၂. သံဃာဒိသေသကဏ္ဍာဒိ

၂၅၀. ဥဿယဝါဒိကာ ဘိက္ခုနီ အဍ္ဍံ ကရဏပစ္စယာ တိဿော အာပတ္တိယော အာပဇ္ဇတိ. ဧကဿ အာရောစေတိ၊ အာပတ္တိ ဒုက္ကဋဿ၊ ဒုတိယဿ အာရောစေတိ၊ အာပတ္တိ ထုလ္လစ္စယဿ၊ အဍ္ဍပရိယောသာနေ အာပတ္တိ သံဃာဒိသေသဿ.

စောရိံ ဝုဋ္ဌာပနပစ္စယာ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

ဧကာ ဂါမန္တရံ ဂမနပစ္စယာ တိဿော အာပတ္တိယော အာပဇ္ဇတိ. ဂစ္ဆတိ၊ အာပတ္တိ ဒုက္ကဋဿ၊ ပဌမံ ပါဒံ ပရိက္ခေပံ အတိက္ကာမေတိ၊ အာပတ္တိ ထုလ္လစ္စယဿ၊ ဒုတိယံ ပါဒံ အတိက္ကာမေတိ၊ အာပတ္တိ သံဃာဒိသေသဿ.

သမဂ္ဂေန သံဃေန ဥက္ခိတ္တံ ဘိက္ခုနိံ ဓမ္မေန ဝိနယေန သတ္ထုသာသနေန အနပလောကေတွာ ကာရကသံဃံ အနညာယ ဂဏဿ ဆန္ဒံ ဩသာရဏပစ္စယာ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ ဟတ္ထတော ခါဒနီယံ ဝါ ဘောဇနီယံ ဝါ သဟတ္ထာ ပဋိဂ္ဂဟေတွာ ဘုဉ္ဇနပစ္စယာ တိဿော အာပတ္တိယော အာပဇ္ဇတိ. ‘‘ခါဒိဿာမိ ဘုဉ္ဇိဿာမီ’’တိ ပဋိဂ္ဂဏှာတိ၊ အာပတ္တိ ထုလ္လစ္စယဿ၊ အဇ္ဈောဟာရေ အဇ္ဈောဟာရေ အာပတ္တိ သံဃာဒိသေသဿ၊ ဥဒကဒန္တပေါနံ ပဋိဂ္ဂဏှာတိ၊ အာပတ္တိ ဒုက္ကဋဿ.

‘‘ကိံ တေ၊ အယျေ၊ ဧသော ပုရိသပုဂ္ဂလော ကရိဿတိ အဝဿုတော ဝါ အနဝဿုတော ဝါ၊ ယတော တွံ အနဝဿုတာ! ဣင်္ဃ၊ အယျေ၊ ယံ တေ ဧသော ပုရိသပုဂ္ဂလော ဒေတိ ခါဒနီယံ ဝါ ဘောဇနီယံ ဝါ တံ တွံ သဟတ္ထာ ပဋိဂ္ဂဟေတွာ ခါဒ ဝါ ဘုဉ္ဇ ဝါ’’တိ၊ ဥယျောဇနပစ္စယာ တိဿော အာပတ္တိယော အာပဇ္ဇတိ. တဿာ ဝစနေန ခါဒိဿာမိ ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ထုလ္လစ္စယဿ၊ ဘောဇနပရိယောသာနေ အာပတ္တိ သံဃာဒိသေသဿ.

ကုပိတာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

ကိသ္မိဉ္စိဒေဝ အဓိကရဏေ ပစ္စာကတာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

သံသဋ္ဌာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

‘‘သံသဋ္ဌာဝ၊ အယျေ၊ တုမှေ ဝိဟရထ၊ မာ တုမှေ နာနာ ဝိဟရိတ္ထာ’’တိ ဥယျောဇေန္တီ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ. ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

ဒသ သံဃာဒိသေသာ နိဋ္ဌိတာ။ပေ။.

(ယထာ ဟေဋ္ဌာ တထာ ဝိတ္ထာရေတဗ္ဗာ ပစ္စယမေဝ နာနာကရဏံ)

ဒဓိံ ဝိညာပေတွာ ဘုဉ္ဇနပစ္စယာ ကတိ အာပတ္တိယော အာပဇ္ဇတိ? ဒဓိံ ဝိညာပေတွာ ဘုဉ္ဇနပစ္စယာ ဒွေ အာပတ္တိယော အာပဇ္ဇတိ. ဘုဉ္ဇိဿာမီတိ ပဋိဂ္ဂဏှာတိ၊ အာပတ္တိ ဒုက္ကဋဿ၊ အဇ္ဈောဟာရေ အဇ္ဈောဟာရေ အာပတ္တိ ပါဋိဒေသနီယဿ – ဒဓိံ ဝိညာပေတွာ ဘုဉ္ဇနပစ္စယာ ဣမာ ဒွေ အာပတ္တိယော အာပဇ္ဇတိ.

ကတာပတ္တိဝါရော နိဋ္ဌိတော ဒုတိယော.