယ၊ ပဝါရဏာ ကိဿ ကာရဏာ၊

ပရိဝါသော ကိမတ္ထာယ၊ မူလာယပဋိကဿနာ ကိဿ ကာရဏာ၊

မာနတ္တံ ကိမတ္ထာယ၊ အဗ္ဘာနံ ကိဿ ကာရဏာ.

ဥပေါသထော သာမဂ္ဂတ္ထာယ၊ ဝိသုဒ္ဓတ္ထာယ ပဝါရဏာ၊

ပရိဝါသော မာနတ္တတ္ထာယ၊ မူလာယပဋိကဿနာ နိဂ္ဂဟတ္ထာယ၊

မာနတ္တံ အဗ္ဘာနတ္ထာယ၊ ဝိသုဒ္ဓတ္ထာယ အဗ္ဘာနံ.

ဆန္ဒာ ဒေါသာ ဘယာ မောဟာ၊ ထေရေ စ ပရိဘာသတိ၊

ကာယဿ ဘေဒါ ဒုပ္ပညော၊ ခတော ဥပဟတိန္ဒြိယော၊

နိရယံ ဂစ္ဆတိ ဒုမ္မေဓော၊ န စ သိက္ခာယ ဂါရဝေါ.

န စ အာမိသံ နိဿာယ၊

န စ နိဿာယ ပုဂ္ဂလံ၊

ဥဘော ဧတေ ဝိဝဇ္ဇေတွာ၊

ယထာဓမ္မော တထာ ကရေ.