၂. ရတ္တန္ဓကာရဝဂ္ဂေါ

၂၃၂. ရတ္တန္ဓကာရေ အပ္ပဒီပေ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ. ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ၊ ဟတ္ထပါသံ ဝိဇဟိတွာ တိဋ္ဌတိ၊ အာပတ္တိ ဒုက္ကဋဿ.

ပဋိစ္ဆန္နေ ဩကာသေ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ. ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ၊ ဟတ္ထပါသံ ဝိဇဟိတွာ တိဋ္ဌတိ၊ အာပတ္တိ ဒုက္ကဋဿ.

အဇ္ဈောကာသေ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ. ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ၊ ဟတ္ထပါသံ ဝိဇဟိတွာ တိဋ္ဌတိ၊ အာပတ္တိ ဒုက္ကဋဿ.

ရထိကာယ ဝါ ဗျူဟေ ဝါ သိင်္ဃာဋကေ ဝါ ပုရိသေန သဒ္ဓိံ ဧကေနေကာ သန္တိဋ္ဌန္တီ ဒွေ အာပတ္တိယော အာပဇ္ဇတိ. ဟတ္ထပါသေ တိဋ္ဌတိ၊ အာပတ္တိ ပါစိတ္တိယဿ၊ ဟတ္ထပါသံ ဝိဇဟိတွာ တိဋ္ဌတိ၊ အာပတ္တိ ဒုက္ကဋဿ.

ပုရေဘတ္တံ ကုလာနိ ဥပသင်္ကမိတွာ အာသနေ နိသီဒိတွာ သာမိကေ အနာပုစ္ဆာ ပက္ကမန္တီ ဒွေ အာပတ္တိယော အာပဇ္ဇတိ. ပဌမံ ပါဒံ အနောဝဿကံ အတိက္ကာမေတိ၊ အာပတ္တိ ဒုက္ကဋဿ၊ ဒုတိယံ ပါဒံ အတိက္ကာမေတိ၊ အာပတ္တိ ပါစိတ္တိယဿ.

ပစ္ဆာဘတ္တံ ကုလာနိ ဥပသင်္ကမိတွာ သာမိကေ အနာပုစ္ဆာ အာသနေ နိသီဒန္တီ ဒွေ အာပတ္တိယော အာပဇ္ဇတိ. နိသီဒတိ၊ ပယောဂေ ဒုက္ကဋံ၊ နိသိန္နေ အာပတ္တိ ပါစိတ္တိယဿ.

ဝိကာလေ ကုလာနိ ဥပသင်္ကမိတွာ သာမိကေ အနာပုစ္ဆာ သေယျံ သန္ထရိတွာ ဝါ သန္ထရာပေတွာ ဝါ အဘိနိသီဒန္တီ ဒွေ အာပတ္တိယော အာပဇ္ဇတိ. အဘိနိသီဒတိ၊ ပယောဂေ ဒုက္ကဋံ၊ အဘိနိသိန္နေ အာပတ္တိ ပါစိတ္တိယဿ.

ဒုဂ္ဂဟိတေန ဒူပဓာရိတေန ပရံ ဥဇ္ဈာပေန္တီ ဒွေ အာပတ္တိယော အာပဇ္ဇတိ. ဥဇ္ဈာပေတိ၊ ပယောဂေ ဒုက္ကဋံ၊ ဥဇ္ဈာပိတေ အာပတ္တိ ပါစိတ္တိယဿ.

အတ္တာနံ ဝါ ပရံ ဝါ နိရယေန ဝါ ဗြဟ္မစရိယေန ဝါ အဘိသပန္တီ ဒွေ အာပတ္တိယော အာပဇ္ဇတိ. အဘိသပတိ၊ ပယောဂေ ဒုက္ကဋံ၊ အဘိသပိတေ အာပတ္တိ ပါစိတ္တိယဿ.

အတ္တာနံ ဝဓိတွာ ဝဓိတွာ ရောဒန္တီ ဒွေ အာပတ္တိယော အာပဇ္ဇတိ. ဝဓတိ ရောဒတိ၊ အာပတ္တိ ပါစိတ္တိယဿ၊ ဝဓတိ န ရောဒတိ၊ အာပတ္တိ ဒုက္ကဋဿ.

ရတ္တန္ဓကာရဝဂ္ဂေါ ဒုတိယော.