၅. စိတ္တာဂါရဝဂ္ဂေါ

၂၃၅. ရာဇာဂါရံ ဝါ စိတ္တာဂါရံ ဝါ အာရာမံ ဝါ ဥယျာနံ ဝါ ပေါက္ခရဏိံ ဝါ ဒဿနာယ ဂစ္ဆန္တီ ဒွေ အာပတ္တိယော အာပဇ္ဇတိ. ဂစ္ဆတိ၊ အာပတ္တိ ဒုက္ကဋဿ၊ ယတ္ထ ဌိတာ ပဿတိ၊ အာပတ္တိ ပါစိတ္တိယဿ.

အာသန္ဒိံ ဝါ ပလ္လင်္ကံ ဝါ ပရိဘုဉ္ဇန္တီ ဒွေ အာပတ္တိယော အာပဇ္ဇတိ. ပရိဘုဉ္ဇတိ၊ ပယောဂေ ဒုက္ကဋံ၊ ပရိဘုတ္တေ၊ အာပတ္တိ ပါစိတ္တိယဿ.

သုတ္တံ ကန္တန္တီ ဒွေ အာပတ္တိယော အာပဇ္ဇတိ. ကန္တတိ၊ ပယောဂေ ဒုက္ကဋံ၊ ဥဇ္ဇဝုဇ္ဇဝေ၊ အာပတ္တိ ပါစိတ္တိယဿ.

ဂိဟိဝေယျာဝစ္စံ ကရောန္တီ ဒွေ အာပတ္တိယော အာပဇ္ဇတိ. ကရောတိ၊ ပယောဂေ ဒုက္ကဋံ၊ ကတေ၊ အာပတ္တိ ပါစိတ္တိယဿ.

ဘိက္ခုနိယာ – ‘‘ဧဟာယျေ ဣမံ အဓိကရဏံ ဝူပသမေဟီ’’တိ ဝုစ္စမာနာ – ‘‘သာဓူ’’တိ ပဋိဿုဏိတွာ နေဝ ဝူပသမေန္တီ န ဝူပသမာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ. ပါစိတ္တိယံ.

အဂါရိကဿ ဝါ ပရိဗ္ဗာဇကဿ ဝါ ပရိဗ္ဗာဇိကာယ ဝါ သဟတ္ထာ ခါဒနီယံ ဝါ ဘောဇနီယံ ဝါ ဒေန္တီ ဒွေ အာပတ္တိယော အာပဇ္ဇတိ. ဒေတိ၊ ပယောဂေ ဒုက္ကဋံ၊ ဒိန္နေ၊ အာပတ္တိ ပါစိတ္တိယဿ.

အာဝသထစီဝရံ အနိဿဇ္ဇိတွာ ပရိဘုဉ္ဇန္တီ ဒွေ အာပတ္တိယော အာပဇ္ဇတိ. ပရိဘုဉ္ဇတိ၊ ပယောဂေ ဒုက္ကဋံ၊ ပရိဘုတ္တေ၊ အာပတ္တိ ပါစိတ္တိယဿ.

အာဝသထံ အနိဿဇ္ဇိတွာ စာရိကံ ပက္ကမန္တီ ဒွေ အာပတ္တိယော အာပဇ္ဇတိ. ပဌမံ ပါဒံ ပရိက္ခေပံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.

တိရစ္ဆာနဝိဇ္ဇံ ပရိယာပုဏန္တီ ဒွေ အာပတ္တိယော အာပဇ္ဇတိ. ပရိယာပုဏာတိ၊ ပယောဂေ ဒုက္ကဋံ၊ ပဒေ ပဒေ အာပတ္တိ ပါစိတ္တိယဿ.

တိရစ္ဆာနဝိဇ္ဇံ ဝါစေန္တီ ဒွေ အာပတ္တိယော အာပဇ္ဇတိ. ဝါစေတိ၊ ပယောဂေ ဒုက္ကဋံ၊ ပဒေ ပဒေ အာပတ္တိ ပါစိတ္တိယဿ.

စိတ္တာဂါရဝဂ္ဂေါ ပဉ္စမော.