၆. အာရာမဝဂ္ဂေါ

၂၃၆. ဇာနံ သဘိက္ခုကံ အာရာမံ အနာပုစ္ဆာ ပဝိသန္တီ ဒွေ အာပတ္တိယော အာပဇ္ဇတိ. ပဌမံ ပါဒံ ပရိက္ခေပံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.

ဘိက္ခုံ အက္ကောသန္တီ ပရိဘာသန္တီ ဒွေ အာပတ္တိယော အာပဇ္ဇတိ. အက္ကောသတိ၊ ပယောဂေ ဒုက္ကဋံ၊ အက္ကောသိတေ၊ အာပတ္တိ ပါစိတ္တိယဿ.

စဏ္ဍီကတာ ဂဏံ ပရိဘာသန္တီ ဒွေ အာပတ္တိယော အာပဇ္ဇတိ. ပရိဘာသတိ၊ ပယောဂေ ဒုက္ကဋံ၊ ပရိဘာသိတေ၊ အာပတ္တိ ပါစိတ္တိယဿ.

နိမန္တိတာ ဝါ ပဝါရိတာ ဝါ ခါဒနီယံ ဝါ ဘောဇနီယံ ဝါ ဘုဉ္ဇန္တီ ဒွေ အာပတ္တိယော အာပဇ္ဇတိ. ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.

ကုလံ မစ္ဆရာယန္တီ ဒွေ အာပတ္တိယော အာပဇ္ဇတိ. မစ္ဆရာယတိ၊ ပယောဂေ ဒုက္ကဋံ၊ မစ္ဆရိတေ၊ အာပတ္တိ ပါစိတ္တိယဿ.

အဘိက္ခုကေ အာဝါသေ ဝဿံ ဝသန္တီ ဒွေ အာပတ္တိယော အာပဇ္ဇတိ. ‘‘ဝဿံ ဝသိဿာမီ’’တိ သေနာသနံ ပညပေတိ ပါနီယံ ပရိဘောဇနီယံ ဥပဋ္ဌပေတိ ပရိဝေဏံ သမ္မဇ္ဇတိ၊ အာပတ္တိ ဒုက္ကဋဿ၊ သဟ အရုဏုဂ္ဂမနာ အာပတ္တိ ပါစိတ္တိယဿ.

ဝဿံဝုဋ္ဌာ ဘိက္ခုနီ ဥဘတောသံဃေ တီဟိ ဌာနေဟိ န ပဝါရေန္တီ ဧကံ အာပတ္တိံ အာပဇ္ဇတိ. ပါစိတ္တိယံ.

ဩဝါဒါယ ဝါ သံဝါသာယ ဝါ န ဂစ္ဆန္တီ ဧကံ အာပတ္တိံ အာပဇ္ဇတိ. ပါစိတ္တိယံ.

ဥပေါသထမ္ပိ န ပုစ္ဆန္တီ ဩဝါဒမ္ပိ န ယာစန္တီ ဧကံ အာပတ္တိံ အာပဇ္ဇတိ. ပါစိတ္တိယံ.

ပသာခေ ဇာတံ ဂဏ္ဍံ ဝါ ရုဓိတံ ဝါ အနပလောကေတွာ သံဃံ ဝါ ဂဏံ ဝါ ပုရိသေန သဒ္ဓိံ ဧကေနေကာ ဘေဒါပေန္တီ ဒွေ အာပတ္တိယော အာပဇ္ဇတိ. ဘေဒါပေတိ၊ ပယောဂေ ဒုက္ကဋံ၊ ဘိန္နေ၊ အာပတ္တိ ပါစိတ္တိယဿ.

အာရာမဝဂ္ဂေါ ဆဋ္ဌော.