၁. ပါရာဇိကကဏ္ဍံ

၂၄၉. ကာယသံသဂ္ဂံ သာဒိယနပစ္စယာ ကတိ အာပတ္တိယော အာပဇ္ဇတိ? ကာယသံသဂ္ဂံ သာဒိယနပစ္စယာ ပဉ္စ အာပတ္တိယော အာပဇ္ဇတိ. အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ၊ အာပတ္တိ ပါရာဇိကဿ၊ ဘိက္ခု ကာယေန ကာယံ အာမသတိ၊ အာပတ္တိ သံဃာဒိသေသဿ၊ ကာယေန ကာယပဋိဗဒ္ဓံ အာမသတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓေန ကာယပဋိဗဒ္ဓံ အာမသတိ၊ အာပတ္တိ ဒုက္ကဋဿ၊ အင်္ဂုလိပတောဒကေ ပါစိတ္တိယံ – ကာယသံသဂ္ဂံ သာဒိယနပစ္စယာ ဣမာ ပဉ္စ အာပတ္တိယော အာပဇ္ဇတိ.

ဝဇ္ဇပ္ပဋိစ္ဆာဒနပစ္စယာ ကတိ အာပတ္တိယော အာပဇ္ဇတိ? ဝဇ္ဇပ္ပဋိစ္ဆာဒနပစ္စယာ စတဿော အာပတ္တိယော အာပဇ္ဇတိ. ဘိက္ခုနီ ဇာနံ ပါရာဇိကံ ဓမ္မံ [ဓမ္မံ အဇ္ဈာပန္နံ (သျာ.)] ပဋိစ္ဆာဒေတိ၊ အာပတ္တိ ပါရာဇိကဿ၊ ဝေမတိကာ ပဋိစ္ဆာဒေတိ၊ အာပတ္တိ ထုလ္လစ္စယဿ၊ ဘိက္ခု သံဃာဒိသေသံ ပဋိစ္ဆာဒေတိ၊ အာပတ္တိ ပါစိတ္တိယဿ၊ အာစာရဝိပတ္တိံ ပဋိစ္ဆာဒေတိ၊ အာပတ္တိ ဒုက္ကဋဿ – ဝဇ္ဇပ္ပဋိစ္ဆာဒနပစ္စယာ ဣမာ စတဿော အာပတ္တိယော အာပဇ္ဇတိ.

ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ကတိ အာပတ္တိယော အာပဇ္ဇတိ? ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ပဉ္စ အာပတ္တိယော အာပဇ္ဇတိ. ဥက္ခိတ္တာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇတိ၊ ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ ပါရာဇိကဿ၊ ဘေဒကာနုဝတ္တိကာ ဘိက္ခုနီ ယာဝတတိယံ သမနုဘာသနာယ န ပဋိနိဿဇ္ဇတိ၊ အာပတ္တိ သံဃာဒိသေသဿ၊ ပါပိကာယ ဒိဋ္ဌိယာ ယာဝတတိယံ သမနုဘာသနာယ န ပဋိနိဿဇ္ဇတိ၊ အာပတ္တိ ပါစိတ္တိယဿ – ယာဝတတိယံ သမနုဘာသနာယ န ပဋိနိဿဇ္ဇနပစ္စယာ ဣမာ ပဉ္စ အာပတ္တိယော အာပဇ္ဇတိ.

အဋ္ဌမံ ဝတ္ထုံ ပရိပူရဏပစ္စယာ ကတိ အာပတ္တိယော အာပဇ္ဇတိ? အဋ္ဌမံ ဝတ္ထုံ ပရိပူရဏပစ္စယာ တိဿော အာပတ္တိယော အာပဇ္ဇတိ. ပုရိသေန – ‘‘ဣတ္ထန္နာမံ ဩကာသံ အာဂစ္ဆာ’’တိ ဝုတ္တာ ဂစ္ဆတိ၊ အာပတ္တိ ဒုက္ကဋဿ၊ ပုရိသဿ ဟတ္ထပါသံ ဩက္ကန္တမတ္တေ အာပတ္တိ ထုလ္လစ္စယဿ၊ အဋ္ဌမံ ဝတ္ထုံ ပရိပူရေတိ၊ အာပတ္တိ ပါရာဇိကဿ – အဋ္ဌမံ ဝတ္ထုံ ပရိပူရဏပစ္စယာ ဣမာ တိဿော အာပတ္တိယော အာပဇ္ဇတိ.

ပါရာဇိကာ နိဋ္ဌိတာ.