၁. လသုဏဝဂ္ဂေါ

၂၃၁. လသုဏံ ခါဒန္တီ ဒွေ အာပတ္တိယော အာပဇ္ဇတိ. ခါဒိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.

သမ္ဗာဓေ လောမံ သံဟရာပေန္တီ ဒွေ အာပတ္တိယော အာပဇ္ဇတိ. သံဟရာပေတိ၊ ပယောဂေ ဒုက္ကဋံ၊ သံဟရာပိတေ အာပတ္တိ ပါစိတ္တိယဿ.

တလဃာတကံ ကရောန္တီ ဒွေ အာပတ္တိယော အာပဇ္ဇတိ. ကရောတိ၊ ပယောဂေ ဒုက္ကဋံ၊ ကတေ အာပတ္တိ ပါစိတ္တိယဿ.

ဇတုမဋ္ဌကံ အာဒိယန္တီ ဒွေ အာပတ္တိယော အာပဇ္ဇတိ. အာဒိယတိ၊ ပယောဂေ ဒုက္ကဋံ၊ အာဒိန္နေ အာပတ္တိ ပါစိတ္တိယဿ.

အတိရေကဒွင်္ဂုလပဗ္ဗပရမံ ဥဒကသုဒ္ဓိကံ အာဒိယန္တီ ဒွေ အာပတ္တိယော အာပဇ္ဇတိ. အာဒိယတိ၊ ပယောဂေ ဒုက္ကဋံ၊ အာဒိန္နေ အာပတ္တိ ပါစိတ္တိယဿ.

ဘိက္ခုဿ ဘုဉ္ဇန္တဿ ပါနီယေန ဝါ ဝိဓူပနေန ဝါ ဥပတိဋ္ဌန္တီ ဒွေ အာပတ္တိယော အာပဇ္ဇတိ. ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ၊ ဟတ္ထပါသံ ဝိဇဟိတွာ တိဋ္ဌတိ၊ အာပတ္တိ ဒုက္ကဋဿ.

အာမကဓညံ ဝိညာပေတွာ ဘုဉ္ဇန္တီ ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါစိတ္တိယဿ.

ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ တိရောကုဋ္ဋေ ဝါ တိရောပါကာရေ ဝါ ဆဍ္ဍေန္တီ ဒွေ အာပတ္တိယော အာပဇ္ဇတိ. ဆဍ္ဍေတိ၊ ပယောဂေ ဒုက္ကဋံ၊ ဆဍ္ဍိတေ အာပတ္တိ ပါစိတ္တိယဿ.

ဥစ္စာရံ ဝါ ပဿာဝံ ဝါ သင်္ကာရံ ဝါ ဝိဃာသံ ဝါ ဟရိတေ ဆဍ္ဍေန္တီ ဒွေ အာပတ္တိယော အာပဇ္ဇတိ. ဆဍ္ဍေတိ၊ ပယောဂေ ဒုက္ကဋံ၊ ဆဍ္ဍိတေ အာပတ္တိ ပါစိတ္တိယဿ.

နစ္စံ ဝါ ဂီတံ ဝါ ဝါဒိတံ ဝါ ဒဿနာယ ဂစ္ဆန္တီ ဒွေ အာပတ္တိယော အာပဇ္ဇတိ. ဂစ္ဆတိ၊ အာပတ္တိ ဒုက္ကဋဿ၊ ယတ္ထ ဌိတာ ပဿတိ ဝါ သုဏာတိ ဝါ၊ အာပတ္တိ ပါစိတ္တိယဿ.

လသုဏဝဂ္ဂေါ ပဌမော.