၃. စောဒကဿအတ္တဈာပနံ
ကောဓနော ဥပနာဟီ စ၊
စဏ္ဍော စ ပရိဘာသကော၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ဥပကဏ္ဏကံ ဇပ္ပတိ ဇိမှံ ပေက္ခတိ၊
ဝီတိဟရတိ ကုမ္မဂ္ဂံ ပဋိသေဝတိ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
အကာလေန စောဒေတိ အဘူတေန၊
ဖရုသေန အနတ္ထသံဟိတေန၊
ဒေါသန္တရော စောဒေတိ နော မေတ္တာစိတ္တော၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ဓမ္မာဓမ္မံ န ဇာနာတိ၊
ဓမ္မာဓမ္မဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ဝိနယာဝိနယံ န ဇာနာတိ၊
ဝိနယာဝိနယဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ဘာသိတာဘာသိတံ န ဇာနာတိ၊
ဘာသိတာဘာသိတဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
အာစိဏ္ဏာနာစိဏ္ဏံ န ဇာနာတိ၊
အာစိဏ္ဏာနာစိဏ္ဏဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ပညတ္တာပညတ္တံ န ဇာနာတိ၊
ပညတ္တာပညတ္တဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
အာပတ္တာနာပတ္တိံ န ဇာနာတိ၊
အာပတ္တာနာပတ္တိယာ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
လဟုကဂရုကံ န ဇာနာတိ၊
လဟုကဂရုကဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
သာဝသေသာနဝသေသံ န ဇာနာတိ၊
သာဝသေသာနဝသေသဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ဒုဋ္ဌုလ္လာဒုဋ္ဌုလ္လံ န ဇာနာတိ၊
ဒုဋ္ဌုလ္လာဒုဋ္ဌုလ္လဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
ပုဗ္ဗာပရံ န ဇာနာတိ၊
ပုဗ္ဗာပရဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနံ.
အနုသန္ဓိဝစနပထံ န ဇာနာတိ၊
အနုသန္ဓိဝစနပထဿ အကောဝိဒေါ၊
အနာပတ္တိယာ အာပတ္တီတိ ရောပေတိ၊
တာဒိသော စောဒကော ဈာပေတိ အတ္တာနန္တိ.
စောဒနာကဏ္ဍံ နိဋ္ဌိတံ.