၄. တုဝဋ္ဋဝဂ္ဂေါ

၂၃၄. ဒွေ ဘိက္ခုနိယော ဧကမဉ္စေ တုဝဋ္ဋေန္တိယော ဒွေ အာပတ္တိယော အာပဇ္ဇန္တိ. နိပဇ္ဇန္တိ၊ ပယောဂေ ဒုက္ကဋံ၊ နိပန္နေ၊ အာပတ္တိ ပါစိတ္တိယဿ.

ဒွေ ဘိက္ခုနိယော ဧကတ္ထရဏပါဝုရဏာ တုဝဋ္ဋေန္တိယော ဒွေ အာပတ္တိယော အာပဇ္ဇန္တိ. နိပဇ္ဇန္တိ၊ ပယောဂေ ဒုက္ကဋံ၊ နိပန္နေ၊ အာပတ္တိ ပါစိတ္တိယဿ.

ဘိက္ခုနိယာ သဉ္စိစ္စ အဖာသုံ ကရောန္တီ ဒွေ အာပတ္တိယော အာပဇ္ဇတိ. ကရောတိ၊ ပယောဂေ ဒုက္ကဋံ၊ ကတေ၊ အာပတ္တိ ပါစိတ္တိယဿ.

ဒုက္ခိတံ သဟဇီဝိနိံ နေဝ ဥပဋ္ဌေန္တီ န ဥပဋ္ဌာပနာယ ဥဿုက္ကံ ကရောန္တီ ဧကံ အာပတ္တိံ အာပဇ္ဇတိ. ပါစိတ္တိယံ.

ဘိက္ခုနိယာ ဥပဿယံ ဒတွာ ကုပိတာ အနတ္တမနာ နိက္ကဍ္ဎန္တီ ဒွေ အာပတ္တိယော အာပဇ္ဇတိ. နိက္ကဍ္ဎတိ၊ ပယောဂေ ဒုက္ကဋံ၊ နိက္ကဍ္ဎိတေ၊ အာပတ္တိ ပါစိတ္တိယဿ.

သံသဋ္ဌာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇန္တီ ဒွေ အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ကမ္မဝါစာပရိယောသာနေ အာပတ္တိ ပါစိတ္တိယဿ.

အန္တောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တီ ဒွေ အာပတ္တိယော အာပဇ္ဇတိ. ပဋိပဇ္ဇတိ၊ ပယောဂေ ဒုက္ကဋံ၊ ပဋိပန္နေ၊ အာပတ္တိ ပါစိတ္တိယဿ.

တိရောရဋ္ဌေ သာသင်္ကသမ္မတေ သပ္ပဋိဘယေ အသတ္ထိကာ စာရိကံ စရန္တီ ဒွေ အာပတ္တိယော အာပဇ္ဇတိ. ပဋိပဇ္ဇတိ၊ ပယောဂေ ဒုက္ကဋံ၊ ပဋိပန္နေ၊ အာပတ္တိ ပါစိတ္တိယဿ.

အန္တောဝဿံ စာရိကံ စရန္တီ ဒွေ အာပတ္တိယော အာပဇ္ဇတိ. ပဋိပဇ္ဇတိ၊ ပယောဂေ ဒုက္ကဋံ၊ ပဋိပန္နေ၊ အာပတ္တိ ပါစိတ္တိယဿ.

ဝဿံဝုဋ္ဌာ ဘိက္ခုနီ စာရိကံ န ပက္ကမန္တီ ဧကံ အာပတ္တိံ အာပဇ္ဇတိ. ပါစိတ္တိယံ.

တုဝဋ္ဋဝဂ္ဂေါ စတုတ္ထော.