၃. ဝိပတ္တိဝါရော

၂၅၁. ကာယသံသဂ္ဂံ သာဒိယနပစ္စယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? ကာယသံသဂ္ဂံ သာဒိယနပစ္စယာ အာပတ္တိယော စတုန္နံ ဝိပတ္တီနံ ဒွေ ဝိပတ္တိယော ဘဇန္တိ – သိယာ သီလဝိပတ္တိံ၊ သိယာ အာစာရဝိပတ္တိံ။ပေ။ ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော စတုန္နံ ဝိပတ္တီနံ ကတိ ဝိပတ္တိယော ဘဇန္တိ? ဒဓိံ ဝိညာပေတွာ ဘုဉ္ဇနပစ္စယာ အာပတ္တိယော စတုန္နံ ဝိပတ္တီနံ ဧကံ ဝိပတ္တိံ ဘဇန္တိ – အာစာရဝိပတ္တိံ.

ဝိပတ္တိဝါရော နိဋ္ဌိတော တတိယော.